Read Punu Dibandu 43 Bible Online

Dibandu 43 - Punu bible

Dibandu 43

¹Nsala jimabanganga dungosu o bulongu buCanaan.

²Banomana uji ble atsi bamayesumba o Egypte, Jacob amaruma baana bandi bababaala rie: Gabuganu o Egypte uyesumba mua biguji.

³Juda amamuwaka rie: Dibaala dieni amatulubusa rie: Pa muana taji enu agoruga nenu jenu dugomuendaba.

⁴Kabogu pa guisingi usindiga muana taji etu netu, tuwenda na tuyegusumbila biguji.

⁵Tumba pa gugogani umusindiga jetu tugowenda mu mbari dibaala dieni amatulubusa rie: Pa muana taji enu agoruga nenu jenu dugomuendaba.

⁶Kabogu Jacob amabawivula rie: Dibandu yi dumatsingulila dibaala dieni yiri duna muana taji ususu? Dumapayila dibi.

⁷Jogu bamamugabusila rie: Dibaala dieni amatuwivula bivu bipuela nesi bimikuta mietu rie: Taji enu aki monyu? Duna muana taji ususu? Kabogu tumawagula bivu bieni. Je turungula ujaba yiri otuwivula ubega muana taji etu?

⁸Juda amavosa rie: Kokolu taia, sindiga muana nami, tuwenda yiri tugomuefu na nsala nesi jetu nesi ndeʼ nesi baana betu.

⁹Abi va julu muni ami. Ava turuyila pa ngaagubeyila muana agu, mbela jiuba nami te na mutubu.

¹⁰Mbe tusamayitsinga gunu mbe tumagabuga ne kumbu beji.

¹¹Taji ogu Jacob amabatsingula rie: Mbukua, vaganu nana erondili! Longilanu biboti bibulongu buebubu mu saku tsienu uyebivega ombu dibaala dieni, diwendi rie: bima bimbunga jiboti jimunongu na munongu na buji na mipistase ria mimandi.

¹²Wendanu na mbongu na duyalibana atsi bamadugabusila mu saku tsienu, tanguji yiliba bamatsipodula.

¹³Sogamanu jenu na muana taji enu, gabuganu ombu dibaala dieni.

¹⁴Nsambi Mangolu adetsi murima udibaala dieni yiri osingisa Simeon na Benjamin ugabuga nenu! Vagaa diambu pa baana botsu bonsuka, nyuba pinsa!

¹⁵Bamabonga mulendu na bamabonga mbongu tsisusu na Benjamin wandi; bamasogama uwenda o Egypte na bamayekelasa ombu Joseph.

¹⁶Joseph anolaba Benjamin amaruga nogu amaruma musalitsi andi rie: Kotisa batu bebaba o ndagu, boka yibulu noyilambisa; jogu boji nami va muangulu.

¹⁷Musalitsi eni amavaga adi Joseph amamuruma na amabega batu beni o ndagu Joseph.

¹⁸Bamagaangu na goma jineni ava bamabegulu o ndagu Joseph, bamavosa rie: Betusikiyi mu diambu dimbongu atsi bamakotisa mu saku tsietu temu ajitega; berondi utugaanga notufuengilila notupatula baburu betu yiri botukelisa o buviga.

¹⁹Bamawenda na musalitsi uJoseph; bamavosa nandi ava mbe bakivu va gusu kana.

²⁰Jogu rie: Kokolu fumu, tumaleruga temu mosi uyisumba biguji.

²¹Ava tumatolila va yilatsi tumadibula saku tsietu na tumalaba mbongu tsimutu mutu muna saku andi; mbongu tsieni aratsi.

²²Tutsibega mbongu tsisusu umueyisumba biguji. Tugejabi anyi amakotisa mbongu tsieni mu saku tsietu.

²³Musalitsi amawaka rie: Sunsanu mirima! Duyalaba keri! La Nsambi enu, Nsambi taji enu agumadugabila. Mbana amabapalisila Simeon.

²⁴Musalitsi eni amabakotisa o ndagu Joseph; anobavega mamba; bamasusa makulu mogu; na amalisila baburu bogu.

²⁵Bamakunsa mulendu ogu ava bamavivila Joseph va muangulu, mu mbari bamatsingulu yiri boji nandi.

²⁶Ava Joseph amatotila o ndagu bamamuwakisa mulendu agu bamamubeyila na bamagudama va tsi va gusu andi.

²⁷Amabawivula rie: Duji buranga? Taji enu aji dumansingula aji buranga? Aki monyu?

²⁸Jogu bamamugabusila rie: Musatitsi agu, taji etu, aji buranga na aki monyu. Mbana hamamuegudama va tsi va gusu andi.

²⁹Mbana Joseph amalaba muana nguji andi Benjamin. Amawivula rie: Agugu la muana taji enu agu dumansingula? Amabuela rie: Muana ami Nsambi agugabili miula!

³⁰Amagaangu na durondu ava amalabila muana nguji andi te na amagulu nsala ulila, kobogu amasundila upala nokota o yibuku yindagu andi uyelila.

³¹Anomana ususa yinsi amapala, amawarisa murima mbana amavosa rie: Kabulanu biguji.

³²Bamakabulila Joseph biandi o mbura jisusu na baana bataji bandi va mbura mosi; bisi Egypte abamajanganga nandi bamakabululu mbura jisusu wandi mu mbari bisi Egypte basamarungula uji va mosi na bisi Hebreu: muyitsa ubisi Egypte umadigandisa.

³³Baana bataji baJoseph bamaba va nsungisini na tavula andi, bamatsanusu nana bamadukasana na mbura, ubanda na tsomi te na marina; jogu bamagengasana na bamakambulu.

³⁴Joseph amabatindila biguji abimaba va tavula andi na Benjamin amadila kumbu yiranu uviolila basusu. Bamanu malamu na bamalabanga nsangu va mosi nandi.