Read Poumei Naga 1 SAMUEL 15 Bible Online

1 SAMUEL 15 - Poumei Naga bible

1 SAMUEL 15

¹Samuel nou Saul hi paoe, “Neye panou Israel mai pei hi veo soure donou MAPAO nou Eye seive neye theadzü napeie. Südonou chuo MAPAO vei chi sü zülo.

²Khoukhoulai Ramai MAPAO nou Amalek maiye sü tudee talaire, daiolouzü puletao vei puopaoh maitao nou Israel maitaoye Ejipt teidei hinou tapayu phaki dure.

³Südonou taho Amalek maiye southakhai touo, ae puletao vei buyu na veishi souhakhaio. Halia shokhai peiso: naotu poutu ae nahmaitou hrülai nou southakhai touwo; nghitu zhaotu, racho, rheisüh ae kikhaorü teitei nou southakhaio.”

⁴Südonou Saul nou puhvei maitao sü Telem hi kuve jüloua phouyu phaki, Israel mai hinou 200,000 ae Judah hinou reihmai hai 10,000 vejüloue.

⁵Süthaisü Saul ae puhvei reihmaitao nou Amalek maivei nuhdu hisü velou deikho hinou daloure.

⁶Puhnou Ken mai hisü haibüa nou rai-a paopeie, “Neletao hai Amalek maiye koa buso, daiolouzü Enou Amalek maiye soureih soutayu phaki neletao-a koa southa shulai.” Ken mai hai Israel maitao nou Ejipt teidei hinou tapayu phaki, puletaoye zhuvea peia soukha peie. Südonou Ken maiye southa moa panou tarei paloue.

⁷Saul nou Amalek maiye Havilah hinou poa Ejipt teinghi palova buyu Shur teidei hi koute reih soua veiloure.

⁸Puhnou Amalek maivei Veo Agag ye hria nüloure ae mai hrülaiye sü southakhai toure.

⁹Ana Saul ae puhvei maitao nou Agag veoye sü southa more, alia nghitu zhaotu ae kikhaorü hrübo veitya, moyuma na veiyu teitei sü souha moa poloure. Puletao nou veimoyu ae muh hayu natao likhei souha baire.

¹⁰MAPAO nou Samuel hi paoe,

¹¹“Enou Saul ye panou veo souyu hai soumah showure, daiolouzü puhnou athaifü bare ae avei chikha khesü zübare.” Samuel hai rarou shore, ae puhnou khei mathe MAPAO hinou zhuvea-a khaipeio tea veachi paoe.

¹²Samuel nou thainesho shona nou kushuloua Saul ye daolai tea tare. Puhnou tapayu phaki, Saul hai Karmel nuhdu hi velou lah puhye panou ngaimoa teisa licho loure donou chuhsho ali shokhai peia Gilgal hi hotare tea chouloure.

¹³Samuel nou Saul hi veyu phaki, Saul nou puhye tapa süloua paoe, “MAPAO panou neye shiha peiyu sü soulou theo! MAPAO nou kharochi peikhai touyu thaifüa Enou soupeiwure.”

¹⁴Samuel nou paoe, “Nenou MAPAO vei kharochi züwe touyu thaisü, daisouyu donou Enou zhaotu ae kikhaorü rayu pai khesü chou khaiwe?”

¹⁵Saul nou chila peie, “Avei maitao nou Amalek mai hinou povewe, daiolouzü puletao nou nghitu zhaotu ae kikhaorü veikayu taosü pove nevei Ramai MAPAO hi posheelare donou southa moa shokhaiwure, anou kukhe louzü southakhai toure.”

¹⁶Süthaisü Samuel nou Saul hi paoe, “Chi paopu soubaio! Dokhei MAPAO nou ahi paoyu chi sü Enou ne hi paongao peilai.” “Paongao peikhaio,” tea Saul nou paoe.

¹⁷Samuel nou paoe, “Ne lah neye matsü moyu mai ali baie tea paowe, anou ne hai Israel mai hrülaiye süthai-apeio nasüe. MAPAO nou neye Israel mai pei hi panou veo soure donou theadzü napei khaitoue,

¹⁸ae MAPAO nou neye maishiyu Amalek mai hrülaiye souhakhai touwo tea kharochi peia seita-e. Puhnou neye mai hrülai sü southakhai mokoute southawo tea paopeie.

¹⁹Ne daisounou MAPAO vei chi zümoe? Ne daisounou navei khesü jüpashoa nou povewe, ae MAPAO nou jüpa moyu vah sü souge?”

²⁰Saul nou Samuel hi paoe, “MAPAO nou paoyu chi sü E-a züa baie, puhnou Eye tawo tea kharochi peiyu thaifüa Enou taho Amalek mai hrülaiye sü southakhai touwua Veo Agag likhei save-a baie.

²¹Ana avei maitao nou veikayu kikhaorü khesü southamoa Gilgal hi pove nevei Ramai MAPAO ye posheela peire donou pove-a baie.”

²²Samuel nou paoe, “MAPAO nou jüpayu hai puh chi züyu naho, molouzü posheela peiyu nage? Kikhaorü veikayu nanou posheela peiyu jüwo puh chi züyu punou jüpapue.

²³Puh chi zümoa khaityayu hai hraomai ali büa baie, ae rochiyu hai bashara aliye thoyu raibüa baie. Daiolouzü nenou MAPAO vei chikha nasü malaiyu donou puhnou neye sü veo souyu hinou laiwure.”

²⁴Saul nou Samuel hi paoe, “Ovai Enou mah souwure. Enou MAPAO vei chikha ae nenou paodou peikhai touyu khesü zülou more. Daiolouzü Enou avei maitaoye sü ngaopi loua panou puletao nou sounü nasü souwure.

²⁵Zhuvea nou amah sü khaipeio tea ne hi ra-a nou khowe, ae Eye sa-a nou dakhai tapeio, sübüa Eye panou MAPAO ye sü tholo.”

²⁶“E neye sa-a nou dakhai talai moe,” tea Samuel nou chila peie. “Nenou MAPAO vei chikha sü pfüthowure, südonou neye sü puhnou Israel maivei veo souyu hinou popawure.”

²⁷Süthaisü Samuel nou talaire tea tapayu phaki, Saul nou puh naazao sü paiyu donou pai phawure.

²⁸Samuel nou puh hi paoe, “MAPAO nou zhou teithe ne hinou Israel maivei vedei sü soude laiwure, ae ne jünou veipuyu mai ali hi peiwure.

²⁹Israel maivei khupayu Ramai hai da moe, moa puh le hai dakou dakhe moe, daiolouzü puh hai mai moe, südonou puhvei le hai dacha moe.”

³⁰“E mah souwure,” tea Saul nou chila peie. “Ana zhuvea nou Eye panou süthai-apei maitao ae Israel maisou nghoujü hinou tsükhouyu sü soungao peio, ae Eye koa sa-a nou dakhai ve peio, sübüa E-a panou nevei Ramai MAPAO ye sü tholo.”

³¹Südonou Samuel nou puhye koa dakhai ve peie, ae Saul nou MAPAO ye sü tholoue.

³²Süthaisü Samuel nou paoe, “Veo Agag ye ahi sakou.” Agag nou puh hisü ngaopi shoa nou takoue, ae haibüa tsü choe, “Athai touyu hai daizhou koute kha sarou!”

³³Samuel nou puh hi paoe, “Nevei khoche vanou pfümai taoli hai nahmai hare, südonou chuo ne pfüa panou nahapfü soutawulai.” Puhnou Agag ye Gilgal hi posheelabu nghoujü nou souvava nou daode sasawure.

³⁴Süthaisü Samuel nou Ramah hi tare, ae Veo Saul nou puh ki Gibeah hisü dakhai tare.

³⁵Samuel thaimo koute hai puhnou veo ye sü ngaopu more; ana puhnou Saul ye donou dopfüe. MAPAO-a Saul ye panou Israel mai hi veo souyu donou lengaire.