Read Poumei Naga 1 SAMUEL 20 Bible Online

1 SAMUEL 20 - Poumei Naga bible

1 SAMUEL 20

¹Süthaisü David nou Ramah hi buyu Naioth nuhdu hinou tupoa ve Jonathan hi haibüa paoe, “Enou dai mahli souwure? Enou ne puo hi dai mah soupei khaitoua ne puo nou Eye southalai touwe?”

²Jonathan nou chila peie, “Neye panou daisounou thai shulai! Apuo nou soupfüre vah teitei sü ahi paongao-a baiwe, ae neye southalai touyu hai-a ahi paongao moa pokukhai toulai moe.”

³Ana David nou Jonathan hi chila peie, “Ne puo nou süwe, süolouzü ne hai Eye leshi showe, südonou puhnou tsüchoda khaitouyu nasü neye panou sümore donou lelawure, daiolouzü nenou süloure toulouzü ne le vea-a bailai, Hriyu MAPAO zhih hinou ne hi chaachou soua paowe, süolouzü E hai thaire hinou phika ali baire.”

⁴Jonathan nou paoe, “Nenou jüpayu teitei sü Enou neye donou soupeilai.”

⁵David nou chila peie, “Dosho hai Khouh Ashu Nüh nülai, ae E-a veo ye koa tovai vaizhoyu hi loumo louzü shi-e. Ana nenou ae-ao toupei louzü, Eye panou daone khoukhe koute hai dou hinou ho tutsüa buwo.

⁶Hakinou ne puo nou Eye tovai zhoyu hi velou moa ngaoloure toulouzü, E hai ne hinou nouloua Bethlehem hi taho akikha maiye koa potei vei posheela-a nüh nüzhore donou tare tea paopeio.

⁷Hakinou ne puo nou ‘Süsü veire’ tea paolouzü E hai kaozhou vei-a bailai, ana ne puo hai rarou louzü, Eye soushire donou lelawure touyu nenou süloulai.

⁸Ramai zhih hinou ahai hai samai soulai tea chaachou soukhai touyu thaifüa, hai nasü zhuvea nou ajüpa soupeio. Ana Enou soumah khaitouyu bulouzü, Eye ne lah buh hai hinou southawo. Daisounou ne puo hi save Eye southalai?”

⁹Jonathan nou chila peie, “Sübüyu tsü choso! Hakinou apuo nou neye southalai tea bulouzü, daisounou E ne hi paomo shulai.”

¹⁰Süthaisü David nou Jonathan hi noue, “Ne puo nou ne hi raroua chila peire touyu sü thaonou tave ahi paopeilai?”

¹¹“Ahai koa dou hi holai khe,” tea Jonathan nou chila peie. Südonou puhai koa dou hi hotare,

¹²ae Jonathan nou David hi paoe, “Israel maivei Ramai MAPAO panou ahai ko hi shaki soulai! Dosho moa daone hai, chu phateile hi Enou apuo hinou chi noulai, ae puhnou neye jüpa-a bulouzü, Enou ne hi ko paota peilai.

¹³Ana puhnou neye soushilai tea bulouzü, Enou neye panou süloua tutalou moyu thaio, MAPAO ye panou Eye southa theo. MAPAO nou apuo ye salai peiyu büa neye salai peiyu soulou theo!

¹⁴Hakinou E thaimoa hria bulouzü, zhuvea nou ahai koa chaachou soukhai touyu thaifüa ahi chilee cheche-a bupeio; ana E thai louzü,

¹⁵avei kihikha maitao hi nevei zhuvea leshiyu nahai deraita peiso. MAPAO nou nevei ngaobayu mai hrülaiye souhakhai toupeiyu phaki,

¹⁶ahai koa chaachou soukhai touyu nasü panou pepo tapeiso. Hakinou pepo tare toulouzü MAPAO panou neye tudee peitheo.”

¹⁷Jonathan nou David ye panou puh-a puhye leshi chechewe touyu vei chaachou ali hai panou soupu-e, daiolouzü Jonathan nou David ye leshiyu hai lah puhye leshiyu büa lesh-e.

¹⁸Süthaisü Jonathan nou puh hi paoe, “Dosho hai Khouh Ashu Nüh nülaire, ae nenou tovai vaizhoyu hisü velou moyu hai mainou sülou laire.

¹⁹Ae daone hai ne hare touyu hai mainou süpu laihie; südonou raichoki nenou taho tutsüyu chuh pokaokhai touyu thailo nou tutsüa bulo.

²⁰Süthaisü Enou voulouthou asü hai ha kayu büa kakou peilai.

²¹Süthaisü Enou avei kilai na hi takou voulouthou phoukhaio tea paopeilai. Enou puh hi ‘Voulouthou sü hailova bubaie, takou phouloua polo,’ tea paolouzü, ne hai kaozhou vei-a bailai, vakou tapaloua bailai. Hria buyu MAPAO zhih hinou Enou chaachou soua paowe, ne kaozhou ashi daolai moe.

²²Ana Enou avei kilai na hi ‘Voulouthou sü holova koure,’ tea paolouzü, ne tavai loua baio, daiolouzü MAPAO nou süsü neye seitawe.

²³Ahai nou koa chaachou soukhai touyu nasü MAPAO panou veteyu sü soupeiyu soulou theo.”

²⁴Südonou David hai dou hinou tutsüa bure. Khouh Ashu Nüh nüzhoyu tovai buh hisü Veo Saul hai veloure,

²⁵ae puhnou teisa nou buyu buh kivova hilosü buloure. Abner nou puhye da-a nou bue, ae Jonathan nou puh nghoujülo bue. David vei buh hai sakhai-a bue,

²⁶ana süzhou hai Saul nou hachilia paomore, daiolouzü puhnou haibüa choloure, “Naanou hilovanou David hai soushee loumoa vemoyu phare.”

²⁷Khouh Ashu Nüh nülouyu thainesho-a David vei buh hai sakhai-a bubaire, südonou Saul nou Jonathan hi noue, “David hai daisounou do-a ae zhou-a tovai vaizhoyu hisü velou mowe?”

²⁸Jonathan nou chila peie, “Puhnou ahi zhuvea panou puhye Bethlehem hi tawo tea kholoure.

²⁹Puhvei kikha maitao hai koa posheelayu vei khonüh nüzhore donou puhye puh jürai maitao nou velouyu deinou shi-e tea paovewe tea ahi paoe. Südonou puhvei kihikha maitaoye taho zhure donou E hai puhvei samai khamai-e toulouzü puhye panou tawo tea ahinou kholoure. Südonou neye koa vaizhoyu buh hisü puh hai velou loumore.”

³⁰Saul hai Jonathan hi lekha sholoua haibüa paoe, “Ne hai khakhapfü nah baie! Ne lah ne hi hraongu pove loure donou ae neye napeiyu ne pfüye hrao soupeire donou ne hai David ye phaobowe touyu Enou süwe.

³¹David hria bukisa sü ne hai pa tyadei haina hi veo koulou hoe touyu ne sümowu? Südonou taho puhye hai hi save-o, daiolouzü puh hai thaivu zülai.”

³²Süthaisü Jonathan nou puh puo Saul hi chila peie, “Puhye daisounou southalai touwe? Puhnou dai mah soukhai toue?”

³³Sübüa Jonathan nou chi noupei khaie, Saul sü puhye heung nou laikou phyare. Haibüa puh puo nou rapayu ngaolou khaie, Jonathan nou puh puo hai David ye southa vuzülai tea buloure touyu hai süloure.

³⁴Südonou Jonathan nou süzhou hai haliro toumoa rarouloua vaizhoyu buh sü thaokhaiwua tare— süzhou hai Khouh Ashu Nüh nüyu teithe ahai chena-e. Puh puo Saul nou David ye ngaophou moyu donou Jonathan hai David ye donou levea shore.

³⁵Thainesho shona sü puhai nou paokhai touyu thaifüa Jonathan nou David ye daore donou dou hisü nahmaitu aliye saloua tare.

³⁶Jonathan nou puh hi paoe, “Enou voulouthou kalaiyu nasü ne tukou phouloua nou polo.” Nahtou nanou tukouyu jünou la-a Jonathan nou voulouthou nasü kakoure.

³⁷Nahtou nanou voulouthou dekouyu buh hi kouyu phaki, Jonathan nou shusoua shapaoe, “Voulouthou sü buh taijünou lakou hie!

³⁸Tehinou la-a buso! Thashoa nou polo!” Nahtou nanou voulouthou taosü koloua puh paopu hisü dakhai koure.

³⁹Ana nahtou nanou daisouwe touyu haliro sümoe; Jonathan ae David likhei süa baie.

⁴⁰Jonathan nou puhvei reihna khesü puhye salaiyu nahtou na hi peiwua puhye panou ki hi poa dakhai tare.

⁴¹Nahtou nanou dakhai tayu thai, David nou chuh pojü khaitouyu thailo vanou tapa loure, ae puhnou khoukhe loua puh pah pfükou deiphi khurü asü kho-e. Süthaisü Jonathan puhai hai alinou aliye kholoua kra-a nou mütei-e. David nou leveayu hai Jonathan jünou leveapure.

⁴²Süthaisü Jonathan nou David hi paoe, “Ramai ye panou neye salai peiyu sü soulou theo. Ahai nou chavei lathao-a hrülai tea chaachou soukhai touyu nasü MAPAO ye panou avei ae nevei tyaosholea phao hia panou bukou teyu sü soulou theo.” Süthaisü David hai tare, ae Jonathan-a lah ki hi dakhai vere.