Read Punu Dibandu 15 Bible Online

Dibandu 15 - Punu bible

Dibandu 15

¹Mambu meni manovioga Mbembu Fumu jimamuetsingulu Abram mu yiriariamu rie: Abram guyalabanga keri; nyiji ngubu agu, yisaku yiagu yiuba yineni.

²Abram amawivula rie: Fumu Nsambi ami, yisaku yi gupega? Yika ufu nyifu na te na namunyi ngaa na baana yika Eliezer muisi Damas aguvu na musuga ubialila bima biami.

³Mbana Abram amavosa rie: Kokolu gusamapega baana kabogu jandi agumaburu musalitsi o ndagu ami obialila disiala diami.

⁴Mbana Nsambi amamutsingula rie: Tsiri jandi agubialila disiala diagu, tumba muana dibaala agu ndeʼ beni gubura odibialila.

⁵Amapalisa Abram va gusu kana novosa nandi rie: Gengilao julu, tala bambuelili, tsie gurungula ubatala? Na amamutsingula rie: Anana bategula bagu bofuninanga.

⁶Abram amavayila Fumu yitu; mu yionyi Fumu amamulaba asungama.

⁷Fumu amamuemutsingula rie: Menu la Fumu agumagupalisa o Our o bulongu buBabylonie uyigudilisa bulongu buebubu.

⁸Abram amawivula rie: Fumu Nsambi ami, yilimba yi yiunjabisa yiri nyubudila?

⁹Fumu amamutsingula rie: Bonga muana-ngombi agukavu bilima birieru, na yinsabi ayikavu bilima birieru na dikunda dimosi na dibembi dimosi.

¹⁰Abram amabonga bibulu bieni biotsu amabitabula bibuku bibeʼ bibeji na amayenabibambasana tumba asamatabula batsoli.

¹¹Miletsi mimalevikana bibindi tumba Abram amamibinga.

¹²Ava tsisiga Abram amawenda tindi yilu yineni; goma jimamugaanga na pisama jineni jimamugumba.

¹³Fumu amatsingula Abram rie: Jaba yiri bategula bagu boba benyi o bulongu bungana; boba baviga na bolasu maguga te na kama jina tsibilima.

¹⁴Tumba nyutabulila bisi bulongu abobalasa maguga bunsonsi, mbana bategula bagu bopala na busina buneni.

¹⁵Mbe ka ndeʼ gununa na gulabanga nsangu na dufu duagu dugoba na mambu.

¹⁶Ava bategula bagu botofila o dukula dumuina bogabuga gunu. Je mabi mabaAmor magodugu?

¹⁷Wisi unotsima vamaba tindi pisama, muji uneni umasundila ulabana agumapalisa nsumbili; yitutu yimuji yimayenavioganga va gari milonga mibibuku bibibulu abimatabulu.

¹⁸Muna yilumbu yieni Fumu amavangana pangini na Abram rie: Nyiveyi bulongu buebubu ombu bategula bagu, ubandila o mujamba uEgypte te no mujamba uneni aguinengulungu Euphrate,

¹⁹na bulongu bubaQueni na bubaQuenizi na bubaQuadmoni,

²⁰na bubaHitt na bubaPerezie na bubaRefaim,

²¹na bubaAmor na bubaCanaan na bubaGuirgachie na bubaJebusie.