Read Punu Dibandu 32 Bible Online

Dibandu 32 - Punu bible

Dibandu 32

¹Laban amarambuga kedi jineni amaganina baana bandi bababaala na babagetu na amabagabila miula. Mbana amayenagabuga o dimbu diandi.

²Jacob amayenawenda na biansa biNsambi bimayemubengusana.

³Ava Jacob amabilabilila amavosa rie: Agugu la mulaku uNsambi! Amaluga mbura eni Mahanaim.

⁴Jacob amatinda bilumbi ombu muana nguji andi Esau o yiari yiEdom o bulongu buSeir.

⁵Amabaruma uvosa na Esau rie: Musalitsi agu Jacob jandi rie: Nyimatsinga ombu Laban yika namunyi uruga nyiruyi.

⁶Nyina bangombi na baburu na bindombu na binsabi na basalitsi bababaala na babagetu. Nyisindiyi bilumbi biebibi ombu gagu ujaba yeri gundila.

⁷Bilumbi binogabuga ombu Jacob bimavosa rie: Tumawenda ombu muana nguji agu Esau, uruga emyi uyenagubengusana na kama jina tsibabaala.

⁸Jacob amagaangu na keri na goma. Amagaba batu bandi mabuli mabeji, na bindombu na binsabi na bangombi na basamo wandi,

⁹amatasa rie: Pa Esau oyitoyisa dibuli dimosi nodibetsa, dibuli adiusiala diurungula urina.

¹⁰Mbana Jacob amasambila rie: Nsambi taji ami Abraham na Nsambi taji ami Isaac, gumansingula rie: Gabuga o bulongu buagu o mbura aji gumaburulu. Nyuguvayila maboti!

¹¹Aa Fumu, ngaa uwelimina na maboti magu motsu nesi usigama uagu uotsu; ava nyimasabuyila Jourdain nyimaba yika na nguangu buandi tumba namunyi nyigabuyi na mabuli mabeji.

¹²Kokolu tsiagu kwaki kalala ombu muana nguji ami Esau! Goma nyilabi, uruga eruyi utuboka; jetu na bagaisi na baana.

¹³Tumba guyalibana gumavangana nami rie: Nyuguvayila maboti na nyufunisa bategula bagu te na boba nana yisieyi yidukueku dumubu ayigorungula utalu.

¹⁴Ava mbura eni Jacob amasilama. Amasola bibulu biebibi utinda mulendu ombu muana nguji andi Esau:

¹⁵kama beji tsibibusi bibinsabi na magumabeji mabalumi babinsabi na kama beji tsibibusi bibindombu na magumabeji mabalumi babindombu,

¹⁶na magumarieru mabibusi bibasamo na baana bogu aba bamanuisanga na magumana mabibusi bibangombi na magumabeji mabibusi bibaburu na yigumi yibalumi bababuru.

¹⁷Amabiwakisa ombu basalitsi bandi, kadi munongu uogu mugamba; mbana amatsingula basalitsi bandi rie: Vioganu va gusu ami na duyasobasana migamba.

¹⁸Amaruma musalitsi agutega rie: Avagubengunina na muana nguji ami Esau pa oguwivula rie: Aguʼ guiwendi? Mugamba eni aguvu nagu unyi?

¹⁹Gukawagula rie: Umusalitsi agu Jacob; uvu mulendu agu etindi ombu fumu andi Esau. Jaʼ beni uruga eruyi o nsima etu.

²⁰Munongu mosi amaruma agumubeji na agumurieru na batu abamawendisanga migamba; anana dutsingulilanga Esau ava dubengunina nandi.

²¹Dukavosanga rie: Laba musalitsi agu Jacob uruga eruyi o nsima etu. Amatasanga rie: Nyuvotsa kabu andi na mulendu eni aguireyili o gusu ami; mbana ava nyumulabila kiakiaki tanguji ondila na nsangu.

²²Mulendu eni umavioga va gusu andi; jaʼ beni amasiala mukolu eni vana mulaku.

²³Va mukolu eni amaretsama na bagatsi bandi babeji na baviga bandi babeji babagetu na yigumi na muana andi umosi; bamasabuga va malu maYabboq.

²⁴Amabasabusa mujamba eni na amasabusa biotsu abimaba nandi.

²⁵Jacob amasiala pinsa; mutu amasundila ulabana utoga nandi te no matebugulu mawisi.

²⁶Mutu eni anolaba yiri agorungula umubelisa amamudimba va dingundu na dingundu diJacob dimasukuga ava bamatoyila.

²⁷Amavosa na Jacob rie: Ndundi, nyiyenawenda mu mbari wisi yika utebuga. Jacob amamugabusila rie: Ngogudunda pa gusakakabila miula.

²⁸Amamuwivula rie: Diina diagu yi? Amawagula rie: Jacob.

²⁹Amamuevosa rie: Gugomuenengulungu Jacob, tumba gunengulungu Israel; mu mbari gumatoga na Nsambi na batu wandi na ndeʼ gumalunga.

³⁰Jacob amamuwivula rie: Kokolu nyirondi ujaba diina diagu. Amawivula rie: Dibandu yi guirondi ujaba diina diami? Mbana amamugabila miula.

³¹Jacob amaluga mbura eni Penouel; mu mbari amavosa rie: Nyimalaba Nsambi kiakiaki ne nana nyikivu monyu.

³²Wisi unobala Israel amasabuga va malu maPenouel, amayenapitsuganga mu mbari dingundu diandi dimasukuga.

³³La dibandu te na namunyi baIsrael bagejangingi miansi midingundu mu mbari Nsambi amadimba Jacob va dingundu va julu muansi.