Read Punu Dibandu 47 Bible Online

Dibandu 47 - Punu bible

Dibandu 47

¹Joseph amayelubusa Pharaon na amamutsingula rie: Baana bataji bami na taji ami bamaruyila o bulongu buCanaan na bindombu biogu na binsabi biogu na bangombi bogu na biogu biotsu, bavu o yiari yiGochen.

²Amabega baana bataji bandi baranu uyebasulasana ombu Pharaon.

³Pharaon amabawivula rie: Yisalu yienu yi? Bamawagula Pharaon rie: Jetu tuvu babungulitsi babindombu dedi mosi nana bataji betu bamabila.

⁴Bamamuetsingula Pharaon rie: Tumaruga uyitsana o bulongu buebubu mu mbari tugaa na biguji ulisila bindombu o bulongu buCanaan, dungosu dunsala dumaviolila; kabogu gukatusingisa utsana o yiari yiGochen.

⁵Pharaon amatsingula Joseph rie: Taji agu na baana bataji bagu bamaruga ombu gagu.

⁶Ndeʼ beni guijabi bulongu buEgypte; tsanisa taji agu na baana bataji bagu o yiari yibulongu ayiviolila ubueji, mbeʼ ka menu yiari yiGochen yivu yiwelimina. Sola bamosi abejabi yisalu ukelisa bibulu; bavayi bivunda bibabungulitsi bamigamba miami.

⁷Joseph amabega taji andi Jacob ombu Pharaon; Jacob amagabila Pharaon miula.

⁸Pharaon amawivula Jacob rie: Guna bilima kweʼ?

⁹Jacob amawagula Pharaon rie: Nyina kama na magumarieru mabilima abi nyimayenalingilanga yiari na yiari; nsanunu ami jimavioga mbangu; bilima bimosi bimaba biranga, bilima biami bisawelimina na bilima bibataji bami abi bamalingilanga yiari na yiari.

¹⁰Jacob amamuegabila Pharaon miula mbana amagusuga va gusu andi.

¹¹Joseph amayetsanisa taji andi na baana bataji bandi o Ramses, yiasi yibulongu buEgypte ayimaviolila ubueji nana Pharaon amamurumina.

¹²Joseph amagabila taji andi na baana bataji bandi na mukuta uotsu utaji andi biguji biwelimina na dutalu duogu.

¹³Bulongu buotsu busamamueba na biguji mu mbari dungosu dunsala dumaviolila; bulongu buEgypte na bulongu buCanaan bamabufu na duonyi.

¹⁴Joseph amasumbisa bisi bulongu buEgypte na bisi bulongu buCanaan ble na amakotisa mbongu tsieni o bilundulu biPharaon.

¹⁵Mbongu tsimasuka nesi tsibisi Egypte nesi tsibisi Canaan. Kabogu bisi Egypte botsu bamawenda ombu Joseph na bamamuvonda rie: Tuveyi biguji! Dibandu yi tufuila na nsala va misu magu mu mbari tugaa na mbongu?

¹⁶Joseph jandi rie: Pa dugaa na mbongu peyianu migamba mienu mbana nyuduvega biguji; tukasopana na migamba.

¹⁷Bamabega migamba miogu ombu Joseph agumamisopana na biguji: nesi bakabala nesi migamba mibindombu na mibinsabi na mibangombi nesi baburu. Amabavega biguji yilima yieni yiotsu abi bamasopana na migamba miogu.

¹⁸Yilima yieni yinosuka bamamuewenda ombu Joseph. Bamamulenda rie: Kokolu, fumu, tugogusuega diambu, mbongu tsimasuka kala na migamba mibiruitsi wandi mimawakusu ombu gagu; yika nyuru tsietu buandi na misiru mietu bisiali.

¹⁹Dibandu yi tufuila va misu magu, na misiru mietu migomuesalu? Tusumbi na misiru mietu gukatuveganga biguji na jetu tuba abagu na misiru mietu wandi. Tuveyi bivaru uvara yiri tugofu na misiru mietu migoba yika biriri na biriri.

²⁰Joseph amasumbila Pharaon misiru miotsu miEgypte; dungosu dunsala dumakambisa bisi Egypte te na mutu mutu amasumbisa musiru andi. Diwendi rie: Bulongu buotsu bumaba yika bujaʼ beni Pharaon,

²¹Joseph amakotisa batu o buviga ubandila o mandilu mamosi maEgypte te no masusu.

²²Dimosi buandi asamasumba misiru mibavagulitsi bapagu mu mbari vamaba mugaga uPharaon mu diambu dibavagulitsi bapagu abamakusuyila biboti biPharaon; la dibandu basamasumbisila misiru miogu.

²³Joseph amatsingula batu rie: Yiotsu ayi nyimadusumbila Pharaon na misiru mienu wandi kabogu nyuduvega bivaru abi durungula uvara.

²⁴Ava dutsonsugu duveganga yimosi mu biranu ombu Pharaon na bisusu bibina biuba bijenu beni, abina duvarisila manungi masusu na abina wandi dujanganga na baana benu na bisi mandagu menu.

²⁵Jogu bamavosa rie: Gumatuwaka kalala! Kabogu mu diambu dimaboti magu tuisingi buviga buPharaon.

²⁶La dibandu Joseph amavayila mugaga agukivu te na namunyi; mugaga eni uirumi yiri yimosi mu biranu bibiotsu biEgypte bivu biPharaon; yika misiru mibavagulitsi bapagu migekipu na Pharaon.

²⁷BaIsrael bamatsana o bulongu buEgypte o yiari yiGochen; bamadila biogu na bamaburasana te na bamafuna tindi ufuna.

²⁸Jacob amatsana yigumi na yisambuah yibilima o Egypte; yitsingu yiJacob yimaba kama na magumana na yisambuali yibilima.

²⁹Jacob amalaba yiri dufu duandi duka bebeli amanengila muana andi Joseph na amamutsingula rie: Pa guitondi, vangana pangini nami nojiwarisa na pesi yiri gugonsiyila o bulongu buEgypte.

³⁰Ava nyufuila guyabuaga mfumbi ami o Egypte, gukansiyila o bangila betu. Joseph amawagula rie: Nyuvaga nana guivosili.

³¹Jacob amamugoma ujileva. Joseph amamulevila jionyi. Mbana Jacob amasilama va tangi andi.