Read Punu Dibandu 29 Bible Online

Dibandu 29 - Punu bible

Dibandu 29

¹Jacob amasogama, amawenda o yiari ayi wisi epalili.

²Mbe asakatola o dimbu amalabilila yiduna yimamba. Migamba mirieru mibindombu na binsabi mimasilama yiari na yiari biyionyi, avana bamanuisilanga migamba. Dimanyi dineni dimadibiga yiduna yimamba.

³Nana yifu yiogu yimabila migamba miotsu mimalebengunanga vana mbana babungulitsi babindombu bamagusulanga dimanyi va julu yiduna yimamba unuisanga migamba; mbana bamadigabusanga va yiduna yimamba.

⁴Jacob amawivula babungulitsi babindombu rie: Bambatsi bami, aguʼ duiruyisini? Bamawagula rie: O Haran.

⁵Amabawivula rie: Duijabi Laban muana dibaala uNahor? Bamawagula rie: Nyiina, tuimujabi.

⁶Amabawivula rie: Aji buranga? Bamawagula rie: Nyiina, aji buranga, laba muana andi Rachel uruga eruyi na bindombu bitaji andi.

⁷Jacob amavosa rie: Tumba wisi yika muangulu, temu jisakatola ugukiga migamba; kabogu binuisianu mbana biwendingi uyenajanganga.

⁸Bamawagula rie: Tugorungula uvaga nana te na migamba miotsu miugukama; mbana babungulitsi bogusula dimanyi va julu yiduna yimamba na tunuisa migamba miotsu.

⁹Jacob uvosa mbe akivosa nogu, Rachel amaruga na mugamba ubindombu mu mbari amaba mubungulitsi migamba mitaji andi.

¹⁰Jacob amalaba Rachel na migamba miLaban, muana nguji unguji andi, kabogu amakueka nogusula dimanyi va julu yiduna yimamba na amanuisa migamba mimuana nguji unguji andi.

¹¹Jacob amabumba Rachel na amagamuga na nsangu.

¹²Jacob amatsingula Rachel yiri avu yiburu yitaji andi na yiri avu muana dibaala uRebecca. Rachel amawenda mbangu uyetsingula taji andi misamu mieni.

¹³Yika Laban egulu bevosi diambu diJacob muana dibaala uyibusi yiandi, amayemubengusana mbangu; amamubumba na amamufifa; amamubega o ndagu andi. Jacob amatsingula Laban misamu miandi miotsu.

¹⁴Laban amamutsingula rie: Dingensa ndeʼ guvu tindi muana katsi ami. Jacob amaletsana tsungi mosi ombu Laban.

¹⁵Yilumbu yimosi Laban amawivula Jacob rie: Gugofutu mu mbari guvu yiburu yiami? Nsinguli adivu diwelimina ugufuta.

¹⁶Kabogu Laban amaba na baana babeji babagetu: yivunda diina diandi Lea, ngebi diina diandi Rachel.

¹⁷Lea amaba na misu marekama; tumba Rachel amaba muboti, nesi diteli nesi yinsi.

¹⁸Jacob amarondanga Rachel kabogu amavosa rie: Nyugusalila yisambuali yibilima uwela Rachel muana agu ungebi.

¹⁹Laban amavosa rie: Uviolila ubueji umuwetsa nagu tsiri na dibaala disusu. Tsana nami.

²⁰Jacob amasala yisambuali yibilima uwela Rachel, bilima bieni bimalabana nderi mua bilumbu mu mbari amarondanga Rachel.

²¹Mbana Jacob amatsingula Laban rie: Peyi mugatsi ami, tuwelana mu mbari temu ami jimadugu.

²²Laban amabengusana bisi mbura eni botsu na amalambisa mulambu udiwela.

²³Ava tsisiga amabonga muana andi Lea amamuwakisa ombu Jacob; bamafubana yitsiga.

²⁴Laban amavega Zilpa uba muviga uLea.

²⁵Ava kedi Jacob amalaba Lea; mbana amawivula Laban rie: Diambu yi? Tsiri mu diambu diRachel nyimagusalila? Dibandu yi gumandiongila?

²⁶Laban amawagula rie: Anana yifu yietu yivu, yivunda oyireyili uwelu tsiri ngebi.

²⁷Lemana tsona ejiji, guyaboka diwela; tuguvega ngebi wandi pa gumuensalila yisambuali yibilima.

²⁸Adina Jacob amavaga, amalemana tsona na Lea mbana Laban amamuwetsa na muana andi Rachel.

²⁹Laban amavega Bila uba muviga uRachel.

³⁰Jacob amafubana yitsiga na Rachel na amamurondanga uviolila Lea; amamuesalila Laban yisambuali yibilima bisusu.

³¹Fumu amalaba yiri Lea asamarondungu; amamufunisa tumba. Rachel amaba yinguma.

³²Lea amadila dimi na amabura muana dibaala agu amaluga Ruben, amavosa rie: Fumu amalaba ukesunsa uami, mbana mulumi ami otondanga.

³³Amamuedila dimi na amabura muana dibaala, amavosa rie: Fumu amajaba yiri ngerondu la dibandu amamuepeyila muana dibaala. Amamuluga Simeon.

³⁴Amamuedila dimi na amabura muana dibaala na amavosa rie: Temu ejiji mulumi ami onamana nami; mu mbari nyimamuburila baana barieru bababaala. La dibandu Jacob amamuluyila Levi.

³⁵Amamuedila dimi na amabura muana dibaala, amavosa rie: Temu ejiji nyuyitsanga Fumu. La dibandu amamuluyila Juda. Na asamamuebura baana.