Read Punu Dibandu 39 Bible Online

Dibandu 39 - Punu bible

Dibandu 39

¹BaIsmael bamabega Joseph o Egypte; bamamusumbisa ombu muisi Egypte diina diandi Potifar, yivunda yibagora baPharaon.

²Fumu amaba na Joseph, motsu ama amavaganga mamabuejingi; amatsananga o ndagu fumu andi agumaba muisi Egypte.

³Jandi amalaba yiri Fumu amaba na Joseph na motsu ama amavaganga mamabuejingi.

⁴Potifar amalaba tindi ubueji na Joseph; amamukotisa mu yisalu yijaʼ beni; amamuvega musuga uotsu o ndagu andi nesi ubiandi biotsu.

⁵Potifar anomukotisa o ndagu andi na anomuvega musuga ukelisa biotsu abimaba nandi, Fumu amagabila ndagu muisi Egypte miula mu diambu diJoseph na mimadugunu mu biotsu abimaba nandi nesi o ndagu nesi o manungi.

⁶Amasila mambu motsu na Joseph, asamamuekipa mambu masusu yika biguji biandi. Joseph amaba mufudu uboti: nesi diteli nesi yinsi.

⁷Mua pesu temu mugatsi fumu andi amamunyungila na amavosa rie: Fubana yitsiga nami!

⁸Joseph amabusa na amatsingula mugatsi fumu andi rie: Jaba yiri fumu ami agekipi ne diambu dimosi o ndagu andi; amakwakisa musuga uotsu.

⁹Agepiolili musuga o ndagu ejiji; asamakandisa ne yima yimosi, yika ndeʼ buandi mu mbari guvu mugatsi andi. Tsie nyuvayila nsoruru tsimunongu eni nova-ga disumu va gusu Nsambi?

¹⁰Diuleba amawambilanga Joseph yilumbu na yilumbu, Joseph amabusa ufubana yitsiga nandi.

¹¹Yilumbu yimosi Joseph amakota o ndagu uyesala yisalu yiandi, amarasuna yiri basalitsi bamapala,

¹²kabogu mugatsi Potifar amamugaanga yikutu yiandi na amamuwambila rie: Fubana yitsiga nami! Joseph amamusila na yikutu yiandi va dikaka, amarina o dulombili.

¹³Ava mugetu amalabila yiri Joseph amamusila na yikutu yiandi na amarina o dulombili,

¹⁴amanengila basalitsi na amabatsingula rie: Duilabi, mulumi ami amatubeyila muisi Hebreu uyitulensa. Dibaala diedidi atsiruga ombu gami uyifubana yitsiga nami, tumba nsigamuga.

¹⁵Anogulu yiri ugamuga nyigamuyi atsisila yikutu yiandi va tangi na amarina o dulombili.

¹⁶Mbana amakebsa yikutu yiJoseph te na vana mulumi andi amaruyila o ulinga.

¹⁷Amatsingula mulumi andi rie: Muviga muisi Hebreu agu ndeʼ gumatubeyila amaruga ombu gami uyimbingila.

¹⁸Tumba nyinogamuga tindi ugamuga, atsisila yikutu yiandi va tangi norina o dulombili.

¹⁹Fumu Joseph anomana ugulu posulu tsimugatsi andi mu diambu diJoseph amabasa na tindi kabu.

²⁰Amabonga Joseph na amamukotisa o tsugu mosi na bakoli bakaga. Ava Joseph amabila o tsugu,

²¹Fumu amaba nandi; amamugabila maboti mandi te na nesi mukelisi tsugu amamurondanga.

²²Mukelisi tsugu amamuvega musuga uruma bisi tsugu botsu; jandi amakipanga biotsu abi bisi tsugu bamasalanga.

²³Mukelisi tsugu asamamuekipa ne yisalu yimosi ayi amawakisa Joseph; Fumu amaba nandi na amabuejisanga motsu ama amavaganga.