Read Poumei Naga 1 SAMUEL 19 Bible Online

1 SAMUEL 19 - Poumei Naga bible

1 SAMUEL 19

¹Saul nou puh nahpoutu Jonathan hi ae puhvei peikho maitao hisü David ye southare donou tsüchoda khaiwure tea paoe. Ana Jonathan nou David ye sü leshi shoe,

²südonou puhnou David hi paoe, “Apuo nou neye sü southalai tea bure, südonou dosho shona hai kailoua nou tutsülo.

³Ae nenou tutsüa buyu buh hisünou Enou apuo pe hinou kou laloua neye donou chi phalai, ae Enou hataralia süloure toulouzü ne hi paongao peilai.”

⁴Jonathan nou puh puo Saul hi David ye paosho-a haibüa paoe, “Apuo Veowo, ne kilai David pei hi mah souso. Puhnou ne hi vah ashi ali-a soumoe, vah ashi souyu thaosü, puhnou soupfüyu vah teitei hai neye soukha peia baie.

⁵Puhvei hrirai hayu pimoa taho Goliath ye southa peie, ae MAPAO nou Israel maiye panou ngalouyu sü peie. Hai khesü nenou ngaolouyu phaki ne-a asa shoa baie. Ana chuo ne daisounou mah lia hayu David ye sü southalai touge?”

⁶Jonathan nou paoyu chipao khesü Saul nou keiloua kaore tea poloure, ae MAPAO zhih hinou puhnou David ye southalai more tea chaachou souwure.

⁷Südonou Jonathan nou taho David ye kuloua ko khesü puh hi paongaoe, süthaisü puhnou David ye saloua Saul hi save peie, ae David nou raichoki büa Saul vei kuvah sü soupue.

⁸Philistin maiye soureih sü soutapu khaire, ae David nou Philistin maiye alaosou southa peie, sübüa Philistin mai hai tutare.

⁹Teithe ali MAPAO hinou veyu rashi rako nanou Saul hisü velou loure. Süphaki Saul hai puh ki hinou heung ali poa nou bue, ae David hai lana poa nou lou soua bue.

¹⁰Saul nou David ye sü kivova hi heung nou laikou phyapa khaiwulai tea phyakou-e, ana David nou reiloua puh heung hai kivova hi phyakhai baire, ae David hai tureipa loure.

¹¹Süzhou khei sü Saul nou puhvei maiye seive David ki sü kholoua panou thainesho shona sü puhye southare donou leve-e. Ana David vei chapfü Mikhal nou puh hi paoe, “Zhou khei nou tuvai loumo louzü, ne hai dosho shona thai-a bailai.”

¹²Südonou Mikhal nou David ye sü panou vabomü hinou taopaloua tuta loure.

¹³Süthaisü honapai nou kihikha maivei bashara nasü poloua züphao hi zükhai loure, ae nghitumai nou soukhai touyu peikhü nou pei hi thou khüpeia sah nou hopeiwure.

¹⁴Saul vei maitao nou David ye salai tea veyu phaki, Mikhal nou puletao hisü David hai souwe tea paopeiwure.

¹⁵Ana Saul nou puletaoye seida khaive “David ye zhukhaio, ae puhye züphao hinou kaopoloua haihi poveo, Enou puhye sü southawulai,” tea kharochi peie.

¹⁶Puletao nou kikha talou zhuyu phaki, züphao hisü kihikha maivei bashara nasü nghitu mainou soukhai touyu peikhü nou khüpei khaitoua ngaoloua baire.

¹⁷Saul nou Mikhal hi noue, “Ne daisounou haibüa shodo ashi sü ahi soupeia panou Eye ngaobayu mainaye tuta louwe?” Honapai nou haibüa chila peie, “Puhye panou turei palou molouzü Eye southalai tea puhnou paoloure.”

¹⁸David nou turei paloua tuve Samuel nou buyu Ramah nuhdu hisü veloure, ae puhnou puh hi Saul nou soupfüyu teitei sü paongao peie. Süthaisü Samuel puhai hai taho Naioth hinou hrütare.

¹⁹David hai Ramah hinou buyu Naioth hinou bushe tea Saul hi mainou paopeie.

²⁰Südonou puhnou David ye panou nüloure donou puhvei maiye seitare. Puletao nou rachipaolayu maime ali hai Samuel nou süthaisa-a shusoua nou lou soua ae chopoa nou buyu ngaoe. Süthaisü Ramai vei rako nou Saul vei maitao hi louloua puletao hai-a shusoua lou soua chotare.

²¹Saul nou ko hai khesü choulou khaie, puhnou maime kukhe aliye seita pu-e, ae puletao-a cho-a nou shusoua rachi paotare. Puhnou bakha asü chena soua maime ali seitapu-e, ae puletao-a raibütoua baire.

²²Süthaisü puh pfüzho vuzünou talai tea Ramah hisü ve loure. Puhnou Seku hi buyu dzükhao hi veyu phaki, Samuel ae David hai daiki nou bue tea mai hi nouyu phaki, puhai hai Naioth hi bue tea mainou paopeie.

²³Puhnou buh sühi veyu phaki, Ramai vei rako nou puh hi koulouloua puh-a shusoua cho-a ae rachipaola-a Naioth hi veyu ludu sasü ta-e.

²⁴Puhnou puhvei sabanü teitei sü phalaiwua Samuel vei nghoujünou shusoua cho-a rachipaola-e, ae baitoua puhnou hea ali ae khei ali bue. (Südonou haibüa nada paowe, “Saul koute-a rachipaola apei mai soutarevu?”)