Read Punu 1 Bakaga 13 Bible Online

1 Bakaga 13 - Punu bible

1 Bakaga 13

¹Mubiyitsi amaruyila o Juda amatola o Bethel ava Jeroboam amanyensilanga bima bimbunga jiboti, mubiyitsi eni amasindugu na Nsambi.

²Mu diambu diyinyensulu yipagu amagamuga na musuga uFumu rie: Yinyensulu yipagu! Yinyensulu yipagu! Fumu jandi rie: Muana dibaala aguburulu o ndagu David; diina diandi diuba Josias. Va julu ndeʼ yinyensulu yipagu onyensa bavagulitsi bapagu va mbura atsi bamanyensilanga bima bimbunga jiboti. Va julu ndeʼ bonyensa bivisi bibatu wandi!

³Muna yilumbu yieni mubiyitsi ovega yilimba ava ovosila rie: Ayiyi la yilimba ayi Fumu amavosa rie: Guluanu yinyensulu yipagu yiupasiga na dibufu adivu va julu yionyi diupansiga.

⁴Ava kaga Jeroboam amagululu mugamu agu mubiyitsi amagamuyila yinyensulu yipagu yiBethel amasakiga gogu va julu yinyensulu yipagu na amagamuga rie: Mugangianu! Tumba gogu agu Jeroboam amasamba umasiesa na asaniamuerungulu ugufuriga.

⁵Yinyensulu yipagu yimapasiga na dibufu adimaba va julu yionyi dimapansiga nana mubiyitsi amavosila na musuga uFumu.

⁶Mbana kaga amavosa na mubiyitsi rie: Lembiyila Fumu Nsambi agu na nsambilili yiri nyurungula umuefuriga gogu ami. Mubiyitsi amasambila Fumu mbana kaga amamuefuriga gogu andi nana na kala.

⁷Kaga amatsingula mubiyitsi rie: Tʼwendi o ndagu uleyeji mua biguji mbana nyuguvega mua yima.

⁸Mubiyitsi amatsingula kaga rie: Ne pa gupega yiasi yibiotsu bindagu agu ngowenda nagu. Ngoji biguji na ngonu mamba va mbura ejiji

⁹mu mbari nyimarumu na Fumu rie: Guyaji biguji na guyanu mamba na ava gugabuyila guyavioyila muna nsila aji gumawendila.

¹⁰Amayenagabuga mu nsila jisusu, asamamuevioyila mu nsila aji amawendila o Bethel.

¹¹Kabogu vamaba yinunu yimubiyitsi agumatsananga o Bethel. Baana bandi bababaala bamayemutsingula mambu motsu ama mubiyitsi amavaga o Bethel muna yilumbu yieni na mambu ama amatsingula kaga.

¹²Taji ogu amabawivula rie: Nsila yi amavioyila? Baana bandi bamayelaba nsila aji mubiyitsi agumaruyila o Juda amavioyila.

¹³Mbana amaruma baana bandi bababaala rie: Tungilianu buru yitsiga. Bamamutungila buru yitsiga na amamata va julu yionyi.

¹⁴Amaduka mubiyitsi na amamurasuna atsana o tsi muterabeta. Amamuwivula rie: Ndeʼ la mubiyitsi agumaruyila o Juda? Amawaka rie: Nyiina.

¹⁵Mbana amamutsingula rie: Tʼwendi o ndagu uleyeji mua biguji.

¹⁶Tumba mubiyitsi eni amawaka rie: Ngorungula nesi ugabuga nagu nesi ukota o ndagu agu. Ngoji biguji na ngonu mamba nagu va mbura ejiji.

¹⁷Mbembu Fumu jimakandisa rie: Guyaji biguji na guyanu mamba na guyagabusila mu nsila aji gumawendila.

¹⁸Yinunu yimubiyitsi amamutsotsa rie: Meʼ wami nyivu mubiyitsi dedi mosi na ndeʼ; yiansa yimatasuna na oyimavosa mambu maFumu na yimansingula rie: Mubeyi o ndagu agu uleyeji biguji noyenu mamba. Ufurila amamufurila.

¹⁹Mubiyitsi amagabuga nandi na amaji biguji nonu mamba o ndagu andi.

²⁰Ava bamabila va tavula Fumu amavosa na yinunu yimubiyitsi agumamugabusa;

²¹amagamuyila mubiyitsi agumaruyila o Juda rie: Fumu jandi rie: Mu mbari gusamadedila diufi diFumu na gugaakelisa maruma ama Fumu Nsambi agu amaguvega

²²mu mbari gumagabuga na gumaji biguji nonu mamba va mbura aji gumagandusu rie: Guyaji biguji na guyanu mamba, kabogu gufu, mfumbi agu jigotsigu va ngila tsibataji bagu.

²³Mubiyitsi anomana uji nonu yinunu yimubiyitsi agumamugabusa amatungisa buru andi yitsiga.

²⁴Mubiyitsi amayenawenda; muna nsila amabenguna na yimbungu ayimamuboka. Mfumbi andi jimaba vana nsila; buru jimaba bebeli na jionyi na yimbungu yimaba va mugula jionyi wandi.

²⁵Batu abamavioganga bamalaba mfumbi va nsila na yimbungu yimaba vana va mugula mfumbi; ava bamatolila o musiengi agu yinunu yimubiyitsi amatsaninanga bamavosa dionyi.

²⁶Ava yinunu yimubiyitsi agumamugabusa amadigululu amavosa rie: La mubiyitsi agusamadedila diruma diFumu na Fumu jaʼ beni amamuwakisa ombu yimbungu ayitsimupasa nomuboka nana Fumu amamutsingulila.

²⁷Mbana amruma baana bandi bababaala rie: Tungilianu buru yitsiga. Bamajitunga,

²⁸amaweʼ na amarasuna mfumbi va nsila na buru na yimbungu bebeli na jionyi. Yimbungu yisamaji mfumbi na yisamaji buru wandi.

²⁹Yinunu yimubiyitsi amanangiga mfumbi jimubiyitsi va buru na amayenajibega; mbana yinunu yimubiyitsi amayenagabuga o musiengi uyelila notsiga mfumbi andi.

³⁰Amatsiga mfumbi na amamulilanga ava amavosilanga rie: Ngeba menua! Muana taji ami amafu!

³¹Anomana ujitsiga amatsingula baana bandi bababaala rie: Ava nyufuila dukansiyila o ngila aji mubiyitsi atsitsigulu, dukasunsa bivisi biami va mugula bivisi biandi.

³²Diambu adi amavosila Fumu mu diambu diyinyensulu yipagu yiBethel na mu diambu dimandagu mambura tsiduyitsu atsivu o misiengi miSamarie diudugusu.

³³Diuleba amalubusu kaga Jeroboam asamakalula diela. Amamuesola bavagulitsi bapagu bambura tsiduyitsu abamaruyila o malongu motsu; mutu uotsu agumaronda uba muvagulitsi upagu, Jeroboam amamubiatsa usala yisalu va mambura maduyitsu.

³⁴Disumu dieni dimadugunu mukuta uotsu uJeroboam mu dionyi diina diandi dimatsiemuga tindi utsiemuga.