Read Punu Dibandu 4 Bible Online

Dibandu 4 - Punu bible

Dibandu 4

¹Adam amafubana yitsiga na mugatsi andi Eve agumadila dimi, amabura Cain na amavosarie: Fumu amakwamusa, nyimabura muana dibaala.

²Amamuebura muana dibaala, diina diandi Abel. Abel amaba mubungulitsi ubindombu; Cain amaba muvaritsi.

³Banobanguga Cain amavagulila Fumu pagu jibiguji biandi;

⁴tumba Abel amavagulila Fumu pagu tsimugamba andi na matsi matsionyi. Fumu amasinga Abel na pagu andi,

⁵tumba asamasinga Cain na pagu andi, Cain amanyoga kabu jineni na amatunga dusisi.

⁶Fumu amawivula Cain rie: Dibandu yi gumanyoyila? Dibandu yi gumatungila dusisi?

⁷Mbe gumavaga adivu diwelimina mbe gusamasingu? Gusamavaga buranga kabogu disumu ulega diguleyi va munu ndagu agu. Nsala tsidionyi tsivu nagu, romba uditsiemusa.

⁸Cain amavosa na muana nguji andi rie: Tʼwendi o musiru. Ava bamabila o musiru Cain amagaanga muana nguji andi Abel na amamuboka.

⁹Fumu amawivula Cain rie: Muana nguji agu Abel aka? Amawagula rie: Ngejabi; tsie nyiji mukelisi umuana nguji ami?

¹⁰Nsambi amamuwivula rie: Yigumavaga? Malungu mamuana nguji agu mavu nderi mbeji ajikwivuli ugabusila pila.

¹¹Ubongila namunyi gulogu: Mulogu agupalila mu butamba abumakamusa malungu mamuana nguji agu, agu gumaboka.

¹²La dibandu ava gusalila butamba bugomuegupalisila digumba. Guba murinitsi na yilayilayi.

¹³Cain amatsingula Fumu rie: Mukilu ami umapiolila.

¹⁴Namunyi guimbingi va mbura ejiji jinyega; ngeba menua, ngomuelaba yinsi yiagu; nyuba murinitsi na yilayilayi; uotsu agutasuna omboka.

¹⁵Fumu amamutsingula rie: Tsiri nana, pa mutu oguboka nyumugabusila pila yisambuali yikumbu. Fumu amanamiga Cain yilimba yiri agoboku na mutu yika la mutu.

¹⁶Mbana Cain amakakana na Fumu amayetsana o bulongu buNod o yiari ayi wisi epalili yiEden.

¹⁷Cain amafubana yitsiga na mugatsi andi agumadila dimi na amabura Henok. Mbana amarunga musiengi agu amaluga diina dimuana andi Henok.

¹⁸Henok akabura Irad, Irad akabura Mehouyael, Mehouyael akabura Metouchael, Metouchael akabura Lemek.

¹⁹Lemek amawela bagatsi babeji: aguna diina diandi Ada, ususu diina diandi Silla.

²⁰Ada amabura Yabal: jandi amaba taji jogu abetsani mu mandagu mamatsanda na abekelisi migamba.

²¹Diina dimuana nguji andi Youbal: jandi amaba taji jogu botsu abesiyi basambi na mambika.

²²Silla wandi amabura Toubal-Cain, agumatulanga bisigu biotsu bibakunga na bimadilu, diina diyibusi yiToubal-Cain Naama.

²³Lemek amasavila bagatsi bandi dusavu rie: Ada na Silla guluanu diufi diami! Bagatsi baLemek guluanu mambu mami! Nyimaboka dibaala mu mbari amandemisa, Nyimaboka mufudu mu mbari amamfubula.

²⁴Nyiina, pila Cain jiugabusulu yisambuali yikumbu, tumba pila Lemek jiugabusulu magumidusambuali na yisambuali yikumbu.

²⁵Adam amamuefubana yitsiga na mugatsi andi agumabura muana dibaala agu amaluga Seth. Eve amavosa rie: Nsambi amapega muana ususu udibaala va yivinga yiAbel agu Cain amaboka.

²⁶Seth wandi amabura muana dibaala agu amaluga Enos. Avana temu eni bamabandila usambila mu diina diFumu.