Read Punu Dibandu 3 Bible Online

Dibandu 3 - Punu bible

Dibandu 3

¹Nyoga amajaba usoga diela ne uviolila bibulu biotsu bimusiru abi Fumu Nsambi amavaga. Amawivula mugetu rie: Dingensa Nsambi amavosa rie: Duyaji milunda mimiri miotsu minungi.

²Mugetu amawagulu nyoga rie: Tuna musuga uji milunda mimiri minungi.

³Tumba milunda mimuiri aguvu o gari nungi, Nsambi amagandisa rie: Duyamiji na duyamibemba mu mbari dukefu.

⁴Mbana nyoga amatsingula mugetu rie: Ufura efuri dugofu.

⁵Tumba Nsambi ejabi: Yika duimiji dujaba mambu nana mavu, duba nderi nsambi oyijabi maboti na mabi.

⁶Mugetu amalaba yiri milunda mimuiri mimaba miboti ugengila noji na amagulu nsala umidokula nodila dujabu kabogu amabonga mulunda umuiri eni na amaji na amaguvega ombu mulumi andi wandi, na jandi amaji.

⁷Yiotsu yina botsu babeji bamajaba yiri bavu penyi na bamaneka magaji maneni uvaga misobi.

⁸Dibaala na mugetu banogulu mikindi miFumu Nsambi ava amalingila o nungi tsisiga, bamasuema Fumu Nsambi va gari miri minungi.

⁹Tumba Fumu Nsambi amanengila dibaala na amamuwivula rie: Aguʼ guvu?

¹⁰Amawagula rie: Nyimagugulu o nungi. Nyimalaba goma mu mbari nyivu penyi kabogu nyimasuema.

¹¹Fumu Nsambi amawivula rie: Anyi amagulonsa yiri guvu penyi? Je gumaji mulunda agu nyimagugandisa?

¹²Dibaala amawagula rie: Mugetu agu ndeʼ gumapega uba muwamusi ami amakwakisa mulunda umuiri eni na nyimaguji.

¹³Fumu Nsambi amawivula mugetu rie: Dibandu yi gumavayila nana? Mugetu amawagula rie: Nyoga amansoga diela na nyimaguji.

¹⁴Mbana Fumu Nsambi amatsingula nyoga rie: Gunovaga nana kabogu nyuguloga; yika ndeʼ va gari biruitsi biotsu na bibulu biotsu bimusiru guwendanga na tulu agu na yika ndeʼ gujanganga difufundu te na yitsingu yiagu yiotsu.

¹⁵Nyuvaga yikenganyi va gari jenu na mugetu na va gari bategula bagu na bategula bandi: jogu bodudimbanga va miuru na jenu dubagakanga va bisonginyi.

¹⁶Amatsingula mugetu rie: Nyufimisa misongu ava guburilanga. Diuleba guburanga na maguga ne nana guba na nsala mulumi agu na gurumungu nandi.

¹⁷Amatsingula Adam rie: Gunogululu diufi dimugatsi agu noji mulunda umuiri agu nyimagugandisa na diruma diedidi guyaguji! Kabogu mu diambu diagu Nyuloga butamba Gutsoganga udila biguji biagu te na mutubu rie:

¹⁸Butamba bugubendisila matsiendi na kengitsi. Gujanganga abi gumavara.

¹⁹Gusala tindi usalanga udila biguji biagu te na vana gugabuga o butamba abu gumabongulu mu mbari gumaruyila mu butamba gumuegabuga muna butamba.

²⁰Adam amaluga mugatsi andi Eve: mu mbari amaba nguji jibatu botsu.

²¹Fumu Nsambi amavayila Adam na mugatsi andi biduaru bimikata na amabaduisa bionyi.

²²Fumu Nsambi amavosa rie: Laba mutu amakaluga nderi nsambi ujabanga motsu. Tsie tumugubitsianu yiri agodokula milunda mimuiri umonyu nomiji nobanganga monyu umutubu.

²³La dibandu amamubingila o nungi Eden uyesala butamba abu amabongulu.

²⁴Anana amabingila Adam; amasunsa biansa bimangolu o yiari ayi wisi epalili yinungi Eden na dijenga dimuji ukelisa nsila jimuiri umonyu.