Read Punu Dibandu 26 Bible Online

Dibandu 26 - Punu bible

Dibandu 26

¹Wamaba dungosu dunsala dususu mu bulongu, tsiri adumaba va temu Abraham kabogu Isaac amawenda ombu Abimelek kaga jibaPhilistin o Guerar.

²Fumu amalabana na Isaac na amavosa rie: Guyawenda o Egypte, gukayetsana o bulongu abu nyugulonsa.

³Tsana o bulongu buebubu; nyuba nagu na nyugugabila miula; nyuvega biari biebibi biotsu ombu gagu nombu bategula bagu na nyukelisanga pangini aji nyimavangana na taji agu Abraham.

⁴Nyufunisa bategula bagu te na boba nderi bambuelili; nyuvega biari biebibi biotsu ombu bategula bagu na malongu motsu mogabulu miula mu diambu diagu,

⁵mu mbari Abraham amadedila diufi diami na amakelisa malongi mami na amadedila manima mami na migaga miami miminongu na minongu.

⁶Isaac amatsaninanga o Guerar.

⁷Ava bisi mbura eni bamawivulilanga bivu mu diambu dimugatsi andi amawakanga rie: Aguna yibusi yiami. Amalabakeri uvosa yiri avu mugatsi ami mu mbari bisi mbura eni bakemuboka; Rebecca amaba tindi muboti.

⁸Anotsinga guna dimalabana yiri Abimelek kaga jibaPhilistin amagengila va fenetera; amalabilila Isaac agumasanisa mugatsi andi Rebecca.

⁹Abimelek amanengila Isaac na amavosa rie: Kabogu aguna aji mugatsi agu! Dibandu yi gutsivosila rie: Aguna yibusi yiami? Isaac amawaka rie: Nyimawagula nana mu mbari nyimatasa nyuboku mu diambu diandi.

¹⁰Abimelek amawivula rie: Ayina yi? Mbe ne mutu mosi amafubana yitsiga na mugatsi agu mbe gutuvega mbela.

¹¹Mbana Abimelek amaruma rie: Uotsu agufubana yitsiga na dibaala diedidi vo na mugatsi andi aboku.

¹²Isaac amavara o bulongu bueni na muna yilima yieni amadila kama kama mu mbari Fumu amamugabila miula.

¹³Bima biandi bimafunanga te na amaba tindi yisina.

¹⁴Amaba na migamba mibindombu na mibinsabi na mibangombi va julu vana dutalu duneni dubasalitsi. BaPhilistin bamawava Isaac.

¹⁵Kabogu bamagulasana biduna biotsu bimamba abi basalitsi bataji andi Abraham bamatima.

¹⁶Abimelek amatsingula Isaac rie: Busina buagu na mangolu magu bimaviolila, gusuga vava.

¹⁷Isaac amagusuga vana amayevaga milaku o yibususu yiGuerar.

¹⁸Isaac amatimunina biduna bimamba abimatimu va temu taji andi Abraham abi baPhilistin bamagulasana yiotsu ayi Abraham amafuila. Isaac amabilugulila miina ama taji andi amabiluga.

¹⁹Yilumbu yimosi basalitsi balsaac bamamuetima yiduna o yibususu na bamadila yileka yimamba.

²⁰Babungulitsi babindombu baGuerar bamatsundisa babungulitsi babindombu balsaac rie: Mamba ametu. Isaac amaluga yiduna yieni yimamba Essec, mu mbari bamatsunda nandi.

²¹Basalitsi bandi bamatima yiduna yisusu yimamba, bamamuetsundila mu yionyi wandi; amayiluga Sitna.

²²Amagusuga vana na amatima yiduna yisusu yimamba ayi basamatsundila; amayiluga Rehobot, mu mbari amavosa rie: Fumu amatujeyisa na tufunanga.

²³Bamarambuga vana bamayenawenda o Bercheba.

²⁴Mukolu eni Fumu amalabana na lsaac na amavosa rie: Menu laNsambi taji agu Abraham; guyalaba keri mu mbari nyiji nagu; nyugugabila miula na nyufunisa bategula bagu mu diambu dimusalitsi ami Abraham.

²⁵Amarunga yinyensulu yipagu vana na amasambila mu diina diFumu na amarangiga ndagu andi, jitsanda vana. Basalitsi balsaac bamatima yiduna yimamba yisusu.

²⁶Abimelek amarambuyila o Guerar amawenda ombu Isaac, jogu na batu nandi Ahouzat na Pikol agumaba yivunda yidibadi diandi.

²⁷Isaac amabawivula rie: Dibandu yi duiruyili ombu gami, jenu duipini. Tsia dumambinga o yiari yienu?

²⁸Bamawaka rie: Tuilabi yiri Fumu aji nagu. La dibandu tuivosili rie: Tuvangana pangini nagu nojiwarisa na pesi.

²⁹Leva yiri gugotuvaga ne dibi dimosi nana jetu tusamagulasila maguga; tumaguvaga yika maboti na maboti na tumaguwensa na polu. Dingensa gumagabulu miula miFumu.

³⁰Isaac amabalambila mulambu uneni mbana bamaji na bamanu.

³¹Ava kedi bamalevasana pesi. Isaac amabaganina na jogu bamayenawenda na polu.

³²Muna yilumbu yieni basalitsi balsaac bamawenda uyemutsingula mu diambu diyiduna yimamba ayi bamatimanga, bamavosa rie: Tumadila mamba.

³³Bamayiluga Chiba. La dibandu musiengi eni guinengulungu Bercheba te na namunyi.

³⁴Ava Esau amabila magumana mabilima amawela bagatsi: Yehoudit, muana mugetu uBeri na Basmat, muana mugetu uElon.

³⁵Isaac na Rebecca bamanyonganga mu diambu dibagetu beni.