Read Punu 2 Samuel 22 Bible Online

2 Samuel 22 - Punu bible

2 Samuel 22

¹David amawimbilila Fumu duimbu duedudu ava Fumu amamuwakila kalala ombu bavinitsi bandi botsu, sinsi viri Saul

²Amawimbila rie: Fumu avu dimanyi diami. Ekayi na ekobuli.

³Nsambi avu dimanyi diami adi nyisuemini, ngubu ami na mangolu amekobuli na divumunu diami na yisuemunu yiami. A Fumu, guikwaki kalala mu purulu.

⁴Nyigamuyi rie: Duyitsu ombu Fumu! Nyimawaku kalala ombu bavinitsi bami.

⁵Mu mbari dufu dumandiamisa nderi mipupila;

⁶mbura jiabafu jimambamiga nderi nyimatungu na mikudu, dufu dumansutusu nderi murambu.

⁷Nesi mu munyongu ami nyimasambila Fumu, guna ndagu andi amagulu diufi diami nesi mugamu ami.

⁸Butamba bumakungusu na bumaregama, julu jimapupa; bimasisana mu mbari Fumu amanyoga.

⁹Nsumbili jimapalila miunu mimbasu andi, muji aguisielisini umapalilia munu andi, magala mamapansiga yiari na yiari.

¹⁰Fumu amagudiga julu na amasunduga: vamaba tindi dimungi o tsi matambi mandi.

¹¹Amanangama va julu yiansa na amapurumuga, amalabana va julu mapapi mapunga.

¹²Amagumba pisama nderi ndagu jitsanda, amapietu maguki mamamba na mamungi maneni.

¹³Mu yijalala ayimarelanga va gusu andi mumapalanga magala mamuji.

¹⁴Fumu amasiga yidumi yiandi o julu, Nsambi Aguvu Uneni amagulusu diufi diandi.

¹⁵Amatinda mbansa na amapansa bavinitsi bami, amatinda kaki na amabapansa.

¹⁶Misilulu mimubu mimalabana dugungu dubutamba dumalabana bukanyi buFumu nesi na mangolu mayivumu yiandi.

¹⁷Guna julu ensambi dikaka na ekangi, amansabula mijamba mineni;

¹⁸Amakwaka kalala ombu muvinitsi ami aguvu na mangolu, nombu bavinitsi bami abamapiolila mangolu.

¹⁹Amansutusu yilumbu ayi nyimalabila munyongu tumba Fumu amaba tsiku ami.

²⁰Amansunsa va mbura ajivu vumbila, amakwaka kalala mu mbari etondi.

²¹Fumu amapayila dedi na dusungugu duami, amansaka dedi mosi na ulioma umakaka mami.

²²Mu mbari nyimakipa bifu biFumu, nyisamba na mbela va gusu Nsambi ami.

²³Maruma mandi motsu mamaba nami, nyisamaliyila migaga miandi nsima.

²⁴Nyisamaba na nsiembu ombu gandi, nyimakekelisa yiri ngoba na dibi.

²⁵Fumu amansaka dedi na dusungugu duami na ulioma uami va gusu andi.

²⁶Fumu guvu usigama, ombu jandi aguvu usigama. Gugesiembi agugaa na nsiembu.

²⁷Guikelasa ulioma ombu jandi aguvu ulioma. Ombu mutu mubi guimulasi ubiva uandi.

²⁸Ndeʼ gugobuli batu abekesunsa, yisuisu yiagu yisundusi bango dunangu.

²⁹Aa Fumu ami, nyiina, guvu yijalala yiami! Guitsiemusi pisama ami.

³⁰Va mosi nagu nyitumuni dibadi, dibadi adivu na bitogulu, na mangolu maNsambi ami nyilobuyi yibaga.

³¹Nsambi egugu avu mulonsi-nsila agugepembusi batu, mbembu andi jigevinsi kingu; avu ngubu jijogu aberondi usuema ombu gandi.

³²Anyi avu Nsambi? Tsiri Fumu? Anyi avu dimanyi? Tsiri Nsambi etu?

³³Nsambi avu yisuemunu yiami ayigopansu ekwendisi mu nsila jisungama.

³⁴Elengisi makulu mami nderi matsiesi, ensunsi va mbura tsinanguga.

³⁵Esalisi makaka mami o divita, miogu miami miduti pita tsikunga.

³⁶Fumu guvu nderi ngubu ajikayi na guikobuli; guikwaguli na guvu mangolu mami.

³⁷Gumajeyisa nsila ami na ngesietuyi.

³⁸Nyibingisi bavinitsi bami na nyibabungi. Ngegabuyi pa nyisakababunga.

³⁹Nyibabungi na nyibapansi na bagemuerelama via; beberuyi va gusu ami.

⁴⁰Gumapega mangolu utoga divita, gumasundusa bavinitsi bami.

⁴¹Guiyingusi bavinitsi bami na betini, nyiboki jogu abepini.

⁴²Begengili yiari na yiari tumba mutu agebawaki kalala!

⁴³Begamuyili Fumu! Jandi agebawaguli! Nyimabalasa yisonyi te na bamaba tsokudu tsokudu.

⁴⁴Guipeyi ndunga na misosi mibatu bami; gumansola uruma malongu; batu aba nyisamalejabanga bamakaluga basalitsi bami.

⁴⁵Baana bababaala bamuenyi bekitsi. Yiotsu ayi begululu diina diami, bekululu.

⁴⁶Baana bababaala bamuenyi bamabetsu, bepali mu bisuemunu biogu noregama.

⁴⁷Fumu ejabi! Duyitsu ombu dimanyi diami!

⁴⁸Nsambi avu mugabusilitsi ami upila eviosi batu o tsi durumu duami.

⁴⁹Amatinisa ombu bavinitsi bami, gumansingisa uruma bavinitsi bami, gumakwaka kalala ombu mungo dikasi.

⁵⁰Aa Fumu ami, la dibandu nyugu-yitsilanga! Nyuwimbilanga bundumba budiina diagu.

⁵¹Fumu elungisi kaga agumasolu nandi; elasi yingeba yiandi ombu yibiatsi yiandi, ombu David na bategula bandi te na mutubu.