Read Punu 2 Samuel 11 Bible Online

2 Samuel 11 - Punu bible

2 Samuel 11

¹Va yitsubi vana temu aji bakaga bamawendilanga o utoga mavita, David amasindiga bivunda bibagora na Joab na bagora baIsrael botsu uyebunga baAmmon noyekanda Rabba. Tumba jaʼ beni David amasiala o Jerusalem.

²Tsisiga mosi David amaretsama va yitsiga yiandi; ava amayenalingilanga o julu muansa undagu andi, amalabilila mugetu ubuila ebuili. Mugetu eni amaba tindi muboti.

³David amawivula rie: Mugetu aguna, anyi? Bamamuwaka rie: Tsiri Batcheba muana mugetu uEliam aguvu mugatsi uUrie muisi Hitt?

⁴David amasindiga bilumbi uyemunengila. Amawenda ombu gandi na amasilama nandi. (Abanokeliomisa mu diambu ditsungi andi.) Mbana amagabuga o ndagu andi.

⁵Batcheba amadila dimi, amatinda yilumbi uyetsingula David rie: Nyimadila dimi.

⁶Vana vana David amatinda diruma diedidi ombu Joab rie: Tindili Urie muisi Hitt. Joab amatinda Urie ombu David.

⁷Urie amawenda ombu David agumamuwivula bivu mu diambu diJoab na mu batu botsu na nana divita diwendili.

⁸Mbana David amaruma Urie rie: Wenda o ndagu agu, leyevuma mua pesu. Urie anopalila o ndagu kaga, mutu amamuduka na mua bima abi kaga amamutindila.

⁹Tumba Urie amasilimina va munu ndagu kaga va mosi na bagora abamakelisanga kaga, asamatola o ndagu andi.

¹⁰Bamayetingula David rie: Urie agaatola o ndagu andi. David amawivula Urie rie: Gugeruyili o ulinga? Dibandu yi gugaawendila o ndagu agu?

¹¹Urie amawaka David rie: Yigara yipangini na dibadi diIsrael bivu o mandagu mamatsanda, nesi fumu ami Joab na bagora bandi bavu o milaku; ne nana nyuwenda o ndagu ami uyeji nonu nosilama na mugatsi ami? Tsatsabi, ndeʼ beni guidijabi, ngorungula udivaga.

¹²David amaruma Urie rie: Muesilimina vava namunyi, mugesa nyuguganina. Yilumbu yieni na yimubeji Urie amamuesilimina o Jerusalem.

¹³David amamunengila oyeji nonu nandi na amamulansa. Tumba ava tsisiga Urie amayesilama na bagora abamakelisanga kaga, diwendi rie: asamatola o ndagu andi.

¹⁴Ava kedi David amasonina Joab muganda; amatinda uonyi na Urie.

¹⁵Amasona muna muganda eni rie: Viosa Urie o yiari ayi divita divu na mangolu, jenu dukakakana nandi yiri odimbu te na ofu.

¹⁶Joab amakanda musiengi na amaviosa Urie o yiari yibavinitsi ayimakelusu na bagora bamangolu.

¹⁷Bisi musiengi bamakunsa diviogulu na bamayetoyisa baJoab; bapuela va gari bagora baDavid bamaberuga na Urie muisi Hitt amaboku wandi.

¹⁸Joab amatinda yilumbi uyetsingula David motsu amamalabana o divita.

¹⁹Amaruma yilumbi diruma diedidi rie: Gunomana utsingula kaga misamu miotsu midivita,

²⁰tanguji onyoga kabu na oguwivula rie: Dibandu yi dutsibambinina na musiengi o utoga? Gugejabi yiri betindi mbansa nesi o julu jibivaga?

²¹Anyi amaboka Abimelek muana dibaala uYeroubaal o Tebes? Tsia mugetu agumaba o julu yivaga amamutinda yibuku yiyidu? Tsia o Tebes amafuila? Dibandu yi dutsibambinina o yivaga? Mbana gukamutsingula rie: Urie muisi Hitt amafu wandi.

²²Yilumbi amawenda; anotola amatsingula David bulumbi buJoab rie:

²³Batu beni bamatuviolila mangolu; bamakunsa diviogulu ombu getu na jetu tumabagabusa te no dikotulu dimusiengi.

²⁴Banongitsi bambansa abamaba o julu yivaga bamatutindila mbansa; bagora bapuela bamaboku na Urie muisi Hitt amafu wandi.

²⁵David amatsingula yilumbi rie: Guyetsingula Joab adidi rie: Guyalaba murima utsira, anana divu o divita; manina mangolu magu utumuna musiengi te na gugupansa. Ndeʼ gukamuwarisa!

²⁶Mugatsi uUrie amagulu yiri mulumi andi amafu na amamulilanga.

²⁷Bukuili bunosuka David amasindiga mutu uyemulanda na amamukelisa o ndagu andi. Kabogu amamuwela na amamuburila muana dibaala. Adi David amavaga disamalasa Fumu ubueji.