Read Punu Dibandu 44 Bible Online

Dibandu 44 - Punu bible

Dibandu 44

¹Joseph amaruma musalitsi andi rie: Basa saku tsibatu beni biguji nana borungulila ubega na podula mbongu tsimutu mutu mu saku andi.

²Mu saku ngebi ogu gukapodula tsiri yika mbongu tumba na kopa ami jilora jivema wandi. Musalitsi amavaga nana Joseph amamurumina.

³Mima kedi wisi unotebuga batu baJoseph bamawensa batu beni na baburu bogu.

⁴Bamagusuga va musiengi na mbe basakawenda vala, Joseph amaruma musalitsi andi rie: Relama, duka batu bebana; ava gubarasunina gukabawivula rie: Dibandu yi dumavayila dibi ombu jandi agumaduvayila diboti?

⁵Dibandu yi dumadayila kopa aji fumu enuini na ajimuveyi mangolu ujaba mambu? Dumamuvayila tindi dibi.

⁶Musalitsi amabarasuna na amabatsingula mambu meni.

⁷Jogu bamamuwivula rie: Dibandu yi fumu evosili nana? Tsatsabi, tugorungula uvaga dibi dimunongu eni.

⁸Tsiri jetu atumagugabusila mbongu atsi tumalaba o gari saku tsietu? Dibandu yi tudayila mbongu vo lora o ndagu fumu agu?

⁹Pa gulaba kopa eni netu mutu eni aboku! Va julu vana jetu tuba baviga bagu.

¹⁰Amawaka rie: Kabogu dibi nana duivosili! Jandi agu kopa jiulabana nandi oba muviga ami; jenu basusu dugoba muna.

¹¹Vana vana mutu amasundusa saku andi va tsi na mutu mutu amanyangula saku andi.

¹²Musalitsi amabafuyi, amabanda na yivunda na amasita na tindi ngebi; kopa jimalabinina mu saku jiBenjamin.

¹³Bamapasa biduaru biogu, bamamuelongila baburu bogu saku tsiogu mbana bamayenagabusila o musiengi.

¹⁴Juda na baana bataji bandi bamamuetola o ndagu Joseph; mbe asakawenda mbura. Bamasundila ugudama va tsi va gusu andi.

¹⁵Joseph amabawivula rie: Dibi yi dumavaga? Dugejabi yiri mutu nana menu nyina mangolu ujaba mambu motsu?

¹⁶Juda amawaka rie: Diambu yi tuvosa nagu fumu? Turungula uwaka diambu? Turungula uba na ndunga? Nsambi amalaba dibi dietu tuji baviga bagu, jetu botsu na jandi agu kopa jitsilabana nandi.

¹⁷Joseph amabawaka rie: Nsambi ekandisi uvaga dionyi! Dibaala adi kopa jitsilabana nandi oba muviga ami; tumba jenu basusu wendanganu na buranga ombu taji enu.

¹⁸Mbana Juda anobambana na Joseph amavosa rie: Kokolu tsiagu nyijabi yiri guvu dedi na Pharaon. Ne nana nyirondi uvosa mua diambu, fumu guyanyoyila!

¹⁹Va dibandu gumatuwivula rie: Duna taji vo muana nguji ususu?

²⁰Tumawagula rie: Nyiina, taji etu amanuna na tuna muana taji aguvu marina, agumaburulu va bununu buandi; muana eni amaba na muana nguji agumafu kala, jogu banandi tindi nguji jimosi, amasiala pinsa na taji emurondi tindi uronda.

²¹Gumaturuma rie: Mumbeyilianu yiri nyumulaba kiakiaki.

²²Jetu tumaguwagula rie: Muana agorungula ukakana na taji andi; pa okakana nandi taji andi ofu.

²³Gumatutsingula rie: Pa muana taji enu aguvu marina ageruyi nenu, dugomuendaba.

²⁴Ava tumagabuyila ombu taji etu aguvu musalitsi agu, tumamutsingula misamu miagu.

²⁵Taji etu amaturuma rie: Gabuganu uyesumba mua biguji.

²⁶Jetu tumawagula rie: Tugorungula uwenda; tumba pa muana taji etu aguvu marina aji netu, tuwenda mu mbari tugorungula ulabana na dibaala dieni pa muana taji etu agaa netu.

²⁷Taji etu amavosa netu rie: Duijabi yiri mugatsi ami Rachel amamburila baana babeji bababaala buandi.

²⁸Umosi amapala o ndagu ami, nyitasi yiri tanguji amavopulu na bibulu bibukanyi mu mbari te na namunyi ngemuemulaba!

²⁹Pa dumuembonga jandi egugu na pa olaba diambu nyufu na dufu duami duba na mambu.

³⁰Kabogu pa nyugabuga namunyi ombu taji ami, na muana andi udurondu agaa netu,

³¹ava olabila yiri muana agatsi jetu tuba na mbela jidufu dutaji etu aguvu yinunu.

³²Va julu vana nyimagana kaka mu diambu dimuana, diwendi rie: nyimavosa na taji ami rie: Pa ngomugabusa ombu gagu diambu diandi diuba va julu muru ami te na mutubu.

³³Kokolu tsiagu nsingisi usiala muviga agu va yivinga yimuana; muana akayenagabuga na baana bataji bandi.

³⁴Nyurungula ugabuga ombu taji ami pa muana agaa nami? Aa, kokolu tsiagu ngerondi ulasa taji ami maguga mamunongu egugu.