Read Poumei Naga 1 SAMUEL 7 Bible Online

1 SAMUEL 7 - Poumei Naga bible

1 SAMUEL 7

¹Südonou Kiriath Jearim hi mainou ve MAPAO vei Vo Sübvü nasü poloua deichi vanou buyu Abinadab ki hisü pove khaiwure, ae puh nahpoutu Eleazar ye panou Vo Sübvü nasü zhure donou sousheeloua vahbu thoupeie.

²Teile taoli, po kai phali hai MAPAO vei Vo Sübvü nasü Kiriath Jearim hinou bure. Teile süphaki Israel mai hrülai nou kra-a MAPAO hinou soukha sü kho-e.

³Samuel nou Israel maitao hisü paoe, “Neletao vei tsüle teitei nou peia MAPAO hi dakhai veloua vakou maivei rahtao, ae Ashtaroth vei basharatao sü thaokhai louzü, alia neletao vei hrü hai MAPAO hi peithou khaiwua puhye likhei tho bailouzü, puhnou neletaoye Philistin mai bah hinou vupa peilai.”

⁴Südonou Israel mainou Baal ae Ashtaroth basharatao sü thaokhaiwua MAPAO ye likhei tho-a baire.

⁵Süthaisü Samuel nou Israel mai hrülaiye Mizpah hi tave jülo tea kue, daiolouzü puhnou puletaoye donou MAPAO hi veachi paopeilai tea paosüta peie.

⁶Südonou Israel mai hrülai hai Mizpah hinou ve jüloure. Puletao nou dzü poloua MAPAO hi posheela soua lazü peie, ae süzhou teithe hai puletao nou ha toumoa lüh-e, alia puletao nou haibüa paoe, “Etao nou MAPAO nghoujü nou mah sü souwure.” (Samuel nou Mizpah hinou Israel maivei chilou khesü kupeiwe.)

⁷Israel mainou Mizpah hinou velou jüa bure touyu ko hai Philistin mainou sülou khaie, Philistin hi veo mai angou taonou Israel maiye reih soulai tea souda-a bure. Israel mainou ko haisü choulou khaie, ngaopi shore,

⁸ae puletao nou Samuel hi haibüa paoe, “Philistin mai bah hinou Etaoye vupa peire donou Etao Ramai MAPAO hi veachi paokhaio.”

⁹Südonou Samuel nou nao khomoyu zhaotu ali dathaloua MAPAO hi teitei nou poa meidei-a sheela peie, ae Samuel nou kra-a MAPAO hi veachi paoe, alia MAPAO nou puhvei veachi sü noupeie.

¹⁰Samuel nou meideia posheela peia buyu teile hisünou Philistin mainou Israel mai hisü reih hukoure, ana süzhou hai Philistin mai pei hisü MAPAO nou chishoyu kho sünou teisüyu büa puletao vei tsü sü souha peiwure, ae puletao hai bürarou poa Israel mai nghoujü nou tupo rarou tare.

¹¹Israel mainou Mizpah hinou tapa Philistin maiye hupoa Bethkar hi koute reih hukou peie.

¹²Süthaisü Samuel nou chuh ali poloua Mizpah ae Shen kohinou shola loue, ae haibüa paoe, “MAPAO nou Etaoye chu koute-a soukha peiwe,” südonou puhnou chuh sünasü “Soukha peiyu Chuh” tea zhih sapeie.

¹³Sübüa Israel mainou Philistin mai jünou reih veiloue, ae Samuel nou hria buyu koute hai MAPAO nou Philistin maiye panou Israel maivei teidei hi reih hulou moe.

¹⁴Philistin mainou Israel mai hinou polouyu nuhdutao, Ekron ae Gath kohinou buyu teitei sü Israel mainou podakhai loure. Alia Israel mai ae Kanaan mai-a koa kaona-a nou hrüe.

¹⁵Samuel nou hria buyu koute hai puhnou Israel maiye khosa-a hrüpeie.

¹⁶Puhnou po patsü hai Bethel, Gilgal, ae Mizpah, alia buh kukhe hia tasühao poa nou maikhe maivei chilou khesü kupeie.

¹⁷Süthaisü puhnou buyu Ramah nuhdu hi dakhai ve bue, ae puhnou buyu buh hia maikhe maivei chilou khesü kupeiwe. Ramah nuhdu hinou puhnou MAPAO ye posheelabu ali soushu peie.