Read Punu Dibandu 38 Bible Online

Dibandu 38 - Punu bible

Dibandu 38

¹Va temu eni Juda amakakinina na baana bataji bandi, amawenda o Adoullam ombu mutu diina diandi Hira.

²Avana Juda amalabila muana mugetu uChoua muisi Canaan amamuwela.

³Mugetu amadila dimi na amabura muana dibaala agu Juda amaluga Er.

⁴Mugetu amamuedila dimi na amabura muana dibaala agu amaluga Onan.

⁵Amamuebura muana dibaala agu amaluga Chela; Juda amaba o Kezib ava muana amaburulu.

⁶Juda amawelila tsomi andi Er mugetu, diina diandi Tamar.

⁷Er tsomi Juda amaba mutu mubi va gusu Fumu; la dibandu Fumu amamubokisila.

⁸Mbana Juda amaruma Onan rie: Weʼ yebonga mukuili umuana nguji agu nomuvayila adivu diwelimina na bifu bitindi yiburu yimfumbi; gukamuburila baana.

⁹Onan amajaba yiri muana eni agoba aguandi kabogu amabondusanga tsangu tsiandi va tsi ava amafubininanga yitsiga na mukuili umuana nguji andi yiri agoburila muana nguji andi muana.

¹⁰Adi amavaga disamalasa Fumu ubueji, Fumu amamubokisa wandi.

¹¹Mbana Juda amatsingula boji buandi Tamar rie: Tsana mukuili o ndagu taji agu te na muana ami Chela obanguga. Amalaba keri yiri muana ofu nana baana banguji bandi bamafuila. Tamar amayenawenda na amayetsana o ndagu taji andi.

¹²Bilumbu bipuela binovioga mugatsi Juda amafu, jandi amaba muana mugetu uChoua. Juda anopala o bukuili amawenda o Timna ombu jogu abamafuganga bindombu biandi, bamawenda, jogu na mbatsi andi Hira muisi Adoullam.

¹³Bamatsingula Tamar rie: Boji buagu janduʼgu evioyi o Timna uyefuga bindombu biandi.

¹⁴Kabogu amavula biduaru biandi bibukuili na anjagumba tsanda na amatsana va dikotulu diEnaim va mugula nsila jiTimna; mu mbari amagulu yiri Chela aka dibaala na asamawakusu ombu gandi.

¹⁵Juda amamulaba na amatasa yiri yimbembu avu mu mbari amakubiga yinsi yiandi.

¹⁶Amamurasuna muna nsila na amavosa rie: Nyuyisilimina ombu gagu. Asamajaba yiri aguna amaba boji buandi. Mugetu amamuwivula rie: Yi gupega?

¹⁷Dibaala amawagula rie: Nyugutindila yinsabi yimosi yimugamba ami. Mugetu amawivula rie: Gupega tuga te na vana guyitindila?

¹⁸Dibaala amawivula rie: Tuga yi nyuguvega? Tamar amavosa rie: Yilimba yiagu ayivu na mukudu na nguangu agu ajivu nagu va dikaka. Amamuvega bionyi: Mbana amayesilama nandi; Tamar amadila dimi.

¹⁹Mugetu amarelama amayenawenda, anogusula tsanda aji amakegumba amamueduara biduaru biandi bibukuili.

²⁰Juda amatinda yinsabi na mbatsi andi muisi Adoullam uyekobula tuga ombu mugetu eni. Tumba mbatsi andi asamamurasuna.

²¹Amawivula bisi mbura eni rie: Yimbembu ayimaba o Enaim va mugula nsila, aka? Bamamugabusila rie: Viaga, tugaa na yimbembu vava.

²²Dibaala dieni amayenagabuga ombu Juda na amamutsingula rie: Ngaamurasuna na bisi mbura eni batsivosa rie: Viaga, tugaa na yimbembu vava.

²³Juda amavosa rie: Akelisi tuga eni! Ba-yatureka. Vagaa diambu, nsitinda yinsabi yieni na gugaamurasuna.

²⁴Miweli mirieru minovioga, bama-yetsingula Juda rie: Boji buagu Tamar amava-ga bumbembu, dimajabunu mu mbari aka na dimi. Juda amaruma rie: Mupalisianu o gusu kana nomunyensa mbisu.

²⁵Banomupalisa o gusu kana, amaruma mutu utsingula boji bua-ndi Juda rie: Mutu agudila bima biebibi agu-mapega dimi. Guijabi mutu agudila moru egu-gu na beleeti tsietsitsi na nguangu ejiji?

²⁶Juda amabijaba kabogu amavosa rie: Amakelisa migaga uviolila menu; dingensa nyisamamuwakisa ombu muana ami udibaala Chela nana divu diwelimina. Juda asamamuefubana yitsiga nandi.

²⁷Temu jinotola ubura, kabogu Tamar amabura mavasa.

²⁸Ava misongu mitega, di-mosi dimapalisa dikaka; muburisitsi amadi-bonga na amaditunga mukudu ubenga na amavosa rie: Agugu atsireyila upala.

²⁹Tumba amakotisa dikaka mbana muana nguji andi amapala. Kabogu muburisitsi ama-vosa rie: Tsie gumatobila yibaga? Na Juda amamuluga Peres: Mutobitsi uyi-baga.

³⁰Mbana muana nguji andi udibaala amapala. Agumaba na mukudu ubenga va dikaka; Juda amamuluga Zera: Yiari ayi wisi epalili.