Read Punu Dibandu 24 Bible Online

Dibandu 24 - Punu bible

Dibandu 24

¹Abraham amanuna tindi ununa na Fumu amamugabilanga miula mu mambu motsu.

²Yilumbu yimosi Abraham amatsingula yivunda yibasalitsi bandi agumaba mukelisi ubima biandi biotsu rie: Vangana pangini nami,

³na jiwarisi na pesi jidiina diFumu, Nsambi julu na butamba, yiri gugowelila muana ami mugatsi va gari banumba baCanaan agu nyitsanini,

⁴tumba wenda o bulongu buami o yiari yiami uyewelila muana ami Isaac mugatsi.

⁵Musalitsi amamuwagula rie: Tanguji mugetu agogaru uruga nami o bulongu buebubu, je nyurungula ubega muana agu o bulongu abu gumapalila?

⁶Abraham amamuwagula rie: Tsatsabi: Guyabega muana ami udibaala guna!

⁷Fumu Nsambi aguvu o julu, agumapalisa o ndagu taji ami na o bulongu buami amavangana nami na amajiwarisa na pesi; amavosa rie: Nyuvega bategula bagu bulongu buebubu. Jaʼ beni osindiga yiansa yiandi o gusu agu; aguna guyawelila muana ami udibaala mugatsi.

⁸Pa mugetu agerondi uruga nagu diambu digomueba va julu muru agu gumadugusu pangini; viaga, guyabega muana ami guna.

⁹Musalitsi amavangana pangini na fumu andi Abraham na amajiwarisa na pesi rie: Nyudugusu mambu meni motsu.

¹⁰Musalitsi amabonga yigumi yisamo tsifumu andi, mbana amayenawenda na biboti bifumu andi. Anorelama amasogama uwenda o Mesopotamie o musiengi uNahor.

¹¹Anotola o tsomu dimbu bebeli na yiduna yimamba amasikiga basamo. Dimaba diweru ditsisiga va temu aji bagetu beyeteganga mamba.

¹²Jandi amasambila rie: Fumu, Nsambi fumu ami Abraham, kululuati, payili adi nyirondi namunyi, vayila fumu ami Abraham diboti!

¹³Laba nyivu va mugula yiduna yimamba, namapapa banumba bamusiengi boruganga uyitega mamba.

¹⁴Numba aji nyuvonda rie: Kokolu peyi mua mamba! Jaʼ beni akawagula rie: Nu, na nyunuisa basamo bagu wandi! Jandi oba numba aji gumasolila musalitsi agu Isaac! Mbana nyujaba yiri gumavayila fumu ami diboti.

¹⁵Mbe asakamana usambila, Rebecca muana mugetu uBetouel muana dibaala uMilka musalitsi Nahor muana nguji Abraham, amaruga na yitegulu yiandi va disambaka.

¹⁶Amaba tindi muboti na amaba tsiemi. Amasunduga o yiduna yimamba, amabasa yitegulu yiandi mbana amasabuga.

¹⁷Musalitsi Abraham amamubengusana na amamuvonda rie: Kokolu, peyi mua mamba monu.

¹⁸Amawagula rie: Nu, fumu ami. Amasundila umuwakisa yitegulu yiandi nomu vega mamba monu.

¹⁹Anomana umu vega mamba monu amabuela rie: Nyuteyila basamo bagu wandi te na botsu bonu.

²⁰Amawitila yitegulu yiandi mu yinuinu yibibulu na amamuewenda mbangu uyetega mamba; amateyila basamo botsu.

²¹Musalitsi eni amamugengila yisuisu tsiri uvosa diambu, amaviva ujaba yeri Fumu amabuejisa mulingu andi.

²²Basamo banomana unu, musalitsi amabonga moru ulora (utsira u-uonyi umaba garama yisiamunu) na milunga mibeji (utsira umionyi umaba kama garama).

²³Mbana ama-muwivula rie: Ndeʼ muana nyi? Nsinguliati! Kokolu va mbura usilimina o ndagu taji agu?

²⁴Amavosa rie: Menu muana Betouel muana dibaala uMilka na Nahor.

²⁵Amabuela rie: Ombu getu biguji bibibulu bivu ne uviolila na vavu mbura usilimina wandi.

²⁶Mbana musalitsi eni amagudama va tsi va gusu Fumu,

²⁷amasambila rie: Diboti ombu Fumu aguvu Nsambi fumu ami Abraham, jandi amalasa tindi maboti mandi ombu fumu ami! Va julu vana Fumu amambeganga te no ndagu biburu bifumu ami.

²⁸Amawenda mbangu o ndagu nguji andi uyebatsingula mambu meni motsu.

²⁹Kabogu Rebecca amaba na muana nguji udibaala, diina diandi Laban. Laban amawenda mbangu uyerasuna dibaala dieni o yiduna yimamba.

³⁰Yiotsu ayi Laban amalabila moru na milunga amimaba mu miogu miyibusi yiandi nogulu posulu tsidibaala dieni amamurasuna va mugula basamo o yiari yiyiduna yimamba.

³¹Laban amavosa rie: Tʼwendi, ndeʼ aguvu na miula miFumu! Dibandu yi gusialila va gusu kana? Nyimagukunsila ndagu nesi mbura jibasamo.

³²Musalitsi Abraham amatola o ndagu ogu; Laban amasundusa basamo mifuna na amabalisila mbana amavega batu botsu mamba ususa makulu.

³³Mbana amamugabila biguji tumba amavosa rie: Ngoleji te na nyuvosa adivu nami. Laban amavosa rie: Ka vosa!

³⁴Kabogu amawaka rie: Nyivu musalitsi uAbraham.

³⁵Fumu amamuviosulila miula te na fumu ami avu yisina yineni. Amamuvega bindombu na binsabi na bangombi na lora jivema na lora na basalitsi bababaala na babagetu na basamo na baburu.

³⁶Sara, mugatsi fumu ami nesi mu bununu buandi, amaburila fumu ami muana udibaala, fumu ami amawakisa muana eni biandi biotsu.

³⁷Fumu ami amandevisa pesi ava amavosila rie: Guyawelila muana ami mugatsi va gari banumba baCanaan, agu nyitsanini,

³⁸tumba wenda o bulongu buami nombu taji ami nombu yifumba yiami noyewelila muana ami mugatsi.

³⁹Nyimatsingula fumu ami rie: Tanguji mugetu agogaru uruga.

⁴⁰Amawagula rie: Fumu oyilingingi nami osindiga yiansa yiandi o gusu agu nobuejisa mulingu agu, gukayewelila muana ami mugatsi mu yifumba yiami, sinsa viri o ndagu taji ami.

⁴¹Yiotsu ayi gumayelabana na yifumba yiami diambu digoba va julu muru agu; pa bagedisingi digomueba va julu muru agu gumadugusu pangini.

⁴²Namunyi nsitola o yiduna yimamba na nsisambila rie: Fumu, Nsambi fumu ami Abraham, pa guisingi ubuejisa mulingu ami,

⁴³laba nyivu va mugula yiduna yimamba, numba ajiuruga uyitega mamba aji nyuvonda rie: Kokolu, peyi mua mamba monu

⁴⁴na jandi okwagula rie: Nu, na nyunuisa basamo bagu wandi, jandi oba mugatsi agu Fumu amasolila muana dibaala ufumu ami!

⁴⁵Mbe nyisakamana usambila o tsi murima ami, Rebecca atsilabana na yitegulu yiandi va disambaka; atsisunduga o yiduna yimamba na atsitega mamba. Nsimuvonda rie: Kokolu, peyi mua mamba monu.

⁴⁶Atsisunda udiamisa yitegulu yiandi ayibetsi va disambaka na atsivosa rie: Nu, na nyunuisa basamo bagu wandi. Nsinu na atsinuisa basamo bami wandi.

⁴⁷Nsimuwivula rie: Ndeʼ muana nyi? Atsikwagula rie: Menu muana Betouel muana dibaala uNahor na Milka. Nsimuduisa moru mu mbasu na milunga mu miogu miandi.

⁴⁸Mbana nsigeluga na nsigudama va gusu Fumu na nsigabusila Fumu aguvu Nsambi fumu ami Abraham diboti! Nsimugabusila diboti mu mbari amakwendisa na buranga te na nyimadilila muana udibaala ufumu ami mugatsi agu nyumubeyila.

⁴⁹Pa duirondi usinga diambu diedidi nondasa ubueji namunyi nsingulianu; pa dugerondi usingulianu wandi, mbana nyuyenakumanga yiari na yiari.

⁵⁰Laban na Betouel bamawagula rie: Diambu diedidi diruyili ombu Fumu, jetu tugowaka yiri divu diwelimina vo digaa diwelimina.

⁵¹Rebecca jandi guna, mubongi yenawendanganu. Abi mugatsi umuana dibaala ufumu agu nana Fumu amavosila.

⁵²Musalitsi Abraham anogulu kabusulu tsiogu amagudama va tsi va gusu Fumu.

⁵³Mbana amapalisa bima bilora jivema na bilora na biduaru abi amavega Rebecca; na amavega muana nguji andi na nguji andi madila mapuela wandi.

⁵⁴Motsu mana manovioga musalitsi Abraham na batu bandi bamaji na bamanu; mbana bamasilama. Ava kedi musalitsi Abraham amavosa na muana nguji na nguji Rebecca rie: Kabusianu ombu fumu ami.

⁵⁵Bamamuwaka rie: Muana aletsana mua temu netu, nesi yigumi yibilumbu mbana gukayenawenda.

⁵⁶Amabawagula rie: Duyansinsa mu mbari Fumu amabuejisa mulingu ami; kabusianu uyenawenda ombu fumu ami.

⁵⁷Mbana bamawagula rie: Tunengilianu muana, tukamuwivulanu ditasa diandi.

⁵⁸Kobogu bamanengila Rebecca na bamamuwivula rie: Guirondi uwenda na dibaala diedidi? Amawagula rie: Nyiina.

⁵⁹Mbana bamawensa Rebecca na ndetsi andi, bamayenawenda na musalitsi uAbraham na batu bandi.

⁶⁰Bamagabila Rebecca miula na bamamutsingula rie: Aa yibusi yietu, ndeʼ gubanganga nguji jibivevi bibatosini; bategula bagu boba balungitsi tsiri abamabetsu.

⁶¹Rebecca na basalitsi bandi babagetu bamanangama mu basamo na bamasogama va mosi na musalitsi uAbraham.

⁶²Isaac amaruyila o yiduna yimamba ayinengulungu Lahai-Roi agu amatsaninanga o yiari yiNeguev.

⁶³Tsisiga mosi Isaac amayenalinganga o kumu na anobuaga misu amalabilila basamo uruga beruyi.

⁶⁴Rebecca wandi amabuaga misu, amalabilila Isaac na amasunduga mu samo.

⁶⁵Amawivula musalitsi rie: Dibaala oyilingi o kumu, anyi? Musalitsi amawagula rie: Aguna fumu ami. Kabogu amabonga tsanda ukegumba yinsi.

⁶⁶Musalitsi amatsingula Isaac mambu motsu ama amavaganga.

⁶⁷Isaac amabega Rebecca o ndagu jitsanda jinguji andi Sara; amakotisa Rebecca na amamuronda tindi uronda. Anana Isaac amabembugulu nguji andi anofu.