Read Poumei Naga 1 SAMUEL 27 Bible Online

1 SAMUEL 27 - Poumei Naga bible

1 SAMUEL 27

¹David nou haibüa tsüchoe, “Teitheli moa teitheli hai Saul nou Eye southa bailai. Südonou E hai Philistin mai hi tuho bulouyua vei-a bailaire. Sükulouzü Saul nou Eye phoutapu moa E hai kaozhou vei-a bailai.”

²Südonou David nou puhvei mai kaihrou taosü Gath hi veo Maokh nahpoutu Achish hisü veloure.

³David ae puhvei maitao hai puletao vei kihikha maitaoye saloua Gath hinou ve hrüre. David nou puhvei chapfü ahai- Jezreel hinou Ahinoam, ae Karmel hinou Nabal hapu chapfü Abigail puhaiye koa Gath hinou ve bure.

⁴David hai Gath hi tuho butareshe touyu Saul nou choulou khaie, puhnou David ye sü phoutapu more.

⁵David nou Achish hi paoe, “Nenou Eye nevei samai khamai ali-e tea polouzü, Eye nuh taitou ali peia panou sühinou hrüo. Nevei nuhdu hinou neye koa hrüzho moyuma vei-e.”

⁶Südonou Achish nou puhye Ziklag nuhdu nasü peie. Hai vanou zhodao koutea Ziklag nuhdu nasü Judah vei nuh teidei soua nou bue.

⁷David nou Philistin maiye koa khouh kiarou hai hrüe.

⁸Teile süphaki, David ae puhvei maitao nou süpehao hi raichokinou hrüa buyu Geshur mai, Girza mai, ae Amalek maiye soureih souta-e. Puhnou Ejipt hi talouyu Shur maivei teidei hi koute hai soureih souta-e,

⁹ae puletao mai hrülai hai naotu poutu sümoa southa khaiwua puletao vei zhaotu, nghitu, rheisüh ae kikhaorü alia sabanü koute-a poloua Achish hisü dakhai ve-e,

¹⁰ae Achish nou puh hi “Zhouvu ne daiki nou soureih souta-e?” tea nouyu phaki, David nou puh hisü “Judah teidei khelova nou reih souta-e,” moyuma “Jerahmeel maivei teidei hi soureih sou-e,” moyuma “Ken mainou hrüyu teidei hinou ho reih sou-e,” tea chila peia baiwe.

¹¹David nou soureih soutayu phaki nuh teidei hi hrüa buyu naotu poutu sümoa southa khaiyu donou Gath nuhdu hisü mai linoua tave puhnou ae puhvei maitao nou soupfüyu vah khesü paopeire mai ha-a baiwe. Haibüa David nou Philistin mai hi buyu phaki soupeie.

¹²Ana Veo Achish nou David ye sü louche sho-e, ae puhnou lah haibüa tsüchoe, “Puhye sü lah puhvei Israel maitao nou ngaora sho-e, südonou puhnou hria bukisa sü avei kuvah soua bubai shulai.”