Read Poumei Naga 1 SAMUEL 28 Bible Online

1 SAMUEL 28 - Poumei Naga bible

1 SAMUEL 28

¹Teile phajütou thaisü, Philistin mainou puletao vei reihmaitao hai save jüloua Israel maiye soureih soulai tea bure. Südonou Achish nou David hi paoe, “Ne ae nevei maitao hai Eye koa soureih soutalai touyu sülo.”

²David nou puh hi chila peie, “Esü nevei kilai baie, neye donou Enou soulou süyu koute hai soungaolai.” Achish nou paoe, “Sükulouzü veire, neye panou teisa avei reihmai soua Eye kholai.”

³Chuo Samuel hai thaitare, ae Israel mai hrülai nou puhye donou dopfüa puhvei nuhdu Ramah hinou puhye sü nüvuh peie. Ae Saul nou Israel teidei hinou buyu thaimai ko pola peiyu mai ae keingumai hrülaiye sü hulai khaiwure.

⁴Philistin maivei reihmaitao nou tave jüloua Shunem nuhdu pe hinou fühao soua buloure; ae Saul nou Israel maitaoye save jüloua Gilboa Deichi hinou fühao soua bure.

⁵Saul nou Philistin maivei reihmaitaoye ngaolouyu phaki, puh hai ngaopi sholoure,

⁶südonou puhnou MAPAO hinou dai souyua veilai tea noue. Ana MAPAO nou puhye sü zhiho mekou hinoua, moa Ramai vei leli poa zhuyu Urim ae Thummim hinoua, moyuma rachipaola peiyu maitao hinoua chila sü peimore.

⁷Süthaisü Saul nou puhvei peikho maitao hi paoe, “Eye thaimai hinou chi paola peiyu naotumai ali phoupeio, ae Enou taho puh hinou daisouyu nou veilaisa touyu noulai.” “Endor hinou mai ali bue,” tea puletao nou Saul hi chila peie.

⁸Südonou Saul veo nou puhvei zhai hai souda loure; tyakuyu sabanü nou banouloua puhvei mai ahai saloua teimairai nou naotupai hisü talai teanou tare. Saul nou honapai hisü ve haibüa paoe, “Thaimai rako hinou ahi daie vepalai touyu khesü noupeio. Enou thaitayu maina zhih kupeiyu phaki, puhvei rako sü kupoa vepeio.”

⁹Naotupai nanou chila peie, “Saul veo nou Israel maivei teidei hinou buyu thaimailu tayu mai ae keingumai hrülaiye sü souhakhai toure touyu sü neletao nou süwe. Neletao daisounou shodo souloua Eye southalai touwe?”

¹⁰Süthaisü Saul nou MAPAO zhih kuloua haibüa chaachou souloua paoe, “Hriyu MAPAO zhih hinou neye panou veahoyu sü daokhai toulai moe.”

¹¹“Enou neye donou thaoye kulai?” tea honapai nou noue. “Samuel ye kupeio,” tea puhnou chila peie.

¹²Naotupai nou Samuelye ngaolouyu phaki, puhnou shusoua ra-a Saul hi paoe, “Ne daisounou da-a ahi shodo ashi souwe? Ne sü Saul baie!”

¹³“Ngaopiso!” tea veo nou honapai hi paoe. “Ne daie ngaoe?” “Dei hinou rako ali ngaopa-a Enou zhingaowe,” tea honapai nou chila peie.

¹⁴“Puh sü kabüwe?” tea Saul nou noue. “Puh hai tsümai-e, ae naazao nouwe” tea honapai nou chila peie. Süthaisü Saul nou puh hai Samuel phare touyu hai süloure, südonou puhnou deiphi nakouloua puhye khurüe.

¹⁵Samuel nou Saul hi paoe, “Ne daisounou Eye kudakhai ve souchorowe?” Saul nou chila peie, “E choha-a nou veashoa bure. Philistin mainou Eye sü soureih soulai tea bure, ae Ramai nou Eye thaowure. Puhnou Eye sü rachipaola peiyu mai hinou moyuma zhiho mekou hinoua chaku peimore. Südonou daisouyua veilai touyu paopeio tea neye kupoa vewe.”

¹⁶Samuel nou paoe, “Ramai nou neye thaowua neye hraitayu thaisü ne daisounou Eye kuwe?

¹⁷MAPAO nou Eye panou ne hi paopeiyu thaifüa soupeiwure: Puhnou vedei nasü ne hinou poloua David hi peiwure.

¹⁸Nenou MAPAO vei chikha sü züba-a Amalek maiye sü souhakhai tupei more. Südonou chuo MAPAO nou ne hisü haibüa soure.

¹⁹MAPAO nou neye ae Israel maitaoye Philistin mai bah hi thoupeiwure. Dosho hai ne alia nevei nahpoutu maitao hai Eye koa buta laire, alia Israel maivei reihmaitao hai Philistin mai bah hi thoupeiwulai.”

²⁰Samuel nou paoyu chipao khesü Saul nou choulou khaie, puh hai ngaopi sholoua deiphi hi kou dazü tare. Puh hai lülou hore, daiolouzü puhnou hea-khei-a touso ali-a toumore.

²¹Honapai nou Saul hi takouyu phaki, puh hai ngaopi shopoa buyu sü ngaolou khaie, honapai nou puh hi paoe, “Apaopuwo, Enou avei hrirai hayu domoa nenou paoyu nasü soupeiwure.

²²Chuo Enou jüpa-a khoyu nasü ne-a aetou peio. Neletao nou khouko ngaoloua ludu taloure donou, Enou neletao vei touso sü souda peilai, zhuvea toupeio.”

²³Saul nou touso ali-a toulai moe tea baloure, ana puhnou salaiyu puhvei kilai mai ahai ae naotupai nanou toulouyu deinou shi-e tea paokhai paokhai khaie, puhnou dazüa buyu hisünou kushuloua aetoure.

²⁴Süthaisü honapai nou thalasoua hübo veishoa buyu chotu ali datha loure, ae honapai nou southou sü poloua khei thoumoa raokhao khaoloure.

²⁵Süthaisü honapai nou Saul ae puhvei kilai mai ahaiye touso popa peia puletao nou touloure. Süzhou khei nou puletao hai dakhai tare.