Read Punu 2 Samuel 18 Bible Online

2 Samuel 18 - Punu bible

2 Samuel 18

¹David amagukiga bagora abamaba nandi na amabasolila basefu babatosini na babakama.

²Amavega durumu dudikabu dimosi mu marieru dibagora ombu Joab muana dibaala uSerouia na dikabu disusu ombu Abichai muana taji Joab na dikabu disusu ombu Ittai muisi Gat. Mbana kaga amatsingula bagora rie: Meʼ wami nyirondi uwenda nenu.

³Tumba bagora bamagamuga rie: Guyawenda! Mu mbari pa turina tsiri diambu diviolila uroga; na pa bamosi va gari etu boboku tsiri diambu diviolila uroga; tumba ndeʼ guiviolili ne yigumi yitosini, kabogu diviolila ubueji yiri gusiala o musiengi, avana gurungula ututindila abotuwamusa.

⁴Kaga amabawaka rie: Nyuvaga adi duilabi diwelimina. Kaga amasikama va mugula udikotulu dimusiengi ava batu botsu bamapalilanga mu bakama bakama na batosini batosini.

⁵Kaga amavega Joab na Abichai na Ittai diruma diedidi rie: Kebananu na Absalom! Bagora botsu bamagulu diruma dikaga adi amaruma basefu botsu mu diambu diAbsalom.

⁶Bagora baDavid bamapalila mu misiru uyenabengusana bagora baAbsalom, bamatoyila o musiru uEfraim.

⁷Avana bagora baAbsalom bamabetsulu na bagora baDavid. Muna yilumbu yieni vamaba dubudama duneni dumagumabeji matosini tsibabaala.

⁸Divita dimanyava mbanda tsi jiotsu na batu abamatsiemuga dinyanyi bamaviolila abamaboku muna yilumbu yieni.

⁹Absalom amabenguna na bagora baDavid. Absalom amatsana va julu buru ajimavioga o tsi bitayi biterabeta; amasiala ulelama va yiliyili na buru jimavioga kuasa.

¹⁰Gora jimosi jiDavid anodilaba amayetsingula Joab rie: Nyimalaba Absalom aviunga mu terabeta.

¹¹Joab amamuwivula rie: Ngensa? Dibandu yi gugaamubokila? Mbe nyimagusaka yigumi yibibuku bilora jivema na beleeti.

¹²Tumba gora eni amatsingula Joab rie: Ne pa gupega tosini tsibibuku bilora jivema ngoboka muana kaga; mu mbari tumarumu diruma adi kaga amaduruma, jenu na Abichai na Ittai rie: Mutu mutu akebini na Absalom.

¹³Divu diwelimina usumuna diruma dikaga? Mbe nyimamuboka mbe diambu diujabunu te nombu kaga na ndeʼ gugopega mbela?

¹⁴Joab amagamuga rie: Jusuga, ngerondi ugulu kulini tsiagu! Mbana amabonga mabaga marieru; amarasuna Absalom aki monyu o terabeta na amamunonga mabaga va dubansi.

¹⁵Yigumi yibagora abamabeganga bitogulu biJoab bamatsiengila Absalom, bamamudimba te na bamamulukula.

¹⁶Mbana Joab amasiyisa mumbanda usikiga divita; bagora baDavid bamadunda ubingisa bagora baAbsalom.

¹⁷Bamabonga mfumbi jiAbsalom, bamajibuaga o yiduna yineni o gari musiru na bamamuvika dimanyi dineni va julu. Bagora baAbsalom bamarina, mutu mutu o ndagu andi.

¹⁸Ava Absalom mbe akivu monyu amakerungila yirangumunu o yibususu yikaga; mu mbari amavosanga rie: Ngaa na baana bababaala aborungula uba yirangumunu yiami. Amaluga yirangumunu yieni tindi diina diandi, te na namunyi yinengulungu rie: Yirangumunu yiAbsalom.

¹⁹Ahimaas muana dibaala uSadoc amavosa rie: Nyuwenda mbangu uyetsingula kaga musamu yiri Fumu amamuwaka kalala ombu bavinitsi bandi.

²⁰Joab amamutsingula rie: Tsi namunyi, yilumbu yisusu uyemutsingula mu mbari namunyi muana kaga atsifu.

²¹Joab amaruma Kuchi rie: Wenda yetsingula kaga adigutsilaba. Kuchi amagudama va gusu Joab mbana amawenda mbangu.

²²Ahimaas muana dibaala uSadoc amamuetsingula Joab rie: Vagaa diambu nsingisi uduka Kuchi. Joab amawivula rie: Mbatsi ami, dibandu yi guirondili uwenda? Yi gudila mu dionyi?

²³Ahimaas amavosa rie: Vagaa diambu nyirondi uwenda. Joab amamutsingula rie: Ka wendanga! Ahimaas amavioyila o nsila kumu na amareyila Kuchi utola.

²⁴David amaba atsana va gari miunu mindagu mibeji. Mukelisi ndagu amamata o julu muansa va nsungisini na munu ndagu, vana o julu yivaga amabuaga misu; amalaba dibaala eruyi mbangu wandi pinsa.

²⁵Mukelisi ndagu amagamuga na amalubusa kaga. Kaga amavosa rie: Pa avu pinsa, misamu miboti etubeyili. Na dibaala dieni yika ubambana ebambini

²⁶mukelisi ndagu amalabilila dibaala disusu eruyi mbangu; amagamuyila mbatsi andi rie: Labati dibaala eruyi mbangu wandi pinsa. Kaga amavosa rie: Na jaʼ wandi misamu miboti etubeyili.

²⁷Mukelisi ndagu amavosa rie: Kwenditsi mbangu ji-agutega nyilabi nderi jiAhimaas muana dibaala uSadoc. Mbana kaga amavosa rie: Mungo maboti, nyijabi etubeyili misamu miboti.

²⁸Ahimaas anotola amagamuga rie: Motsu mavu buranga! Amagudama va gusu kaga na amavosa rie: Diboti ombu Fumu Nsambi agu agumaguwakisa jogu abamaronda utoga nagu.

²⁹Kaga amawivula rie: Absalom aji mua buranga? Ahimaas amawaka rie: Nyimalabilila kindu jineni ava Joab atsitusindiyila, jetu na musalitsi ususu; tumba ngejabi adibetsi.

³⁰Mbana kaga amavosa rie: Lesikama vana. Ahimaas amasikama.

³¹Vana vana Kuchi amatola. Amavosa rie: Kaga, fumu ami, agulu musamu uboti! Namunyi Fumu amalasa dusungugu duagu; amaguwaka kalala ombu jogu abamaronda utoga nagu.

³²Kaga amawivula Kuchi rie: Absalom aji mua buranga? Kuchi amawaka rie: Bavinitsi bagu botsu abavu na kueru nagu babi nderi mufudu eni avu namunyi!

³³Mbana kaga David amagaangu na yinoru; amamata o yibuku yindagu yijulu va nsungisini na munu ndagu na amalila. Amagamuga ava amawendila rie: Muana ami Absalom! Muana ami, muana ami Absalom! Mbe nyimafu va yivinga yiagu! Absalom! Muana ami! Muana ami!