Read Punu Dibandu 12 Bible Online

Dibandu 12 - Punu bible

Dibandu 12

¹Fumu amatsingula Abram rie: Sila bulongu buagu na mukuta agu na ndagu taji agu, wenda o bulongu abu nyugulonsa.

²Nyufunisa bategula bagu te na boba tindi dilongu na nyugugabila miula; nyuroyisa diina diagu na bapuela bosalisa diina diagu ugabila basusu miula.

³Jogu abogugabila miula, nyubagabila miula, jogu aboguloga, nyubaloga. Mikuta miotsu va butamba miugabulu miula mu diambu diagu.

⁴Abram amasogama nana Fumu amamutsingulila, Lot amawenda nandi. Ava Abram amarambuyila o Haran amaba na magumidusambuali na bilima biranu.

⁵Abram amabonga Sarai mugatsi andi na Lot muana katsi andi na biotsu abimaba nogu na baviga aba amadila o Haran na bamawenda o bulongu buCanaan. Banotola o bulongu buCanaan,

⁶Abram amayenalinganga te na amatola o mbura ajinengulungu Sichem, o yiari yimuiri uyingitsi uMore. Va temu eni bisi Canaan bamatsananga o bulongu bueni.

⁷Fumu amalabana na Abram na amavosa nandi rie: Nyuvega bulongu buebubu ombu bategula bagu. Abram amarungila Fumu yinyensulu yipagu vana mbura eni aji Fumu amalabinina nandi.

⁸Amagusuga vana uwenda o mikongu amimaba o yiari ayi wisi epalili yiBethel. Avana amavayila mulaku andi va gari musiengi uBethel agumaba o yiari ayi wisi ewendisini na musiengi uAi agumaba o yiari ayi wisi epalili. Avana wandi amamuerungila yinyensulu yipagu yisusu na ava amasambilila Nsambi amamunengila Fumu.

⁹Abram amayenakumuganga milaku uwenda o yiari yiNeguev.

¹⁰Dungosu dunsala dumaba mu bulongu; Abram amawenda uyetsana o Egypte mu mbari dungosu dunsala dumaba duneni mu bulongu.

¹¹Ava amabambinina na Egypte amatsingula mugatsi andi Sarai rie: Diurungula uba yiri bogupatula mu diambu diubueji uagu.

¹²Kabogu ava bisi Egypte bogulabila bovosa rie: Aguna mugatsi andi! Mbana bomboka na guba mukuili.

¹³Kokolu tsiagu gukavosa yiri guji yibusi yiami, mbana nyukelusu buranga na mu diambu diagu nyuba sui.

¹⁴Ava Abram amatolila o Egypte, bisi Egypte bamalaba yiri mugatsi andi amaba tindi uboti.

¹⁵Baneni abamasala o ndagu Pharaon banomulaba bamamukakisa ombu Pharaon; kabogu mugetu eni amabegu o ndagu kaga.

¹⁶Bamakelisa Abram buranga mu diambu diandi, Abram amadila bindombu na bangombi na baburu na baviga bababaala na babagetu na bibusi bibaburu na bibasamo.

¹⁷Tumba Fumu amalasa Pharaon na bisi ndagu andi maguga maneni mu diambu diSarai mugatsi Abram.

¹⁸Mbana Pharaon amanengila Abram nomuwivula rie: Yina yi? Dibandu yi gusamansingulila yiri avu mugatsi agu?

¹⁹Dibandu yi gumavosila rie: Aji yibusi yiami? Yika tsie, mbe nyimamuwela? Tsie bonga mugatsi agu yenawendanganu!

²⁰Pharaon amaruma batu bandi umuganina, kabogu bamayemuvetsiga na mugatsi andi na biotsu abimaba nandi.