Read Punu 2 Samuel 14 Bible Online

2 Samuel 14 - Punu bible

2 Samuel 14

¹Joab muana dibaala uSerouia amalaba yiri kaga amabanda udetsa murima mu diambu diAbsalom.

²Amasindiga mutu o Tecoa uyenengila mugetu agumaba na malengu na amamutsingula rie: Gukavaga nderi guvu mukuili na gukaduara biduaru bibukuili; guyagolila matsi, gukaba nderi mugetu aguililingi yitsingu yineni.

³Guwenda ombu kaga na gukamutsingula motsu ama nyugulonsa. Joab amamulonsa ama oyevosa.

⁴Mugetu eni amayevosa na kaga, amakebuaga va tsi mbana amavosa rie: Aa kaga, kwaki kalala!

⁵Kaga amamuwivula rie: Diambu yi? Amawaka rie: Menu nyivu mukuili, mulumi ami amafu!

⁶Nyimaba na baana babeji bababaala. Jogu bamatsundanga o manungi na basamaba na mutu ubagalana, umosi va gari ogu amadimba muana nguji te na amamuboka.

⁷Va julu vana mukuta ami uotsu bamanyoyila na bamatuma rie: Tuveyi agumadimba muana nguji andi. Tuirondi umubokisa umugabusila pila jimuana nguji andi agu amaboka, diuleba avu mubialitsi disiala, tumuboka! Pa bedivayi ngosiala na mutu, diina dimulumi ami diutsiemuga mutubu.

⁸Kaga amatsingula mugetu eni rie: Gabuga o ndagu agu. Nyuvega maruma mu diambu diagu.

⁹Mugetu eni amatsingula kaga rie: Aa kaga, mbela eni jiuba va julu muru ami nesi umukuta ami; kaga na bufumu buandi bugaa muna.

¹⁰Kaga amavosa rie: Pa mutu oguvosila diambu, gukamumbeyila, agomuegulasa maguga.

¹¹Mugetu eni amavosa rie: Kaga rangimina Fumu Nsambi agu yiri mugabusilitsi pila jimalungu agoviosulila dubungu na bayaboka muana ami! Mbana kaga amavosa rie: Fumu ejabi! Muana agu agolaba ne diambu dimosi.

¹²Mugetu eni amamuevosa rie: Nyirondi uvosa diambu nagu. Kaga amavosa rie: Vosa!

¹³Mugetu eni amawivula rie: Dibandu yi guitasili batu baNsambi matasa mamunongu eni? Kaga amakevega mbela na posulu tsiandi mu mbari asamamuerangimina muana dibaala agu amabinga.

¹⁴Dingensa jetu botsu tufu na tubagunu nderi mamba amamapumuga va tsi na amamakota mutubu mu butamba. Nsambi ekipi batu na agaa na nsala ugukiga abamabingu?

¹⁵Nyimaruga uyivosa nagu kaga mu mbari batu bamandasa goma. Nsitasa rie: Nyuyevosa na kaga, tanguji kaga opayila adi nyumutsingula.

¹⁶Nyiina, kaga okulu na okwaka kalala ombu jandi oyirondi ututsiemusa jetu na muana ami dibaala atuvu abaNsambi.

¹⁷Nyimavosarie: Posulu tsifumu ami aguvu kaga tsipeyi murima usunda. Kaga avu nderi yiansa yiNsambi, avu limba ugulu maboti na mabi. Fumu Nsambi agu abi nagu!

¹⁸Kaga amagabusila mugetu eni rie: Guyansuega adi nyuguwivula. Mugetu eni amawakarie: Kakwivuli!

¹⁹Mbana kaga amawivula rie: Je Joab asamakunsa kingu nagu? Mugetu eni amawaka rie: Fumu ejabi, dingensa, fumu ami, nyiyafura! Joab amapega maruma na amandonsa uvosamambu meni motsu.

²⁰Joab amadivaga yiri guvinsa kingu. Tumba ndeʼ guna diela wandi adivu dedi na diyiansa yiNsambi ujaba motsu amevioyi.

²¹Kaga amatsingula Joab rie: Nyisingi adiagu; leyelanda Absalom.

²²Joab amakebuaga va tsi va gusu kaga na amavosa rie: Aa kaga, nyijabi namunyi yiri gumakabila maboti mu mbari gumavaga nana nyimavosila.

²³Mbana Joab amarelama; amawenda o Guechour na amagabusa Absalom o Jerusalem.

²⁴Tumba kaga amavosa rie: Awendi o ndagu andi ngerondi umulaba. Absalom amawenda o ndagu andi tsiri ulabana na kaga.

²⁵O Israel jiotsu vasamaba mutu agumaba dedi na Absalom; ubandila na makulu mandi te no muru, asamaba na yifu.

²⁶Yilima na yilima amarumanga mutu utabula nanga tsiandi mu mbari utsira utsionyi umamukambisanga. Utsira unanga tsieni atsimatabulu umawetsugu kilu beji na mudodu ukaga.

²⁷Absalom amabura baana barieru bababaala na muana umosi umugetu, diina diandi Tamar, agumaba tindi muboti.

²⁸Absalom amatsana bilima bibeji o Jerusalem, tsiri ulabana na kaga.

²⁹Yilumbu yimosi Absalom amanengila Joab yiri omusindiga ombu kaga tumba Joab asamamuwagula. Amamunengila adimubeji, tumba Joab amamuebusa uwagula.

³⁰Mbana Absalom amatsingula basalitsi bandi rie: Duilabi nungi jiJoab, nungi eni jiorsa ajibambini na ajiami; yejinyensanu. Basalitsi baAbsalom bamayenyensa nungi eni.

³¹Mbana Joab amarelama nowenda ombu Absalom o ndagu andi. Amamuwivula rie: Dibandu yi basalitsi bagu batsinyensila nungi ami?

³²Absalom amawaka Joab rie: Nyimagunengila rie: Ruga gunu, mbana nyugusindiga ombu kaga yiri guyemuwivula rie: Dibandu yi nyimaruyila O Guechour? Uviolila ubueji yiri mbe nyimasiala guna. Nyina nsala ulabana na kaga; pa nyina mbela amboki!

³³Joab amawenda na bulumbi buAbsalom ombu kaga. Mbana kaga amanengila Absalom; amawenda ombu gandi nogudama va tsi va gusu andi. Kaga na Absalom bamabumbasana.