Read Punu Dibandu 9 Bible Online

Dibandu 9 - Punu bible

Dibandu 9

¹Nsambi amagabila Noe na baana bandi bababaala miula na amabatsingula rie: Funanu na burasananu te na butamba bubasa de.

²Bibulu biotsu bimaduwakusu nesi batsoli botsu nesi biotsu abivu va butamba nesi nyama tsimamba tsiotsu; biotsu bina biubanganga na goma na yomumu:

³biotsu abikungi na abivu monyu biuba nyama tsienu nana nyimaduveyila bivaru dedi mosi nyiduveyi biotsu bina.

⁴Dimosi buandi duyaji nyama atsisamadekisa malungu motsu mu mbari malungu la monyu.

⁵Malungu menu amavu monyu enu mobanganga nderi dibumi adi nyusuyiga; dedi mosi nyudisuyiga bibulu abiuboka batu. Nyusuyiga dibumi dimonyu mutu agumabokisa tindi muana nguji andi.

⁶Pa mutu oboka mutu, jaʼ wandi oboku na mutu nandi; mu mbari Nsambi amasunda mutu mu yikebutsu yiandi.

⁷Funanu na burasauianu te na butamba bubasa de nyidurumi rie: Burasananganu.

⁸Nsambi amamuetsingula Noe na baana bandi bababaala rie:

⁹Gufuanu pangini aji nyivangini nemi na bategula benu;

¹⁰na biotsu abivu monyu abivu nenu: nesi batsoli nesi biruitsi nesi bibulu biotsu bimusiru abimaba nenu o dikumbi dimamba, diwendi rie: bibulu biotsu.

¹¹Nana nyibanovanginina pangini nenu rie: Batu botsu bagomueboku na nyidu na vagomueba nyidu ajiubunga butamba buotsu.

¹²Nsambi amavosa rie: Ayiyi la yilimba yipangini ami jimutubu aji nyivangini nenu na biotsu abivu monyu ubandila namunyi te na mutubu:

¹³nyimasunsa muyama ami mu mamungi aguba yitimba yipangini ami vagari jetu na bisi butamba.

¹⁴Ava nyusobininanga mamungi o julu na ava muyama ulabininanga muna;

¹⁵ngolibana pangini ami va gari jetu nenu na biotsu abivu monyu bimunongu na munongu: diwendi rie: nyidu jigomuetsiemusa biotsu abivu monyu.

¹⁶Muyama uba mu mamungi; ava nyugulabilanga nyutasanga pangini aji, menu Nsambi, nyimavangana na biotsu abivu monyu bimunongu na munongu abivu va butamba.

¹⁷Mbana Nsambi amamuetsingula Noe rie: Ayiyi la yilimba yipangini ami jimutubu aji nyimavangana nenu na biotsu abivu monyu. Baana barieru bababaala baNoe.

¹⁸Miina mabaana bababaala baNoe abamapala nandi o dikumbi dimamba amama: Sem, Cham na Japhet Cham amabura Canaan.

¹⁹Abana la baana barieru bababaala baNoe: jogu bamaburasana te na batu bamamuebasa butamba buotsu.

²⁰Noe amabanda usala butamba: amavara mfuga.

²¹Anonu malamu amalanga na amasilama penyi o gari ndagu andi jitsanda.

²²Cham taji Canaan, amalaba penyi jitaji andi, amapala va gusu kana na amayeditsingula baana banguji bandi babeji.

²³Mbana Sem na Japhet bamabonga yijungi, bamayivakiga mu masambaka mogu na bamakota mansinsima uyekubiga penyi jitaji ogu; bamawenda mansinsima la dibandu basamalabila penyi jitaji ogu.

²⁴Ava Noe amasaguyila dilangi amagulu adi marina mandi amamuvayila.

²⁵Mbana amavosa rie: Mulogu ubi na Canaan! Abi musalitsi ubasalitsi babaana banguji bandi bababaala!

²⁶Amamuevosa rie: Diboti ombu Fumu Nsambi aguvu Nsambi Sem! Canaan abi musalitsi andi!

²⁷Miula miNsambi mibi na Japhet! Tumba atsani o ndagu Sem! Canaan abi musalitsi andi!

²⁸Nyidu jinokamuga Noe amabuela kama yirieni na magumaranu mabilima.

²⁹Yitsingu yiotsu yiNoe yimabayifu yikama na magumaranu mabilima; mbana amafu.