Read Punu Dibandu 45 Bible Online

Dibandu 45 - Punu bible

Dibandu 45

¹Mambu meni mamapupisa murima Joseph te na asamamuerungula uwarila va gusu batu botsu abamaba nandi. Amagamuga rie: Batu botsu palanu. Yika baana bataji bandi bamasiala ava amakejabisila anyi avu ombu gogu.

²Joseph amalila tindi ulila te na bisi Egypte bamamugulu na bisi ndagu Pharaon wandi.

³Joseph amatubulila baana bataji bandi rie: Menu la Joseph! Taji ami aki monyu? Tumba baana bataji bandi bamabakama mirima te na basamalerungula umuwagula.

⁴Joseph amaruma baana bataji bandi rie: Kwekanu ombu gami; jogu bamakweka. Amamuevosa rie: Menu la Joseph muana taji enu agu dumasumbisa ubegu o Egypte.

⁵Duyamuelaba keri na duyakenyoyila mu mbari dumansumbisa ombu batu bebaba; Nsambi amatetsa o gusu enu yiri dugofu.

⁶Dungosu dunsala dubandilanga mu bulongu tuka bilima bibeji; vakivu bilima biranu na vagoba ne ufutsa ne utsonsiga.

⁷Nsambi amatetsa o gusu yiri jenu na mikuta mienu dugotsiemuga, dubanganga tindi dilongu adimawaku kalala.

⁸Kabogu tsiri jenu adumansindiga gunu tumba Nsambi jaʼ beni; amapaga taji Pharaon na fumu ndagu andi jiotsu na yivunda yibulongu buotsu buEgypte.

⁹Lensanu nogabuga ombu taji ami na dukamutsingula rie: Nsambi amapaga fumu jibulongu buotsu buEgypte; rugʼ ombu gami guyamuetsinga!

¹⁰Ndeʼ gutsananga o bulongu buGochen: Ndeʼ na baana bagu bababaala, na baana bababaala babaana bagu na bindombu biagu na binsabi biagu na bangombi bagu na biagu biotsu; diwendi rie: gutsananga bebeli nami.

¹¹Avana nyudubungulilanga yiri dudila monyu, ndeʼ na bisi ndagu agu na biagu biotsu mu mbari vakivu bilima biranu bidungosu dunsala.

¹²Joseph amabuela rie: Jenu beni duindabi na muana nguji ami Benjamin endabi wandi yiri tsiri mutu ususu tumba meʼ beni Joseph aguivosi nenu.

¹³Wendanu yetsingulanu taji ami nana nyivu na bundumba o Egypte na nana jenu beni dutsibulabila; dukalensa nombeyila taji ami gunu.

¹⁴Amakweka ombu muana nguji andi Benjamin; bamabumbasana nolila.

¹⁵Amavaga dedi mosi na baana bataji botsu; bamabumbasana nolilanga wandi. Mbana baana bataji bamatsingusana misamu.

¹⁶Nduku jimanyava te no ndagu Pharaon yiri baana bataji baJoseph bamaruga: adina dimalasa Pharaon na basalitsi bandi ubueji.

¹⁷Pharaon amatsingula Joseph rie: Tsingula baana bataji bagu rie: Vaganu adidi: longilanu bibulu bienu mifuna, gabuganu o bulongu buCanaan;

¹⁸yelandanu taji enu na mikuta mienu, ruganu ombu gami. Nyudutsanisa o yiari yiboti yiEgypte na dukusuyila mu digumba dibulongu buebubu.

¹⁹Gukabavega musuga ubonga makalu mabulongu buEgypte ubeyila baana bogu na bagatsi bogu; nesi taji ogu.

²⁰Bayanyonga abi bosila mu mbari nyubatsanisa va mbura aji bodilila biboti biotsu bibulongu buEgypte.

²¹Baana bababaala baJacob bamavaga nana bamatsingululu. Na musuga uPharaon Joseph amabavega makalu; na amabavega biguji bimuendu wandi.

²²Amavega jogu botsu biduaru bifeta tumba amavega Benjamin biduaru biranu na kama yirieru tsimbongu.

²³Amatindila taji andi yigumi yibalumi bababuru abamaba balongulu biboti biEgypte, na yigumi yibibusi bibaburu abimalongulu ble na mapa na biguji bimuendu utaji andi.

²⁴Mbana amaganina baana bataji bandi na amabalonsa rie: Duyatsunda mu nsila, mbana bamayenawenda.

²⁵Kabogu bamagusuga o Egypte na bamatola o bulongu buCanaan ombu taji ogu Jacob.

²⁶Bamamutsingula rie: Joseph aki monyu la jandi oyirumi bulongu buEgypte. Tumba Jacob amagaangu na yinoru; asamarungula ubavayila yitu.

²⁷Jogu bamamutsingula mambu motsu ama Joseph amavosa na Jacob anolaba makalu ama Joseph amatinda umubeyila amasunsa murima andi!

²⁸Amavosa rie: Ka muna nsangu ji! Muana ami Joseph aki monyu! Nyuwenda, nyulemulaba ne ngafu.