Read Punu Dibandu 19 Bible Online

Dibandu 19 - Punu bible

Dibandu 19

¹Biansa bieni bibeji bimatola tsisiga o Sodome; Lot amaba atsana va dikotulu diSodome, ava Lot amabalabilila amayebabengusana na amagudama va tsi.

²Mbana amavosa rie: Fumu tsiami, nyiduwivuli rie: Kotanu o ndagu musalitsi enu nosilimina guna; susanu makulu; mbana pa duirondi dukawenda kedi jineni. Tumba jogu bamawagula rie: Nesi, tusilimina va dulombili.

³Tumba Lot amabatsotsa ukota o ndagu andi. Amabalambila mulambu na amalambisa mapa mageyi amagaa na dufunusu. Jogu bamaji.

⁴Mbe basakasilama ne usilama bisi Sodome bamayekanda ndagu; ubanda na bangebi te na bivunda bamayevikana guna.

⁵Bamanengila Lot nomuwivula rie: Batu abatsikota ombu gagu na mukolu baka? Bapalisi gunu yiri tufubana yitsiga nogu.

⁶Lot amapala va gusu kana na amadibiga yiabutsu mansinsima.

⁷Amavosa rie: Bambatsi bami nyidulembiyili rie: Kokolu tsienu duyavaga dibi!

⁸Guluanu, nyina baana babeji babagetu abavu batsiemi; nyubapalisa na dubavayila adi duirondi. Dimosi buandi duyavaga babaala bebaba diambu mu mbari baji benyi bami.

⁹Bamavosa rie: Gusuga! Bamabuesa rie: Ndeʼ aguvu muenyi guirondi uba nsonsi etu? Kabogu gulaba adi tuguvayila ne uviolila adi mbe tubavayila. Mbana na dikasi bamasindila Lot, bamavikasana na nsala ubula yiabutsu.

¹⁰Tumba babaala beni babeji bamasamba miogu na bamakotisa Lot o gari ndagu mbana bamadibiga yiabutsu.

¹¹Bamakalusa batu botsu abamaba va gusu kana bidunga, ubanda na bangebi te na bivunda, kabogu jogu beni bamalasasana maguga ava bamarombila yiabutsu.

¹²Babaala beni bamawivula Lot rie: Banyi bavu nagu vava? Guna baboji? Guna baana bababaala? Guna baana babagetu? Guna basusu? Bapalisi va musiengi egugu.

¹³Namapapa tubunga musiengi egugu mu mbari nduku bisi musiengi egugu tsimagulunu te nombu Fumu. La dibandu amaturumina uyigubunga.

¹⁴Lot amapala uyevosa na baboji bandi abamawela baana bandi babagetu rie: Tugusuyianu va musiengi egugu; Fumu ogubunga. Tumba baboji bandi bajnalaba yiri ukibisa ebakibisi.

¹⁵Ava matebugulu mawisi biansa bimasuka Lot novosa rie: Relama, bonga mugatsi agu na baana bagu babeji babagetu yiri dugofu ava musiengi egugu ubungulu.

¹⁶Anotsikadana bamamugaanga mu gogu na mugatsi andi na baana bandi babagetu; bamayenababega te na bamabapalisa va gusu kana musiengi mu mbari Fumu amaronda ubawaka kalala.

¹⁷Banomupalisa, umosi va gari ogu amamulubusa rie: Rina yiri gugofu, guyagengila o nsima agu, na guyasikama o kumu; rina o mukongu yiri gugofu.

¹⁸Lot amavosa nandi rie: Nesi, tsiri nana fumu ami.

¹⁹Nyimadila maboti ombu gagu na gumandasa yingeba tindi yingeba ava gumatinisila. Kokolu tsiagu, ngerondi urina o mukongu mu mbari avana nyufu wandi.

²⁰Labati vavu musiengi bebeli, aguna nyuyesuemina, uvu tindi ugeyi, aguna nyudilila monyu.

²¹Mbana Fumu amamutsingula rie: Nyigulu, nyumuegulasa yingeba. Ngobunga musiengi eni agu guivosi.

²²Lensa noyesuema guna mu mbari ngorungula uvaga ne diambu dimosi te na gumatola. La dibandu bamaluyila musiengi eni Soar.

²³Ava kedi Lot amatolila o Soar.

²⁴Mbana Fumu agumaba o julu amanoyisila Sodome na Gomorrhe mfula jifula na muji.

²⁵Jandi amabunga misiengi mieni mibeji na kumu jiotsu na bisi misiengi mieni na bivaru biotsu.

²⁶Mugatsi Lot anogengila o nsima amakituga yisama yimusayi.

²⁷Kedi jineni Abraham amagabuga o mbura aji amalebengunina na Fumu.

²⁸Amabuaga misu o yiari yiSodome na Gomorrhe na kumu jiotsu, amalaba nsumbili jineni ajimaronguganga nana nsumbili jikangi.

²⁹Ava Nsambi amabungila misiengi mi-kumu ami Lot amatsaninanga amakipanga Abraham na amasingisa Lot urina dubungu dueni.

³⁰Lot amagusuga o Soar amayetsana o julu mukongu na baana bandi babeji babagetu, mu mbari amalaba keri utsana o Soar; bamatsananga o gari dilima.

³¹Yilumbu yimosi yivunda amatsingula ngebi andi rie: Taji etu aka yinunu na vagaa babaala va mbura ejiji abotuwela nana bevayingi o malongu motsu.

³²Ruga tunuisi taji etu malamu te na olanga mbana tufubana yitsiga nandi na tudilila taji etu bategula.

³³Kabogu vana mukolu eni bamalansa taji ogu. Yivunda amakota na taji andi agusamajaba nesi dibundumunu vo disimbugulu dimuana andi.

³⁴Ava kedi yivunda amatsingula ngebi andi rie: Mukolu agutsivioga nsifubana yitsiga na taji ami. Tumuemulansa na mukolu egugu mbana ndeʼ wagu guyefubana yitsiga nandi na tudilila taji etu bategula.

³⁵Kabogu mukolu eni bamamuelansa taji ogu. Ngebi amayebundama nandi. Tumba taji asamajaba nesi dibundumunu vo disimbugulu dimuana andi.

³⁶Baana baLot botsu babeji bamadila mimi.

³⁷Yivunda amabura muana dibaala agu amaluga Moab: jandi avu kaga jibisi Moab botsu aba tuijabi te na namunyi.

³⁸Ngebi amabura muana dibaala wandi agu amaluga Ben-Ammi; jandi avu kaga jibisi Ammon aba tuijabi te na namunyi.