Read Poumei Naga 1 SAMUEL 5 Bible Online

1 SAMUEL 5 - Poumei Naga bible

1 SAMUEL 5

¹Philistin mainou Vo Sübvü nasü shaolouyu thai, puletao nou Ebenezer hinou Ashdod nuhdu hi pove khaire.

²Süthaisü puletao nou Vo Sübvü nasü puletao Dagon rah ye thoyu rathoki hi polou puhvei zhurai daokhai touyu pe hi khaiwure.

³Thainesho shona sü Ashdod hi mainou Dagon rah zhurai soukhai touyu nasü MAPAO vei Vo Sübvü nghoujü nou deiphi kaokou bua ngaoloure. Südonou puletao nou zhurai soukhai touyu nasü levei buh hi popa khaipeie.

⁴Süthainesho shona-a puletao nou Dagon rah zhurai nasü MAPAO vei Vo Sübvü nghoujü hi kaokou deihro khaitoua ngaoloua baire, ae Dagon rah zhurai nasü pei ae bah ahai khinou vakou deidepa khaiwure, pfüphao likhei buh hi bua baire.

⁵(Südonou zhaodo koute-a Dagon vei napao maitao ae puhye thoyu Ashdod hi mainou buh sühisü takou phi heamoe.)

⁶MAPAO nou Ashdod hi maiye sü souvea shopeie, ae puhnou Ashdod ae süpehao hinou hrüyu mai hrülaiye sü panou maah pa-a souyu sounou ashi tyanou seive souvea peie.

⁷Ashdod hi mainou vepayu vah haso khesü ngaoloua puletao nou paoe, “Israel maivei Ramai nou Etao pei hi ae Etao Dagon rahye tudeeyu hai Etao nou pfülou hore, südonou puletao vei Vo Sübvü nasü Etao hi khaipu khailai more khe.”

⁸Südonou puletao nou kopomaiye seiho Philistin hi veo mai angou taoye kuve jüloua paoe, “Israel maivei Ramai Vo Sübvü nasü Etao poa daipha soulai?” Puletao nou paoe, “Vo Sübvü nasü Gath nuhdu hi poho khaio.” Südonou puletao nou Philistin maivei nuhdu ali Gath tea kuyu hisü pove khaiwure.

⁹Ana nuhdu sühi Vo Sübvü nasü pove khaiyu thai, MAPAO nou nuhdu sühi hrüyu maiye sü shishoa nou tudee peie, sübüa nuhdu sühi hrüyu mai hrülai hai taidu sümoa maah pa-a souyu sounou nasü soukhai toure.

¹⁰Südonou puletao nou Vo Sübvü nasü Ekron nuhdu hi seivere. Ana Vo Sübvü nasü Ekron nuhdu hi velouyu phaki, nuhdu sühi hrüyu maitao nou haibüa paore, “Puletao nou Israel maivei Vo Sübvü nasü pove Etaoye southalai tea povere!”

¹¹Südonou puletao nou Philistin maivei veo mai hrülaiye kuve jüloua paoe, “Etaoye ae Etao vei kihikha maiye southa more donou Israel maivei Vo Sübvü nasü raichoki buyu buh hi seidakhai ho khaipeio.” Ramai nou shishoa tudee peiyu donou nuhdu hi hrüyu mai hrülai hai ngaopi shore.

¹²Thaimoa buyu maitao hi-a maah payu sou nasü soure, ae puletao nou puletao rah hisü soukha peio tea khoe.