Read Punu Dibandu 30 Bible Online

Dibandu 30 - Punu bible

Dibandu 30

¹Ava Rachel amalabila yiri ageburili Jacob baana, amawava muana nguji andi na amatsingula Jacob rie: Peyi baana, pa tsiri nana nyufu!

²Jacob amanyoyila Rachel na amawivula rie: Menu nyivu Nsambi? Menu nyigugandisi ufunanga?

³Rachel amavosa rie: Bonga muviga ami Bila, fubana yitsiga nandi yiri jandi omburila baana bababaala.

⁴Amamuwakisa muviga andi Bila uba mugatsi andi; Jacob amafubana yitsiga nandi.

⁵Bila amadila dimi amaburila Jacob muana dibaala.

⁶Rachel amavosa rie: Nsambi amatabulila bunsonsi, ngensa amagulu diufi diami, amapega muana dibaala. La dibandu amamuluyila Dan.

⁷Bila, muviga uRachel amamuedila dimi na amaburila Jacob muana umubeji udibaala.

⁸Rachel amavosa rie: Nyimatoga na muana nguji ami na nyimalunga. La dibandu amamuluyila Neftali.

⁹Lea anolaba yiri agemuebura amabonga muviga andi Zilpa na amamuwakisa Jacob uba mugatsi andi.

¹⁰Zilpa, muviga uLea, amaburila Jacob muana udibaala.

¹¹Lea amavosa rie: Ka muna yiesa yi! Amamuluga Gad.

¹²Zilpa, muviga uLea, amamueburila Jacob muana umubeji udibaala.

¹³Lea amavosa rie: Ka muna maboti ma mavu nami! Bagetu bondengilanga mungo nsangu. La dibandu amamuluyila Asser.

¹⁴Yilumbu yimosi Ruben amalinga o manungi va temu dutsonsugu duble amadila mandarago, milunda miyivaru yimusiru, amayemivega nguji andi Lea. Mbana Rachel amavonda Lea rie: Kokolu tsiagu peyi mua mandarago tsimuana agu udibaala.

¹⁵Lea amamugabusila rie: Gusakamana diambu diagu, gumalekala mulumi va julu vana guirondi umuebonga mandarago tsimuanaami? Rachel amawaka rie: Guluati, tukunsa adietu: mukolu egugu Jacob osilama nagu na ndeʼ gukapega mandarago tsimuana agu udibaala.

¹⁶Ava Jacob amaruyila o musiru va tsisiga, Lea amalemubengusana na amavosa rie: Gusilama nami mu mbari nyimagusopana na mandarago tsimuana ami. Mukolu eni Jacob amafubana yitsiga na Lea.

¹⁷Nsambi amagulu dusambu duLea, amadila dimi na amaburila Jacob muana umuranu udibaala.

¹⁸Lea amavosa rie: Nsambi amamfuta mu mbari nyimavega muviga ami ombu mulumi ami. La dibandu amamuluyila Issakar.

¹⁹Lea amamuedila dimi na amaburila Jacob muana umusiamunu udibaala.

²⁰Lea amavosa rie: Nsambi amapega muensili udufunu duneni; mbana mulumi ami obanganga na nsala ami mu mbari nyimamuburila baana basiamunu bababaala. La dibandu amamuluyila Zabulon.

²¹Va julu vana amabura muana umugetu agu amaluga Dina.

²²Nsambi amakipanga Rachel; amamugulu wandi, na amamufunisa.

²³Amadila dimi na amabura muana dibaala, amavosa rie: Nsambi amakusulila yisonyi.

²⁴La dibandu amamuluyila Joseph amavosa rie: Fumu ambuesi muana ususu udibaala.

²⁵Rachel anobura Joseph, Jacob amatsingula Laban rie: Ndundi nyuyenagabuga o bulongu buami.

²⁶Peyi bagatsi bami na baana bami; mu diambu diogu nyimagusalila, yika uweʼ nyiwendi; ndeʼ beni guijabi nana nyimagusalila.

²⁷Laban amawaka rie: Gugorungula undasa yingeba? Nyijabi mu diambu diagu Nsambi amakabila miula.

²⁸Tubula futa agu nyugufuta.

²⁹Jacob amamuwagula rie: Ndeʼ beni guijabi nana nyimagusalila na nana biruitsi biagu bivu namunyi yika mu diambu diami.

³⁰Abimaba nagu ne mbe nyisakaruga bimaba yika mua pesu; tumba yiotsu ayi nyimaruyila biagu biotsu bimafuna. Yiotsu ayi nyimatolila ombu gagu Fumu amagugabila miula. Temu jisakatola usalila mukuta ami?

³¹Laban amawivula rie: Yi nyuguvega? Jacob amawaka rie: Gugopega yisalu. Pa guisingi adi nyuvosa, nyumuebungula migamba miagu nana na kala.

³²Namunyi nyuvioga va gari migamba miagu miotsu; nyukakasana baana babindombu abivu na matodi na abivu na milimba na abi vu bipinda nesi binsabi abivu na milimba na abivu na matodi abina biuba futa ami.

³³O gusu businginyi buami bulabana ava guiuyila uyilaba futa ami; pa gulaba abigoba na matodi na milimba va gari binsabi na bindombu bipinda, diwendi rie: nyimadaga.

³⁴Laban amavosa rie: Diwelimina, dibi nana guivosili.

³⁵Muna yilumbu yieni Laban amakakasana balumi babinsabi abimaba na milimba na matodi na bibusi bibinsabi abimaba na matodi na milimba; binsabi biotsu abimaba na matodi mavema na bindombu biotsu abimaba bipinda. Amabiwakisa ombu baana bandi bababaala.

³⁶Laban amavaga dilala dibilumbu birieru va gari mbura andi na mbura Jacob. Jacob amabungulanga bindombu biLaban abimasialulu.

³⁷Jacob amabonga bitayi bimupepli na bimumandi na bimupalata abi amavaga bakurumuna-mundemunde.

³⁸Mbana amasunsa bitayi abi amavaga bakurumuna-mundemunde va gusu migamba va mbura ayi migamba mimayenuinanga; ava mimanuinanga avana mimabebilanga.

³⁹Migamba mimabebanga bebeli na bitayi bieni, bionyi bimarombisa baana babindombu uburu na milimba na matodi maneni nesi mageyi.

⁴⁰Jacob amakakasana baana babindombu va mbura mosi na biotsu abimaba na milimba na bipinda va mbura jisusu, diwendi rie: migamba miLaban. Anana amadilila migamba mijaʼ beni ami asamamuesobana na migamba miLaban.

⁴¹Dimaba yiri temu tsiotsu atsi bibulu abimaba na mangolu bimabebila, Jacob amasunsanga bitayi bieni va gusu ogu va binuinu yiri bibulu biubebila vana bitayi bieni.

⁴²Tumba ava bibulu abisamaba na mangolu bimatolila asamabisunsanga, kabogu bibulu abisamaba na mangolu biLaban; abimaba na mangolu bimaba biJacob.

⁴³Jacob amakaluga tindi yisina; amadila migamba mipuela na basalitsi bababaala na babagetu na basamo na baburu.