Read Punu 2 Samuel 7 Bible Online

2 Samuel 7 - Punu bible

2 Samuel 7

¹Kaga David amatsana o ndagu andi. Fumu amamuwaka kalala ombu bavinitsi bandi abamatsananga yiari na yiari bibufumu buandi.

²Yilumbu yimosi kaga amatsingula Natan mubiyitsi rie: Labati, nyitsani o ndagu ajimarungu na misedera na yigara yipangini yiNsambi yivu o ndagu jitsanda. Yi guitasi?

³Natan amawaka kaga rie: Wenda yevaga diotsu adi guitasi mu mbari Fumu aji nagu.

⁴Ava mukolu Natan amagulu diufi diFumu adimavosa rie:

⁵Wenda yetsingula musalitsi ami David rie: Fumu jandi rie: Ndeju gugotungila ndagu aji nyutsaninanga.

⁶Ubanda na yilumbu ayi nyimapalisa baIsrael o Egypte te na namunyi nyisakatsananga muna ndagu; nyimayenalinganga o gari ndagu jitsanda nesi o Ndagu Yibenguna.

⁷Mu mbura tsiotsu atsi nyimalinga na baIsrael, je nyimavosa diambu na mutu mu bifumba biIsrael agu nyimarumu ubungulanga batu bami baIsrael? Je nyimawivula rie: Dibandu yi dugetungili ndagu na tsimbi tsisedera?

⁸Gukatsingula musalitsi ami David rie: Fumu Israel jandi rie: Nyimagusola ava gumabila mubungulitsi ubindombu, gumayenadukanga bindombu; nyimagusola uba sefu jibatu bami baIsrael.

⁹Nyimabanganga nagu mu mbura tsiotsu atsi gumawendanga, nyimaboka bavinitsi bagu botsu va misu mag, nyimaroyisa diina diagu dedi mosi na miina mabakaga basusu.

¹⁰Nyuvega batu bami baIsrael mbura ajiuba jijogu beni na bagomuepupusu, batu babi bagomuebalasa maguga nana na kala;

¹¹ava baIsrael bamarumunu na bansonsi. Nyimaguvega yivumu ava nyimaguwakila kalala ombu bavinitsi bagu. Meʼ beni Fumu nyivosi rie: Nyuguvega bategula.

¹²Ava bilumbu biagu biudugulu na gutsigulu na bataji bagu, nyuvinsa muana agu va yitsiga yiagu na nyuwarisa durumu duandi.

¹³La jandi agutungila Ndagu na nyuwarisa yitsiga yibufumu buandi te na mutubu.

¹⁴Nyuba taji andi na jandi oba muana ami udibaala. Pa ovaga dibi nyumukilisa nana taji ekilisi muana;

¹⁵tumba ngogusula durondu duami ombu gandi nana nyimadugusulila ombu Saul agu nyimabusa va misu magu.

¹⁶Mukuta agu na durumu duagu bigotsiemuga te na mutubu, yitsiga yiagu yibufumu yiuba yiwara te na mutubu.

¹⁷Natan amayetsingula David mambu meni motsu ama Fumu amamulasa mu yiriariamu.

¹⁸Kabogu kaga David amakelasa ombu Fumu na amamuwivula rie: Fumu Nsambi menu la nyi na yi yivu na mukuta ami yiri gumambatisa nana?

¹⁹Va julu motsu mana Fumu Nsambi, guivosi wandi mu diambu dimukuta umusalitsi agu mu temu atsiuruga? Aa Fumu Nsambi, ndeʼ guirondi ujabisa yifufu nana menu motsu mana?

²⁰Diambu yi menu David nyurungula uvosa va julu vana? Fumu Nsambi ndeʼ beni guinjabi!

²¹Mu diambu dipangini agu na murima agu gumavaga mambu meni motsu maneni ama nyijabi.

²²Fumu Nsambi ndeʼ guvu tindi muneni! Mu mbari vagaa ne mutu mosi agu vu dedi nagu na vagaa Nsambi jisusu yika ndeʼ.

²³Va dilongu vava tsi adibagunu na batu bagu baIsrael? Tsia jogu bavu dilongu adi Nsambi amayikobula yiri boba batu bandi? Uroyisa diina diagu gumadugusulu bimaga bineni ombu getu nesi dilongu dietu ava gumabungila bisi Egypte na bansambi bogu.

²⁴Ndeʼ gumawarisa batu bagu baIsrael yiri boba batu bagu te na mutubu na ndeʼ Fumu Nsambi guvu Nsambi ogu.

²⁵Kabogu Fumu Nsambi warisa diambu adi gumavosa mu diambu diami na dimukuta ami na vaganga nana gumavosila.

²⁶Diina diagu didodusungu te na mutubu yiri batu bovosa rie: Nsambi Israel avu Fumu jimalongu motsu!

²⁷Fumu jimalongu motsu na Nsambi Israel gumakelasa ombu gami ava gumavosila rie: Nyuwarisa mukuta agu. La dibandu nyina bukidi usambila dusambu duedudu.

²⁸Fumu Nsambi ndeʼ guvu Nsambi na mambu magu mavu mangensa na gumanjabisa maboti memama.

²⁹Kokolu tsiagu gabila mukuta ami miula yiri ubanganga va gusu agu te na mutubu! Fumu Nsambi ami nana gumavanginina, miula miagu mibangingi na mukuta ami!