Read Punu 1 Bakaga 11 Bible Online

1 Bakaga 11 - Punu bible

1 Bakaga 11

¹Kaga Salomon amaronda bagetu bapuela bamalongu masusu va julu muana umugetu uPharaon, diwendi rie: bagetu baMoab na baAmmon na baEdom na baSidon na baHitt

²Diuleba Fumu amagandisa baIsrael rie: Duyafubana nogu na jogu bayafubana nenu mu mbari bakedurombisa uyitsa bansambi bogu. Durondu dubagetu dumarombisa Salomon ufubana na bisi malongu meni.

³Amawela yisambuali yikama tsibaana bakaga babagetu na kama yirieru tsimaronda, bagatsi bandi bamamukalusa murima.

⁴Salomon anonuna bagatsi bandi bamamurombisa uyitsa bansambi bangana: asamakevega ombu Fumu Nsambi andi nana taji andi David amakeveyila.

⁵Salomon amasalila Astarte, nsambi jibaSidon na Milkom, nsambi jibaAmmon.

⁶Salomon amavaga amasamalasa Fumu ubueji na asamamueduka Fumu na murima uotsu nana taji andi David.

⁷Mbana Salomon amarungila Kemoch, nsambi jibaMoab ndagu va julu mukongu va nsungisini na Jerusalem na amarungila Milkom, nsambi jibaAmmon ndagu.

⁸Anana amavayila bansambi babagatsi bandi botsu yiri mugatsi mugatsi ovagulanga bima bimbunga jiboti nesi pagu tsiunyensa ombu nsambi andi.

⁹Fumu amanyoyila Salomon mu mbari amaliyila Fumu Nsambi Israel nsima, jandi agumalabana nandi temu beji.

¹⁰Diuleba amamugandisa uyitsa bansambi bangana, Salomon asamakelisa maruma maFumu.

¹¹Fumu amatsingula Salomon rie: Mu mbari guma vaga mabi na gugaakelisa pangini ami na migaga miami ami nyimaguvega, nyugupatula bufumu nobuvega ombu musalitsi agu.

¹²Dimosi buandi ngodivaga ava gukivu monyu mu diambu ditaji agu David. Nyupatulamuana agu udibaala bufumu.

¹³Ngopatula bufumu buotsu; nyumusila dikabu diandi mu diambu ditaji agu David musalitsi ami na mu diambu dimusiengi Jerusalem agu nyimasola.

¹⁴Fumu amapalisila Salomon muvinitsi egugu: Hadad muisi Edom agumaba muisi yifumba yibakaga baEdom.

¹⁵Va temu aji David amabelisila bulongu buEdom Joab agumaba yivunda yibagora amawenda uyetsiga bamfumbi baIsrael; ava amabila o Edom amabokisa babaala botsu.

¹⁶Jogu na bagora baIsrael bamatsana tsungi yisiamunu o Edom te na bamamana ubokisa babaala botsu.

¹⁷Va temu eni Hadad amarinina na bisi Edom basusu abamaba basalitsi bataji andi, bamawenda o Egypte.

¹⁸Banorambuga o yiari yiMadian bamawenda o kumu jiParan, bamafubana na babaala baParan na jogu botsu bamatola ombu Pharaon kaga jiEgypte. Pharaon amavega Hadad ndagu na musiru na amavangana umulisila.

¹⁹Hadad amadila maboti maPharaon na amamuwetsa na nsaji andi agumaba muana nguji ukaga jimugetu diina diandi Tapenes.

²⁰Muana nguji Tapenes amamuburila muana andi udibaala diina diandi Guenoubat. Tapenes amamunuisila o ndagu Pharaon; Guenoubat amabanguyila va mosi na baana baPharaon o ndagu andi.

²¹Ava Hadad amabila o Egypte amagulu yiri David amafu na Joab yivunda yibagora wandi, amatsingula Pharaon rie: Nyirondi ugabuga o bulongu buami.

²²Pharaon amamuwivula rie: Yi yigambu nagu vava? Dibandu yi guirondili ugabuga o bulongu buagu? Amawakarie: Ngegambu na yima ne nana nyirondi ugabuga.

²³Nsambi amapalisila Salomon muvinitsi ususu diina diandi Rezon muana dibaala uEliada agumarina fumu andi Hadadezer kaga jiSoba.

²⁴Rezon amagukiga batu ombu gandi; jandi amaba yivunda yidibuli ava David amabokisila mabuli mafumu andi. Bamawenda o Damas, bamayetsana guna na bamarumanga o Damas.

²⁵Amaba muvinitsi uIsrael va mosi na Hadad yitsingu yiotsu yiSalomon; amavinanga Israel ava amabila kaga jiSyrie.

²⁶Jeroboam musalitsi uSalomon amamuvina wandi. Amaba muana dibaala uNebat agumaba muisi Efraim o Sereda, nguji andi amaba mukuili diina diandi Seroua.

²⁷Guluanu dibandu adi amavinina kaga Salomon. Ava Salomon amarungisila Millo na ava amadibiyila yivaga yimusiengi utaji andi David,

²⁸Jeroboam amaba mufudu agumaba na mangolu maneni na amaba na diela dineni. Salomon amalaba bisalu biandi na amamuvega yisalu urumanga basalitsi abamaba mu mukuta uJoseph.

²⁹Yilumbu yimosi Jeroboam amagusuga o Jerusalem, amabenguna na mubiyitsi Ahia muisi Silo muna nsila, agumaduara yijungi yigona. Jogu babeji bamaba pinsa o musiru.

³⁰Ahia amavula yijungi yiandi na amayipasa digumi na biasi bibeji,

³¹mbana amatsingula Jeroboam rie: Ndeʼ gukabonga yigumi yibiasi mu mbari Fumu Nsambi Israel jandi rie: Gulu upatula nyipatuli Salomon bufumu na nyuguvega yigumi yibifumba.

³²Salomon odila yifumba yimosi mu diambu dimusalitsi ami David na mu diambu diJerusalem musiengi agu nyimasola mu bifumba biotsu biIsrael.

³³Nyidivayi mu mbari baIsrael bamandiyila nsima na bamagudama va gusu Astarte, nsambi jibaSidon na va gusu Kemoch, nsambi jibaMoab na va gusu Milkom, nsambi jibaAmmon na va julu vana basamadugusu kanu tsiami uvaganga amasungama va gusu ami nokelisanga migaga miami na maruma mami nana David taji Salomon amavayilanga.

³⁴Ngopatula Salomon bufumu; obanganga murumitsi te na dufu duandi mu diambu dimusalitsi ami David agu nyimasola, jandi agumakelisanga maruma mami na migaga miami.

³⁵Tumba nyupatula muana andi udibaala bufumu na nyuguvega yigumi yifumba;

³⁶nyusila muana andi udibaala yifumba yimosi yiri musalitsi ami David obanganga na mutegula va gusu ami o Jerusalem o musiengi agu nyimasola utsaninanga.

³⁷Nyimagusola urumanga yigumi yibifumba biIsrael!

³⁸Pa guidedili maruma mami motsu na pa guidugusu kanu tsiami na pa guivayi motsu mawelimina va gusu ami na pa gukelisa migaga miami na maruma mami nana musalitsi ami David amabikelisilanga nyubanganga nagu. Nyuguwarisa anana nyimawarisila David na nyuguvega yigumi yibifumba biIsrael.

³⁹Nyulasa bategula baDavid yisonyi tumba yigoba mutubu.

⁴⁰Salomon amaromba nsila ubokisa Jeroboam tumba amarina o Egypte ombu Chichac, kaga jiEgypte; amatsana o Egypte te na dufu duSalomon.

⁴¹Misamu miusita miSalomon na motsu ama amavaganga na diela diandi, monyi magaa masonugu mu dibuku dimisamu miSalomon?

⁴²Salomon amarumanga Israel jiotsu o Jerusalem te na magumana mabilima.

⁴³Mbana Salomon amafu na amatsigu o musiengi utaji andi David. Roboam muana andi udibaala amaruma va yivinga yiandi.