Read Punu 1 Bakaga 15 Bible Online

1 Bakaga 15 - Punu bible

1 Bakaga 15

¹Yilima yiyigumi na yinana bidurumu duJeroboam muana dibaala uNebat, Abiam amarumanga o Juda.

²Amaruma o Jerusalem bilima birieru. Diina dinguji andi Maaka, muana mugetu uAbichalom.

³Abiam amakevega uvaga masumu motsu ama taji andi amalevaganga; asamavega murima andi uotsu ombu Fumu Nsambi andi nana kaga andi David amakeveyila.

⁴Tumba mu diambu diDavid Fumu Nsambi andi amamuvega muana umosi va yivinga yiandi, yiri mukuta andi ugotsiemuga na Jerusalem ugopansu.

⁵David amavaganga mawelimina va gusu Fumu yitsingu yiandi yiotsu na asamasumuna ne diruma diandi dimosi, yika diambu diUrie muisi Hitt.

⁶Vamaba divita va gari Roboam na Jeroboam yitsingu yiogu yiotsu.

⁷Misamu misusu miAbiam na motsu ama amavaganga mimasonugu mu Dibuku diBisalu bibaKaga baJuda. Vamaba divita va gari Abiam na Jeroboam.

⁸Abiam amafu na bamamutsiga o musiengi uDavid. Muana andi Asa amaruma va yivinga yiandi.

⁹Yilima yimagumabeji bidurumu duJeroboam kaga jiIsrael, Asa amarumanga o Juda.

¹⁰Amarumanga magumana na yilima yimosi o Jerusalem. Diina dikaga andi Maaka, muana mugetu uAbichalom.

¹¹Asa amavaganga amamalasanga Fumu ubueji dedi mosi na kaga andi David.

¹²Amagusula bimbembu mu bulongu na amatsiemusa bakosi botsu aba bataji bandi bamavaga.

¹³Amapatula nesi kaga andi Maaka bukaga mu mbari amavayila Astarte kosi. Asa amarumisa batu upansa kosi andi nojinyensa o yibususu yiCedron.

¹⁴Tumba mbura tsiduyitsu tsibulongu tsisamatsiemuga diuleba Asa amakevega na murima uotsu ombu Fumu yitsingu yiandi yiotsu.

¹⁵Amasunsa bima biYingitsi o Ndagu Nsambi abi jogu na taji andi bamavega, diwendi rie: lora jivema na lora na birura.

¹⁶Vamaba divita va gari Asa na Bacha kaga jiIsrael yitsingu yiogu yiotsu.

¹⁷Bacha kaga jiIsrael amatoyisa bisi Juda; amabelisa Rama, anana amagubitsila batu baAsa kaga jiJuda upalanga nokotanga.

¹⁸Asa amapalisa lora jiotsu jivema na lora atsimasiala mu bisuegulu biNdagu Nsambi na bisuegulu bindagu kaga na amatsiwakisa basalitsi bandi aba amasindiga ombu Ben-Hadad muana dibaala uTabrimmon mutegula uHezion kaga jiSyrie agumatsananga o Damas. Kaga Asa amatinda bilumbi rie:

¹⁹Jetu nagu tuvangana pangini nana jimalebila va gari taji ami na taji agu. Laba nyigutindili mulendu ulora jivema na lora. Wenda yebunsa pangini agu na Bacha kaga jiIsrael yiri okakana nami.

²⁰Ben-Hadad amagululu kaga Asa; amasindiga bivunda bibagora bandi uyetoyisa misiengi miIsrael na amabelisa Yon na Dan na Abel-Bet-Maaka na Kinneret jiotsu na yiari yiotsu yiNeftali.

²¹Ava Bacha amadigululu amadunda urungisa musiengi uRama na amagabuga o Tirsa.

²²Kaga Asa amanengila bisi Juda botsu tsiri uvengutsa mutu na jogu bamabeganga mamanyi na tsimbi abi Bacha amasalisa ukanda Rama, kaga Asa amabisalisa ukanda Gueba uBenjamin na Mispa.

²³Misamu miotsu misusu miAsa na motsu ama amavaganga na misiengi ami amarungisa motsu mana mamasonugu mu Dibuku diBisalu bibaKaga baJuda.

²⁴Asa amafu na amatsigu o musiengi uDavid. Josaphat muana andi udibaala amarumanga va yivinga yiandi.

²⁵Nadab muana dibaala uJeroboam amarumanga o Israel mu yilima yimubeji bidurumu duAsa kaga jiJuda. Amarumanga o Israel bilima bibeji.

²⁶Amavaga amasamalasa Fumu ubueji dedi mosi na taji andi. Amakevega uvaga masumu motsu ama taji andi amarombisa baIsrael uvaga.

²⁷Bacha muana dibaala uAhia muisi yifumba yiIssakar amatungila kaga fundu. Ava Nadab na baIsrael bamakandila Guibeton musiengi ubaPhilistin, Bacha amaboka Nadab.

²⁸Dimavagu mu yilima yimurieru bidurumu duAsa kaga jiJuda na amarumanga va yivinga yiandi.

²⁹Anoba kaga amabokisa mukuta uotsu uJeroboam, asamarinisa ne umosi na amabunga biotsu nana Ahia mubiyitsi muisi Silo amavosila.

³⁰Dimalabana mu diambu dimasumu maJeroboam ama amarombisa baIsrael uvaga, amamanyoyisa Fumu Nsambi Israel.

³¹Misamu misusu miNadab na motsu ama amavaga mimasonugu mu Dibuku diBisalu bibaKaga baIsrael.

³²Vamaba divita va gari Asa na Bacha kaga jiIsrael yitsingu yiogu yiotsu.

³³Mu yilima yimurieru bidurumu duAsa kaga jiJuda Bacha muana dibaala uAhia amarumanga Israel jiotsu o Tirsa. Amarumanga magumabeji mabilima.

³⁴Amavaga amasamalasa Fumu ubueji na amaduka bifu biJeroboam, amakevega uvaga masumu maJeroboam ama amarombisa baIsrael uvaga.