Read Punu Dibandu 1 Bible Online

Dibandu 1 - Punu bible

Dibandu 1

¹Ava Nsambi amasundila julu na tsi,

²tsi jimaba tindi vumbila; pisama jimagumba mubu agumabanganga yiari na yiari tumba Yinyunyi ayiruyili ombu Nsambi amafundulanga mamba.

³Nsambi amavosa rie: Yijalala yibi! Na yijalala yimaba.

⁴Nsambi amalaba yiri yijalala yivu yiboti na amakakasana yijalala na pisama.

⁵Nsambi amaluga yijalala nyangu na amaluga pisama mukolu. Vamaba tsisiga mbana vamaba kedi: la yilumbu yitega.

⁶Nsambi amavosa rie: Vabi yima yigala ayiugaga mamba, ayiukakasana mamba na mamba.

⁷Nsambi amayivaga ukakasana mamba amavu o tsi yionyi na mamba amavu o julu yionyi. Anana dionyi dimabila.

⁸Nsambi amayiluga julu. Vamaba tsisiga mbana vamaba kedi: la yilumbu yimubeji.

⁹Nsambi amavosa rie: Mamba amavu o tsi julu magukimi va mosi na ukamuga ulabini. Anana dionyi dimabila.

¹⁰Nsambi amaluga ukamuga ueni butamba, amaluga diguki dieni dimamba mubu. Nsambi amalaba yiri adina dimaba diboti.

¹¹Mbana Nsambi amavosa rie: Butamba bubendisi bivaru abiburi biguji biminongu na minongu na miri amiburi milunda miminongu na minongu. Anana dionyi dimabila.

¹²Butamba bumabendisa bivaru abimabura biguji biminongu na minongu na miri amimabura milunda miminongu na minongu. Nsambi amalaba dionyi dimaba diboti.

¹³Vamaba tsisiga mbana vamaba kedi: la yilumbu yimurieru.

¹⁴Nsambi amavosa rie: Bijalala bibangingi o julu ukakasana nyangu na mukolu, dionyi diuba bilimba abiutabula temu tsibafeta nesi bilumbu nesi bilima;

¹⁵na bionyi biuba bijalala bijulu abiumonitsa tsi. Anana dionyi dimabila.

¹⁶Nsambi amavaga bijalala bibeji bineni: yijalala ayiviolila uroga la wisi uruma nyangu na yijalala ayigeyi la tsungi uruma mukolu na amavaga bambuelili wandi.

¹⁷Nsambi amabinamiga o julu umonitsa tsi,

¹⁸uruma nyangu na mukolu, na ukakasana yijalala na pisama. Amalaba dionyi dimaba diboti.

¹⁹Vamaba tsisiga mbana vamaba kedi: la yilumbu yimuina.

²⁰Nsambi amavosa rie: Mamba mafunisingi nyama tsimamba tsiminongu na minongu na batsoli babasi julu jiotsu.

²¹Nsambi amasunda tindi mikuimbi mimubu, na nyama tsimamba tsiminongu na minongu Amalaba dionyi dimaba diboti.

²²Nsambi amagabila nyama tsimamba na batsoli miula novosa rie: Biotsu abivu mu mamba bifuni ne te na miubu miubasa; na batsoli bafuni vava tsi.

²³Vamaba tsisiga mbana vamaba kedi: la yilumbu yimuranu.

²⁴Nsambi amavosa rie: Bibulu biminongu na minongu biburisini vana tsi: nesi biruitsi nesi bilandila nesi bibulu bimusiru biminongu na minongu. Anana dionyi dimabila.

²⁵Nsambi amavaga bibulu biminongu na minongu: nesi biruitsi nesi bibulu bimusiru nesi bilandila biminongu na minongu. Amalaba dionyi dimaba diboti.

²⁶Mbana Nsambi amavosa rie: Tuvayianu dibaala mu yikebutsu yietu nesi yibagunu yietu na akelisingi nyama tsimamba, nesi batsoli nesi bibulu nesi bilandila bitsi jiotsu.

²⁷Nsambi amasunda mutu mu yikebutsu yiandi, amamusunda mu yikebutsu yiNsambi, amasunda dibaala na mugetu.

²⁸Nsambi amabagabila miula na amabatsingula rie: Funanu na burasananu, basanu butamba de na barumianu, banu bafumu banyama tsimamba nesi batsoli nesi bibulu biminongu na minongu.

²⁹Nsambi amamuevosa rie: Nyiduveyi bivaru biotsu abiburi biguji biminongu na minongu; abina biuba biguji bienu.

³⁰Ombu bibulu biotsu bimusiru na batsoli botsu na biotsu abilingi va butamba, diwendi rie: biotsu abivu monyu nyubivega biriri abiuba biguji biogu. Adina amavaga.

³¹Nsambi amagengila motsu ama amavaga. Amalaba mamaba tindi maboti. Vamaba tsisiga mbana vamaba kedi: la yilumbu yimusiamunu.