Read Poumei Naga 1 SAMUEL 17 Bible Online

1 SAMUEL 17 - Poumei Naga bible

1 SAMUEL 17

¹Philistin mainou soureih soure donou Judah maivei teidei Sokoh nuhdu hinou velou jüloure, ae puletao nou Sokoh ae Azekah kohinou buyu Ephes Dammim tea kuyu buh hi fühao soua buloure.

²Saul ae Israel mainou Philistin maiye reih soure donou velou jüloua Elah Deikho hinou fühao souloure.

³Deikho kohinou bua Philistin mainou deichi alilo vanou buloure ae Israel mainou deichi alilo vanou bue.

⁴Philistin maivei reihmaitao hrohinou Gath nuhdu hinou veyu Goliath tea kuyu maipu nanou Israel maiye tapaloua valoure. Puh hai mitar asü phali sah sho-e,

⁵ae puhnou baosahu nou souyu khaokha hai sühcho raingouanai buyu ali nouwe, ae baosahu peirü pfüe.

⁶Puh phi hai baosahu nou zühao pfüe, ae baosahu nou soukhai touyu heung ali hai phao hinou kapfüwe.

⁷Puhvei heung hai deka dei due, ae puhvei heung hai sühcho anai phali süh-e. Puhvei rü hai mai ali nou poa puh nghoujünou rai-a tawe.

⁸Goliath nou Israel mai hi shusoua nou haibüa shapaoe, “Neletao daisounou reih soure donou zhapoa nou bue? E hai Philistin mai ali-e, ae neletao hai Saul vei qila maitao-e! Neletao hrohinou mai ali Eye reih souvare donou dopalo.

⁹Puhnou veiloua Eye southa loure toulouzü, Etao hai neletao vei qila soulai; ana Enou veiloua puhye southa loure toulouzü, neletao hai Etao vei qila soulai.

¹⁰Israel maitaore, neletao mailia Eye vahlou süyu mai buha-e, mai bulouzü mai ali tapa Eye dukhaio!”

¹¹Saul ae puhvei maitao nou haibüa Goliath nou vahyu chipao sü choulou khaie, puletao hai ngaopi shore.

¹²David hai Jesse nahpoutue, puh hai Judah teidei hi buyu Bethlehem nuhdu hinou Ephrath mai-e. Jesse hai nahpoutu acha bue, ae Saul nou veo soulouyu phaki, puh hai tsüpare.

¹³Puh nahpoutu asü hai Saul ye koa reihbu hi hotare. Tsükana zhih hai Eliab, ahai chena zhih nou Abimadab, ae asü chena zhih sünou Shammah toue.

¹⁴David hai nahpoutu nakhana-e, ae puh jürai mai asütao nou Saul ye koa buyu phaki,

¹⁵David hai teile teile hinou Bethlehem hi dakhaiho puh puo vei zhaotu sü khowe.

¹⁶Goliath nou Israel maiye sho-kou vah-a buyu hai teithe raidai pare.

¹⁷Teitheli Jesse nou puh nahpoutu David hi paoe, “Ne jürai maitao donou thoubu sakhai touyu sühdou kirou haitao poloua puletao nou buyu fühao hisü poho peio.

¹⁸Ae chonaodzü nou soukhai touyu touna haitao ke kirou hai reihmai peikhoye pove peio. Ne jürai maitao kabüa nou bue touyu sü taho zhuloua puletao hai vei-a bue touyu shee ali ahi pove ngaopeio.

¹⁹Saul veowo, ne jürai maitao, ae Israel reihmaitao hrülai hai Elah Deikho hinou Philistin maiye reih soure donou bue.”

²⁰David nou thainesho shona nou kushuloua zhaotu khesü panou mai kukhe aliye khore donou paopeiwua touso taosü pfüloua puh puo Jesse nou paoyu thaifüa tare. Puhnou Israel maivei fühao hi velouyu phaki, Israel maitao hai reih hi tare donou reihna tuloua reihvo soua tapare.

²¹Philistin mai ae Israel mai hai reih soure donou reihmaitao sü zhu haohao nou zhingao-a veapoa bure.

²²David nou touso taosü natao zhu-apeio hi khaipeiwua reihbu hisü tuve puh jürai maitao kabüa busa touyu zhure donou tare.

²³Puhnou puletaoye cha-a buyu teile hinou Goliath nou Israel maiye raichoki büa nghoujülo takouloua vare, ae süsü David nou chouloure.

²⁴Israel maitao nou Goliath ye zhingao loukhaie, puletao mai hrülai hai ngaopi shopoa tutare.

²⁵Israel maitao nou haibüa alinou ali hi paoe, “Maipou hounaye zhukhaio! Puhnou Etaoye vah-a buyu chipao sü kei khaio! Veo Saul nou maitaralia puhye southa louyu mainaye sü buu dushoa peilai touwe; ae veo nou puh nahpai-a puh ki khaipeilai touwe, ae süpei sünou kikha sü polai moe touwe.”

²⁶David nou puhye nghia buyu maitao hi noue, “Philistin maipu naye southa loua Israel maiye vupa peiyu naye daili peilai touwe? Heebi moyu Philistin maipu nanou hria buyu Ramai vei reihmaitaoye ngaophou moa vah-a buyu nasü thaoge?”

²⁷Puletao nou David hisü Goliath ye southa louyu mainaye sü dai peilai touyu khesü paopeie.

²⁸David vei jürai tsükhana nou David nou mai hi chi phayu sü choulou khaie, puhnou paoe, “Ne hai hinou dai souwe? Rekou nou buyu zhaotu khesü thaonou khowe? Enou nevei do sü süwe! Ne hikei tea nou hai hi tave reih züyu sü zhulai tea vewe!”

²⁹David nou paoe, “E daili souwure? E mai hi chi lia noulou shivu?”

³⁰Puhnou mai kukheli hia reive loua nou noupue, ae mai süna-a raibütoua chila sü peie.

³¹David nou paoyu sü kamai-a nou chouloua Saul hisü ve paopeie, ae Saul nou puhye sü leho kuloure.

³²David nou Saul hi paoe, “Apaopuwo, Philistin puonaye sü maitaralia ngaopiso! Enou puhye sü taho reih soulai.”

³³“Moe,” tea Saul nou chila peie. “Ne sü nahmaitou baihie, ana puh sü puhvei hrümai teitei nou reihmai ali soua bue, südonou ne puhye dulou hoe!”

³⁴David nou Saul hi paoe, “Apaopuwo, nevei kilai E hai apuo vei zhaotu sü khowe. Zhaotu kho-a buyu phaki, khaosouveo moyuma vuh nou tave zhaotu nüpoa tayu phaki,

³⁵Enou thaingou poho zhaotu khesü khailupa loua baiwe. Khaosouveo moyuma vuh nou Eye reida khaive duyu phaki, Enou raoqulu hinou leiloua southa loua baiwe.

³⁶Enou souveo ae vuh khesü southaloue, sübütoua Ramai ye sümoyu Philistin puona-a Enou southaloua bailai, daiolouzü puhnou hriyu Ramai vei reihmaitaoye sü ngaophou more.

³⁷MAPAO nou Eye khao ae vuh hinou khailupa peie; puhnou Eye Philistin maipu haina hinou khailupa peia bailai.” Saul nou chila peie, “Sükulouzü veire, tawo, MAPAO panou neye salai peiyu sü soulou theo.”

³⁸Süthaisü Saul nou David ye puhvei reihna nou tupeie; puhvei baosahu peirü rüpeie, ae reih pfüa souyu sabanü khesü thoupeie.

³⁹David nou puhvei reihna tulou ae khoche poloua tazhuyu phaki, puh hai talou hore, daiolouzü puh hai reihna khesü pfükho moe. Süthaisü David nou Saul hi paoe, “E reihna hai sü pfüa reih soulou hoe, daiolouzü E haitao pfükho moe.” Südonou puhnou reihna khesü phawure.

⁴⁰Süthaisü David nou zhaotu poa khoyu süüpo nasü puh bah hinou polou, rei hinou chuh lerüa buyu angou sü puh lekhabvü hi kothouloue, alia puh bah hinou lou sü poloua Philistin puona hilova takou tare.

⁴¹Philistin puona sünou puh rü pfüyu naye panou raipoa koa nou David hilo tanghi koure.

⁴²Ae puhnou tanghikou David ye ngaolou khaie, puhye sü ngaophou moa jünü loure, daiolouzü David hai hüvei shoa nou nahle maitou baihie.

⁴³Puhnou David hi paoe, “Ne süüpo nasü poa daisoulai? E hai sei baie tea ne tsüchowu?” Golaith nou puh rah zhih kuloua nou David ye chaare.

⁴⁴Puhnou David hi paoe, “Ahi takou khaio, Enou nevei pfüphao sü tei hi raohou ae rekhaona taoye panou touloulai.”

⁴⁵David nou Goliath hi haibüa chila peie, “Ne louzü ahi khoche, heung ae rü pfüa takouwe, ana Ewo louzü nenou ngaophou moyu Israel maivei Ramai MAPAO zhih hinou ne hisü takouwe.

⁴⁶Zhou teithe MAPAO nou neye sü abah hi thou peilai, ae Enou neye sü southa loulai, ae ne pei deloulai. Enou Philistin maivei reihmaitao vasou sü raohou ae rekhaona taoye panou tou loulai. Süthaisü deiphao mai hrülai nou Israel mai hai Ramai bue touyu süloulai,

⁴⁷ae hai hi buyu mai hrülai nou MAPAO hai puhvei maitaoye vupa peire hai khoche moyuma heung komoe touyu sü ngaoloulai, daiolouzü Puh hai reih kolouyu pue. Puhnou neletaoye sü Etao bah thoupeilai.”

⁴⁸Goliath nou David hilo tanghi koure, ae David nou Philistin mainou reih soure donou zhapoa buyu hilosü thasho poa takoure.

⁴⁹David nou puh lekhabvü hisü bah thaithou chuh ali poloua süna nou Goliath hisü laikou puh pu hisü deipeie, ae puh peirao sü deiphewua puhsü deiphi kaokou tare.

⁵⁰Sübüa David nou Goliath ye sü khoche pomoa lou ae chuh ali nou southaloue.

⁵¹Süthaisü David nou tukou puh phao hisünou laloua puhvei khoche sü paipa loua puh pei deloua puhye sü southaloue. Philistin maitao nou puletao vei reih souveih kayu maipuna thaiyu sü ngaolou khaie, puletao hai tupho rarou tare.

⁵²Süthaisü Israel mai ae Judah maitao nou shusoua Philistin maiye sü thaingou poa Gath ae Ekron vei robomü hi koute huve peie. Sübüa Philistin maiye sü Shaaraim ludu hinou Gath ae Ekron koute hai ludu sasasü kaodu poa nou ta-e.

⁵³Israel mainou Philistin maiye hutawua dakhai veyu phaki, puletao nou homaitao vei fühao hi buyu navei teitei sü poloure.

⁵⁴David nou Golaith vei pei sü Jerusalem hi pove-e, ana Goliath vei reihna khesü puhvei sahpao hi khaiwure.

⁵⁵David nou Goliath ye reih zülai tea tayu phaki, Saul nou puhvei reihmai peikhowo Abner hi noue, “Abner, nahlepuna hai thao nahpoutue?” Abner nou chila peie, “Apaopuwo, E-a sülou more.”

⁵⁶“Nahlepouna sü thao-e touyu taho phoulo,” tea Saul nou kharochi peie.

⁵⁷David nou Philistin puona ye southaloua dakhai veyu phaki, Abner nou puhye saloua Saul hi ve-e. Süphaki David hai Goliath pei poa laihie.

⁵⁸Saul nou puh hi noue, “Nahlepu nare, ne thao nahpoutu-e?” “E hai Bethlehem hinou buyu nevei kilai Jesse nahpoutu-e,” tea David nou chila peie.