Read Punu Dibandu 17 Bible Online

Dibandu 17 - Punu bible

Dibandu 17

¹Ava Abram amadugusulu magumidufu na yifu yibilima Fumu amalabana nandi na amamutsingula rie: Menu la Nsambi aguvu na mangolu motsu. Fubana murima nami noba usungama va gusu ami.

²Uvangana nyivangini pangini nagu na nyufunisa bategula bagu.

³Abram amagudama va tsi na Nsambi amabuesa rie:

⁴Gulu pangini aji nyivangini nagu. Ndeʼ guvu kaga jibatu bapuela.

⁵Gugomuenengulungu Abram tumba diina diagu diuba yika Abraham mu mbari nyuguvaga kaga jibatu bapuela.

⁶Nyufunisanga bategula bagu te na boba malongu na bamosi boba bakaga wandi.

⁷Nyukelisanga pangini nagu na bategula bagu wandi te na kula tsiogu tsiotsu: ajina jiuba pangini jimutubu mu jionyi nyubanganga Nsambi ogu nesi te na bategula bogu.

⁸Bulongu abu ndeʼ guitsanini nderi muenyi nyubuvega mutubu ombu gagu nombu bategula bagu. Nyuba Nsambi ogu o bulongu buCanaan.

⁹Nsambi amatsingula Abraham rie: Mbe ka ndeʼ jenu na bategula bagu dukelisanga pangini ami te na kula tsiotsu.

¹⁰Yilimba ayiundasa yiri guikelisi pangini ami, jenu na bategula bagu ayiyi: muana dibaala uotsu orebu.

¹¹Jenu durebungu; adina diuba yilimba yipangini va gari jetu nenu.

¹²Mutubu na mutubu muana uotsu udibaala ava odugusulu yinana yibilumbu orebu: ne abamaburulu o ndagu agu, ne abamasumbu na mbongu tsiagu ne muana dibaala umuenyi agugaa muisi dilongu diagu.

¹³Muviga uotsu vengu orebu ne agumaburulu o ndagu agu ne agumasumbu na mbongu wandi, yiri pangini ami jiulabinina mu nyuru tsienu te na mutubu,

¹⁴tumba dibaala adisarebu opalusu va gati batu bandi, diwendi rie: aboku; mu mbari amabunsa pangini ami.

¹⁵Nsambi amatsingula Abraham rie: Guyamuenengilanga mugatsi agu Sarai, diina diandi diuba yika Sara.

¹⁶Nyumugabila miula na jandi oguburila muana dibaala. Nyumugabila miula na oba kaga jibatu bapuela na bamosi va gari bategula bandi boba bakaga wandi.

¹⁷Abraham amagudama noreka mbana amakewivula rie: Mutu aguvu na kama bilima omuebura muana? Na Sara agukavu na magumidufu mabilima omuebura?

¹⁸Abraham amatsingula Nsambi rie: Aa mbe Ismael obanguga va misu magu!

¹⁹Nsambi amamuwaka rie: Tsiri nana, mugatsi agu Sara oguburila muana dibaala, gumuluga Isaac. Nyuvangana pangini mutubu nandi ajiukelusungu te na bategula bandi.

²⁰Nyiina, nyimagulu wandi diambu diIsmael. Nyumugabila miula: nyumuvega mangolu uburanga na nyumufunisanga; obura yigumi na baana bakaga babeji na oba kaga jibatu bapuela.

²¹Tumba tindi pangini ami jivu na Isaac agu Sara oguburila va temu ajiji mu yilima ayiuruga.

²²Nsambi anomana uvosa na Abraham bamakakana.

²³Muna yilumbu yieni Abraham na muana andi Ismael na botsu abamaburulu o ndagu andi na botsu abamasumbu na mbongu tsiandi, diwendi rie: babaala botsu abamaba o ndagu andi bamarebu. Botsu bamarebu udugusu diruma diNsambi.

²⁴Abraham amaba na magumidufu na yifu yibilima ava amarebulu.

²⁵Muana andi Ismael amaba nayigumi na bilima birieru ava amarebulu.

²⁶Muna yilumbu yieni ayi Abraham amarebulu, muana andi udibaala Ismael amarebu wandi.

²⁷Babaala botsu abamaba o ndagu andi, ne abamaburulu o ndagu andi ne abamasumbu na mbongu tsiandi ne benyi bamarebu va mosi nandi.