Read Punu 2 Samuel 20 Bible Online

2 Samuel 20 - Punu bible

2 Samuel 20

¹Vamaba mutu mubi vana diina diandi Cheba, muana dibaala uBikri, muisi Benjamin. Amasiga mumbanda na amavosa rie: Tugaa na nsala David, tugaa na yipoti na muana Jesse! Jenu baIsrael, mutu mutu agabusili o ndagu andi!

²Mbana baIsrael bamosi bamakakana na David na bamaduka Cheba. Tumba baJuda bamakevega ombu kaga ogu na bamayemuvetsiga ubandila o mujamba uJourdain te no Jerusalem.

³David anotola o Jerusalem amaromba bagatsi bandi aba amasila ukelisanga ndagu. Amabavega mbura utsana ajimakelusungu na bagora, amabaveganga biguji tumba asamamuefubana yitsiga nogu. Kabogu te na dufu duogu basamapalanga; bamakeiusu nderi bakuili.

⁴Kaga amatsingula Amassa rie: Nyiguveyi bilumbu birieru, nengila bagora baJuda; jenu botsu dukatasuna.

⁵Amassa amawenda uyenengila baJuda tumba amaviosulila bilumbu abi kaga amamuvega.

⁶Mbana David amatsingula Abichai rie: Cheba muana dibaala uBikri otuvaga dibi ne uviolila Absalom. Bonga bagora bami na dukanu Cheba yiri agokekotila misiengi noturina.

⁷Abichai amawenda na bagora baJoab na baCrete na baPeletie; diwendi rie: bagora abamaba na tindi mangolu bamayenamudukanga; bamarambuyila o Jerusalem uyenadukanga Cheba.

⁸Bamatola bebeli na dimanyi dineni adivu o Gabaon ava Amaasa amabarasuna. Joab amaduara dijenga va julu biduaru biandi; dimaba mu yisupu na amadiduara mu dilungu. Ava amayenawendilanga dimabonduga.

⁹Joab amawivula Amassa rie: Guji mua buranga? Mbana amagaanga yedu yiAmassa na dikaka diandi dimabaala ava amamubumbila.

¹⁰Amassa asamamuekipa dijenga adimaba va dikaka disusu diJoab; Joab amamusaka mu moji na misopu miandi mimapala va tsi; Amassa amafu na disaka dimosi buandi. Joab na muana taji andi Abichai bamaduka Cheba.

¹¹Gora mosi jiJoab amasiala na mfumbi jiAmassa na amagamuyila abevioyi rie: Vioganganu! Vioganganu! Aberondi David dukanu Joab!

¹²Amassa amayenagolananga malungu vana tima nsila; gora eni anolaba yiri bagora usikama besikimingi amasindila mfumbi va mugula nsila na amajigumba yiduaru.

¹³Banojigusula va nsila bagora bamaduka Joab uyenabingisa Cheba.

¹⁴Joab amavioga bifumba biotsu biIsrael o yiari yiAbel-Bet-Maaka na baBerite botsu bamagungasana na bamamuduka.

¹⁵Bamayekanda Cheba o Abel-Bet-Maaka, diwendi rie: bamarunga bikadi abimaba dedi na bivaga. Batu botsu abamaba na Joab bamasindilanga yibaga na ditasa uyibeta.

¹⁶Mbana mugetu agumaba na diela amamata o julu yibaga na amagamuga rie: Guluanu, guiuanu! Kokolu tsienu tsingulanu Joab rie: Bambana gunu nyirondi uvosa nagu!

¹⁷Amabambana ombu gandi; mugetu eni amawivula rie: Ndeʼ la Joab? Amawaka rie: Nyiina! Mbana mugetu eni amamutsingula rie: Gukagulu ama nyigutsinguli. Amawaka rie: Vosanga.

¹⁸Mugetu eni amavosa rie: Va kala tumaba na yifu uvosa rie: Bayewivula Abel! Anana diambu diotsu dimasukilanga.

¹⁹Musiengi etu uvu na tindi maboti na tuvu tusigama o Israel na ndeʼ guirondi ubunga musiengi aguvu nderi nguji jibaIsrael? Dibandu yi guirondili ubunga disiala diFumu?

²⁰Joab amawakarie: Viaga, tsatsabi! Ngaa na ditasa upansa nobunga musiengi.

²¹Tsiri nana. Tumba dibaala dimosi adivu muisi mukongu uEfraim, diina diandi Cheba muana dibaala uBikri ana kueru na kaga David, muwakisianu wandi pinsa, mbana nyukakana na musiengi. Mugetu eni amatsingula Joab rie: Diwelimina, muru andi ugutindulu o julu yibaga.

²²Mugetu eni amawenda ombu batu na diela diandi; bamatabula Cheba muru na bamagutindila Joab. Joab amasiga mumbanda; kabogu Joab amagabuga ombu kaga o Jerusalem.

²³Joab amarumanga dibadi diotsu diIsrael; Banaya muana dibaala uYoyada amarumanga baCrete na baPeletie;

²⁴yisalu yiAdoram yimaba ubonga lepu, Yochafat muana dibaala uAhiloud amakipanga miganda mikaga;

²⁵Cheva amaba musonitsi; Sadoc na Abiatar bamaba bavagulitsi bapagu;

²⁶Ira muisi Yair amaba muvagulitsi upagu uDavid.