Read Punu Dibandu 21 Bible Online

Dibandu 21 - Punu bible

Dibandu 21

¹Fumu amakipa adi amatsingula Sara A na pangini aji amavangana nandi jimadugusu.

²Sara amadila dimi, ava bununu buandi amaburila Abraham muana dibaala va teinu aji Nsambi jaʼ beni amamutsingula.

³Abraham amaluga muana dibaala agu Sara amamuburila Isaac.

⁴Yilumbu yimunana, Abraham amareba muana andi Isaac nana Nsambi amamurumina.

⁵Abraham amaba na kama bilima ava muana andi Isaac amaburulu.

⁶Sara amavosa rie: Nsambi amatekisa na nsangu; batu botsu abogulu musamu egugu bosangila nami.

⁷Amabuela rie: Bowivula Abraham rie: Je Sara onuisa baana? Nyiina, nyimamuburila muana dibaala nesi va bununu buandi.

⁸Isaac amabanguga; ava amabusila mabenyi Abraham amalambisa mulambu uneni.

⁹Yilumbu yimosi Sara amalaba yiri Ismael muana udibaala agu Agar muisi Egypte amaburila Abraham, utumuna etumuni Isaac.

¹⁰Amaruma Abraham rie: Binga muviga egugu na muana andi udibaala mu mbari muana udibaala muviga egugu ayabialila va mosi na Isaac muana ami udibaala.

¹¹Posulu tsieni tsimanyongisa Abraham mu mbari Ismael amaba muana andi udibaala wandi.

¹²Tumba Nsambi amatsingula Abraham rie: Guyanyonga mu diambu dimuviga agu na muana andi udibaala. Vaga diotsu adi Sara evosi nagu, mu mbari Isaac oguburila bategula aba nyimavangana nagu.

¹³Nyuvaga muana dibaala umuviga agu dilongu wandi; jaʼ wandi avu muana agu udibaala.

¹⁴Abraham amarelama kedi jineni, amavega dipa na tsuva mamba ombu Agar. Amamunangusa muana udibaala o nsima mbana amamubinga. Agar amayenawenda na amayenatsiemuganga o kumu jiBercheba.

¹⁵Mamba amamaba mu tsuva manosuka, Agar amasila muana va tsi mua muiri,

¹⁶ama-yetsana nana vana na vava; amavosa rie: Ngerondi ulaba muana ami difuilu! Kabogu amakakana nandi na amalilanga.

¹⁷Nsambi amagulu muana dibaala ulila elili na yiansa yiNsambi ayimaba o julu amanengila Agar nomuwivula rie: Agar, diambu yi divu nagu? Guyalaba keri mu mbari Nsambi amagulu muana dibaala ulila elili va mbura aji avu.

¹⁸Relama yebonga muana udibaala nomureliga; nyumuvaga dilongu dineni.

¹⁹Nsambi amadibula misu maAgar na amalaba yiduna yimamba; amayebasa tsuva na mamba na amamanuisa muana.

²⁰Nsambi amaba na muana udibaala, anobanguga amatsananga o kumu na amabanganga murela uneni udupalu.

²¹Amatsananga o kumu jiParan, nguji andi amamuwelila mugetu umuisi Egypte.

²²Va temu eni Abimelek na Pikol, yivunda yidibadi bamarasuna Abraham na Abimelek amavosa nandi rie: Nsambi aji nagu mu motsu ama guivayingi.

²³Kabogu ndevili pesi mu diina diNsambi agu yiri gugotusoga diela ne menu ne baana bami ne bategula bami; nana nyimaguvayila maboti ndeʼ wagu gukakabusila maboti ava guitsanini mu bulongu buebubu.

²⁴Abraham amavosa rie: Nyujileva.

²⁵Abraham amasosisa Abimelek mu diambu diyiduna yimamba ayi basalitsi bandi bamapatulu.

²⁶Abimelek amawagula rie: Ngejabi agumavaga diambu dieni, gusamansingula diambu adina, yika namunyi nyidigulu.

²⁷Abraham amabonga bindombu na binsabi na bangombi abi amavega Abimelek; jogu babeji bamavangana pangini.

²⁸Abraham amasola yisambuali yibaana babindombu.

²⁹Abimelek amawivula Abraham rie: Yi guivayi na yisambuali yibaana babindombu aba gutsisola?

³⁰Abraham amawagula rie: Bisingi nana yilimba ulasa yiri meʼ beni nyimatima yiduna yieni yimamba.

³¹La dibandu mbura eni jinengulungu Bercheba, mu mbari avana bamavanginina pangini.

³²0 Bercheba bamavanginina pangini. Va julu vana Abimelek na Pikol agumaba yivunda yidibadi diandi bamarelama, bamayenagabuga o bulongu bubaPhilistin.

³³Abraham amavara mitamarisaka o Bercheba; avana amasambilila Nsambi, amamunengila Fumu.

³⁴Abraham amatsinga tindi utsinga o bulongu bubaPhilistin.