Read Punu Dibandu 41 Bible Online

Dibandu 41 - Punu bible

Dibandu 41

¹Bilima bibeji binovioga Pharaon amadora ndosi. Muna ndosi eni amaba va mugula mujamba uNil.

²Amalaba yisambuali yibangombi baboti na bavonga abamamatanga va mugula uNil noyenajanganga bisinga.

³Mbana amalaba yisambuali yibangombi basusu babiva na bagasa abamaba yika bivisi na bivisi abamamatanga va nsima ogu va mugula mujamba uNil.

⁴Bangombi ababiva na bagasa bamamina bangombi baboti na bavonga mbana Pharaon amarambuga.

⁵Amamuewenda yilu na amamuedora ndosi ajimubeji. Muna ndosi eni amalaba yisambuali yibisaga biuresi biroga na biboti abimawansa va muiri umosi.

⁶O nsima tsibionyi bimawansa yisambuali yibisaga biuresi bibivuda abimabivusu na punga ajiruyili o yiari ayi wisi epalili.

⁷Yisambuali yibisaga biuresi bibivuda bimamina yisambuali yibisaga biuresi biroga na bibasa. Mbana Pharaon amarambuga amalaba yiri ndosi atsidora.

⁸Ava kedi Pharaon amaba na murima o julu. Kabogu amanengila banganga botsu na bango diela botsu abamaba o Egypte na amabawalulila mandosi meni. Ne mutu mosi asamarungula umuvindiyila monyi.

⁹Mbana yivunda yibaboyi amatsingula Pharaon rie: Namunyi nyirangimini nsimbulu tsiami.

¹⁰Ava gumatunyoyila jetu na yivunda yibavayitsi bamapa, gumatukotisa o tsugu jiyivunda yibagora bakaga.

¹¹Mukolu mosi jetu botsu babeji tumadora mandosi: mutu mutu na ndosi andi; jetu botsu babeji tumadila mavindugulu mawelimina na mandosi metu.

¹²Guna tsugu gumaba mufudu uHebreu agumaba muviga uyivunda yibagora. Jetu tumamuwalulila mandosi metu, mutu mutu na ndosi andi, jandi amatuvindiyila monyi.

¹³Mambu mamalabana nana amavindiyila. Gumakabusa o yisalu yiami na yivunda yibavayitsi bamapa amatabulu muru na mfumbi andi jimalelugu.

¹⁴Pharaon amaruma mutu unengila Joseph. Bamalensa nomupalisa o tsugu. Amafuga na amavinsa biduaru mbana amawenda ombu Pharaon.

¹⁵Pharaon amatsingula Joseph rie: Nsidora ndosi aji ne mutu mosi agorungula upindiga; nyimagulu yiri guijabi uvindiga mandosi yiotsu ayi guimagulu.

¹⁶Joseph amagabusila Pharaon rie: Tsiri menu! La Nsambi aguguvega divindugulu diwelimina adiuguwamusa.

¹⁷Mbana Pharaon amatsingula Joseph rie: Muna ndosi ami nyibetsi va mugula mujamba uNil.

¹⁸Vabetsi yisambuali yibangombi babo-ti na bavonga abatsimatanga va mugula mujamba noyenajanganga.

¹⁹Yisambuali yibangombi basusu abatsimatanga va nsima ogu babetsi bagasa na babiva; babetsi yika bivisi na bivisi. Mbe nyisakalaba ubiva umunongu eni mu bulongu buotsu buEgypte.

²⁰Bangombi bagasa na babiva batsimina yisambuali batega abavonga,

²¹diuleba batsibamina bagaalabana yiri bamaroga na babetsi dedi mosi nana va kala. Mbana nsirambuga.

²²Nsimuedora yisambuali yibisaga biuresi bibasa na biboti abibetsi mu muiri umosi.

²³Mbana nyimalaba yisambuali yibisaga biuresi bibivuda abimabivusu na punga ajiruyili o yiari ayi wisi epalili,

²⁴yisambuali yibisaga biuresi bibivuda bitsimina yisambuali yibisaga biuresi abibasa. Nsimawalulila banganga tumba ne jimosi jigaarungula umapindiyila.

²⁵Joseph amatsingula Pharaon rie: Mandosi motsu ihabeji mavu na divindugulu dimosi. Nsambi amagujabisa adi ovaga.

²⁶Yisambuali yibangombi baboti bavu yisambuali yibilima: divindugulu dimosi divu.

²⁷Yisambuali yibangombi bagasa na babiva abavu yika bivisi na bivisi na abatsimatanga va nsima bangombi abatega bavu yisambuali yibilima; yisambuali yibisaga biuresi bibivuda abimabivusu na punga ajiruyili o yiari ayi wisi epalili bivu yisambuali yibilima bidungosu dunsala.

²⁸Anana nyibanotsingulila Pharaon yiri Nsambi amajabisa Pharaon adi ovaga.

²⁹Voba yisambuali yibilima bidigumba o bulongu buotsu buEgypte.

³⁰Abina binovioga yisambuali yibilima binsala biuruga na batu bolibana ne ulibana digumba diEgypte, dungosu dunsala dugudisa bulongu.

³¹Nsala eni ajiuduka jiuba dungosu na bolibana digumba dikala.

³²Gutsidora ndosi agu kumbu beji ulasa yiri Nsambi amatabula diambu kala na agotsikadana udidugusu.

³³Namunyi Pharaon asoli dibaala adivu na diela na dujabu nomuvega musuga uruma bulongu buEgypte.

³⁴Pharaon abiatsi batu aboba na musuga o biari biotsu bibulongu ugusula yimosi mu biranu bidutsonsugu duEgypte mu yisambuali yiotsu yibilima bidigumba.

³⁵Jogu bagukiyi biguji bidigumba dieni dibilima biboti abiuruga, badivayi na musuga uPharaon, diwendi rie: bakagukiga ble atsiusuegu o bilundulu bimisiengi miotsu na vabi bagora ubikelisa.

³⁶Biguji bieni biusuegulu bisi bulongu mu diambu didungosu dunsala duyisambuali yibilima abiuruga o bulongu buEgypte yiri dungosu dunsala dugogudisa bulongu.

³⁷Pharaon na basalitsi bandi bamasinga matasa meni.

³⁸Pharaon amawivula basalitsi bandi rie: Tudila mutu nana jandi egugu aguvu ubasa na Yinyunyi ayiruyili ombu Nsambi?

³⁹Pharaon amatsingula Joseph rie: Nsambi amagujabisa mambu motsu na vagaa mutu aguvu na diela na dujabu uviolila ndeju.

⁴⁰Ny ugubiatsa yivunda yibisalu bibufumu buami na batu bami botsu bodedila maruma magu; dimosi buandi gugonengulu na diina dikaga.

⁴¹Pharaon amabuesa rie: Ubongila namunyi guna musuga uruma bulongu buotsu buEgypte.

⁴²Pharaon amavula moru andi ubukaga na amaguduisa Joseph; na amamuduisa biduaru bitsanda jiboti jilina na amamuduisa panga jilora mu kingu.

⁴³Mbana amamunangiga mu dikalu adimadukanga adiandi na batu bamayenagamuganga va gusu andi rie: Kutamanua! Anana Pharaon amamuveyila musuga uruma bulongu buotsu buEgypte.

⁴⁴Pharaon amamuetsingula Joseph rie: Menu Pharaon oyivosi rie: Musuga uotsu ubisi Egypte uvu va julu muru agu.

⁴⁵Pharaon amaluga Joseph Safnat-Panea na amamuwelila Asnat muana mugetu uPotifera agumaba muvagulitsi upagu uOn. Joseph amatsiengilanga bulongu buotsu buEgypte.

⁴⁶Joseph amaba na magumarieru mabilima ava amalabinina ombu Pharaon agumaba kagajiEgypte. Joseph amaganina Pharaon uyenatsiengilanga bulongu buotsu buEgypte.

⁴⁷Mu yisambuali yieni yibilima bidigumba butamba bumafunisanga tindi digumba.

⁴⁸Joseph amagukiga biguji biotsu biyisambuali yibilima o bulongu buEgypte; amakotisa biguji bimbanda tsi o bilundulu o gari kadi musuengu

⁴⁹Joseph amagukiga ble tsipuela te na tsimaba nderi yisieyi yidukueku dumubu; tsimaviolila ufuna te na bamadunda utsitala mu mbari dutalu dumaviolila ufuna.

⁵⁰Ne bilima binsala bikatola Asnat muana mugetu uPotifera muvagulitsi upagu uOn amabunla Joseph baana babeji bababaala.

⁵¹Joseph amaluga tsomi andi Manasse divindugulu rie: Nsambi amakwamusa ulibana purulu tsiami tsiotsu na ndagu taji ami jiotsu.

⁵²Amaluga agumubeji Efraim divindugulu rie: Nsambi amamfunisa o bulongu bumaguga mami.

⁵³Yisambuali yibilima bidigumba abimaba o bulongu buEgypte bimasuka.

⁵⁴Yisambuali yibilima binsala bimabanda nana Joseph amabiyila. Nsala jimaba o malongu motsu; tumba o bulongu buotsu buEgypte umaba biguji.

⁵⁵Ava bisi Egypte bamagaangulu na nsala bamatatila Pharaon udila biguji. Pharaon amaruma bisi Egypte botsu rie: Wendanu ombu Joseph na vaganu adi odutsingula.

⁵⁶Nsala jimaba dungosu o bulongu buotsu. Joseph amadibula bilundulu biotsu na amasumbisa ble ombu bisi Egypte. Nsala jimavarila o bulongu buEgypte.

⁵⁷Bisi malongu motsu bamawendanga o Egypte uyesumba ble ombu Joseph; mu mbari nsala jimaba dungosu te no malongu motsu.