Read Punu 2 Samuel 5 Bible Online

2 Samuel 5 - Punu bible

2 Samuel 5

¹Bifumba biotsu biIsrael bamawenda ombu David o Hebron na bamavosa rie: Guluati, jetu nenu tuvu mbembu jimosi na mukuta umosi.

²Kala kala, ava Saul amabila kaga etu, gumawendisanga bagora baIsrael o mavita; na gumabagabusanga. Fumu amaguruma rie: Gukabungulanga batu bami baIsrael na gubanganga sefu jiIsrael.

³Bivunda biotsu biIsrael bamawenda ombu kaga o Hebron. David amavangana pangini nogu va gusu Fumu o Hebron. Bamabiatsa David kaga jiIsrael.

⁴David amaba na magumarieru mabilima ava amabiatsulu kaga na amarumanga magumana mabilima.

⁵Ava amabila o Hebron amarumanga baJuda yisambuali yibilima na yibuku; o Jerusalem amarumanga baIsrael botsu va mosi na baJuda magumarieru na bilima birieru.

⁶Kaga David na badukitsi bandi bamaweliga ubonga Jerusalem. BaJebusie abamaba bisi bulongu bamaisingula David rie: Gugoruga gunu, nesi bidunga nesi bitsondu bogubinga! Diwendi rie: Bamatasa David agorungula ukanda musiengi.

⁷Tumba David amabonga musiengi uSion agumaba na bivaga; amaguluga musiengi uDavid.

⁸Muna yilumbu yieni David amavosa rie: Pa mutu erondi ubelisa baJebusie amati o mudungutu ubadala. Nyivini tindi uvina bitsondu bieni na bidunga bieni! La dibandu bevosili rie: Bidunga na bitsondu bayakotusu o Ndagu Fumu.

⁹David anotsana o musiengi ukandu amaguluga musiengi uDavid. Amarungila bivaga yiari na yiari te no gusu kana Millo.

¹⁰Buneni buDavid bumaviolila uroga mu mbari Fumu Nsambi Israel amabanganga nandi.

¹¹Hiram kaga jiTyr amatinda bilumbi ombu David na tsimbi tsisedera na barungitsi bamandagu na bapakitsi bamamanyi abamayerungila David ndagu.

¹²David amatsiyisa yiri Fumu amamuwarisa mu bukaga buIsrael na amaroyisa bufumu buandi mu diambu dibatu bandi baIsrael.

¹³Anoruyila o Hebron David amamuebonga maronda na bagatsi baJerusalem, bamamuburila baana bababaala na babagetu.

¹⁴Miina mabaana bandi bababaala abamaburulu o Jerusalem amama: Chammoua na Chobab na Natan na Salomon

¹⁵na Ibar na Elichoua na Nefeg na Yafia

¹⁶na Elichama na Eliada na Elifelet.

¹⁷BaPhilistin bamagulu yiri David amabiatsu kaga; baPhilistin botsu bamawenda uyenamuromba. David anolubusu amawenda o musiengi ukandu.

¹⁸BaPhilistin banotola bamabasa o yibususu yibaRefaim.

¹⁹David amawivula Fumu rie: Nyuyetoga na baPhilistin? Gubawakisa ombu gami? Fumu amatsingula David rie: Wendanga, nyuwakisa baPhilistin ombu gagu.

²⁰David amatola o Baal-Perassim agu amababelisila mbana amavosa rie: Dedi mosi nana nyidu jipumuyili anana Fumu amapansila bavinitsi bami. La dibandu amaluyila mbura eni Baal-Perassim.

²¹BaPhilistin bamasila bakosi bogu vana, David na batu bandi bamayenababega.

²²BaPhilistin bamamuewenda na bamayebasa o yibususu yibaRefaim.

²³David amamuewivula Fumu; Fumu amamugandisa rie: Guyawenda; gukavioga o nsima ogu, gutolila ombu gogu va nsungisini na musiru umikokolia.

²⁴Ava gugululu mikindu o mandeka mamikokolia, vola muendu mu mbari Fumu amarela o gusu agu ugubelisila bagora babaPhilistin.

²⁵David amavaga adi Fumu amamuruma na amabelisa baPhilistin ubandila o Gueba te no Guezer.