Read Punu 1 Bakaga 20 Bible Online

1 Bakaga 20 - Punu bible

1 Bakaga 20

¹Ben-Hadad kaga jiSyrie amagukiga bagora bandi botsu; amaba na magumarieru na kaga beji abamaba kingu mosi nandi na bakabala na makalu. Amawenda uyekanda Samarie na amabatumuna.

²Amatinda bilumbi o musiengi ombu Achab kaga jiIsrael,

³na bimamutsingula rie: Ben-Hadad jandi rie: Lora agu jivema na lora agu, atsiami, bagatsi bagu na baana bagu ababoti, abami.

⁴Kaga jiIsrael amawaka rie: Kaga fumu ami nana guivosili, menu nyivu aguagu na biami biotsu.

⁵Tumba bilumbi bieni bimayenagabuga na bimamuevosa rie: Ben-Hadad jandi rie: Nyimagutindila bilumbi rie: Gukwakisa lora agu jivema na lora agu na bagatsi bagu na baana bagu.

⁶Kabogu mugesa va diweru diedidi nyutinda basalitsi bami ombu gagu, bofuyi ndagu kaga na mandagu mabasalitsi bagu; bobonga biotsu bidufunu duneni abivu nenu na boyenabibega.

⁷Kaga jiIsrael amanengila bivunda biotsu bibulongu na amavosa rie: Guluanu na jabanu jenu beni yiri dibaala diedina erondi utubunga. Mu mbari amaponda bagatsi bami na baana bami na lora ami jivema na lora ami, diuleba nyisakamuwimina yima.

⁸Bivunda biotsu na batu botsu bamatsingula Achab rie: Guyamugulu na guyamuvega yima.

⁹Mbana amatsingula bilumbi biBen-Hadad rie: Dukatsingula kaga fumu ami rie: Nyumuvega biotsu abi amakwivula temu ajitega tumba diambu diedidi adiusita ngorungula udivaga. Bilumbi bimayenawenda na bimayetsingula Ben-Hadad bulumbi.

¹⁰Ben-Hadad amatinda mutu uyetsingula Achab rie: Bansambi bakilisi na mangolu mogu motsu pa ngokalusa bisi Samarie botsu mua makaka madibufu.

¹¹Mbana kaga jiIsrael amawaka rie: Dituka adi gutsiroka mu mbari taba, taba jigamuefu gukaji dituka na kunyi.

¹²Ava Ben-Hadad amagululu kabusulu eni unu benu na bakaga o mandagu mamatsanda na amaruma bagora bandi rie: Kunsanu bima bienu! Na bamakunsa bima uyetoyisa bisi musiengi.

¹³Tumba mubiyitsi amabambana ombu Achab kaga jiIsrael na amavosa rie: Fumu jandi rie: Guilabi yinombu yieyiyi yineni yibagora? Nyuyiwakisa namunyi ombu gagu na gujaba yiri menu nyivuFumu.

¹⁴Achab amawivula rie: Anyi otuwaka kalala? Mubiyitsi amawaka rie: Anana Fumu atsivosila rie: Bagora aba bivunda biyiari na yiari botinda. Achab amawivula rie: Anyi obaruma? Mubiyitsi amawaka rie: Ndeʼ.

¹⁵Mbana Achab amatandiga bagora babivunda biyiari na yiari na bamaba kama beji na magumarieru na babeji; va julu vana amatala batu botsu na baIsrael botsu, bamaba yisambuali yitosini.

¹⁶Bamabatumuna ava muangulu va diweru adi Ben-Hadad amanuinanga nolanganga o gari ndagu jitsanda na mugumarieru na kaga beji abamaba kingu mosi nandi.

¹⁷Bagora bamareyila upala. Ben-Hadad amasindiga baleyitsi abamagabuga nomutsingula rie:

¹⁸Bisi Samarie bamaruga. Ben-Hadad amabatsingula rie: Pa beruyi na duvotsu bagaangianu duyababoka; pa beruyi uyitoga divita bagaangianu duyababoka wandi!

¹⁹Kabogu bagora babivunda biyiari na yiari bamapala o musiengi va mosi na bagora basusu.

²⁰Mutu mutu amaboka muvinitsi umosi. Bisi Syrie bamarina, baIsrael bamababingisa; Ben-Hadad kaga jiSyrie amarina na kabala andi na babeyitsi basusu babakabala.

²¹Mbana kaga jiIsrael jaʼ beni amalabana; amagaanga bakabala na makalu; amagudisa bisi Syrie tindi ugudisa.

²²Mbana mubiyitsi amawenda ombu kaga jiIsrael umutsingula rie: Wenda, guyakambulu, kelula nolaba adi vengu guvaga; yilima ayiuruga kaga jiSyrie omueruga ugutumuna.

²³Basalitsi bakaga jiSyrie bamamutsingula rie: Nsambi ogu avu Nsambi jimikongu; la dibandu bamatuviolila. Tumba o gusu tutoga nogu o kumu mbana tubaviolila mangolu.

²⁴Vaga didi: gusula bakaga mu mbura tsiogu gukavinsa bivunda mu mbura tsiogu.

²⁵Muegukiga bagora aboba ne uviolila aba gumatsiemusa na dutalu duneni dubakabala na makalu. Mbana tutoga nogu o kumu mbana bolaba tubaviolila mangolu. Ben-Hadad amabagululu na amavaga nana bamavosila.

²⁶Yilima ayimubeji Ben-Hadad amamuegukiga bagora baSyrie na bamawenda o yiari yiAfec uyetoyisa baIsrael.

²⁷Bagora baIsrael bamagukama ombu Achab wandi; bamadila biguji na bamayebengusana bavinitsi bogu. Bamavaga milaku na nsungisini nogu nderi mua migamba mibeji mibinsabi, tumba bisi Syrie bamabasa bulongu.

²⁸Mubiyitsi amabambana na amatsingula kaga jiIsrael rie: Fumu jandi rie: Bisi Syrie bamavosa rie: Fumu avu Nsambi jimikongu agaa Nsambi jikumu. Nyuwakisa batu beni botsu ombu gagu mbana dujaba yiri menu la Fumu.

²⁹Bamatsana o milaku yisambuali yibilumbu. Yilumbu yimusambuali bamabanda utoga na baIsrael, bamaboka kama tosini tsibaSyrie abamawendanga mu tsi muna yilumbu yieni.

³⁰Basusu bamarina o yivaga yimusiengi uAfec na yivaga yimavika magumabeji na yisambuali yitosini tsibagora abamasiala. Ben-Hadad amasuema o gari ndagu o musiengi.

³¹Abandi bamamutsingula rie: Guluati jetu tumagulu yiri bakaga baIsrael bavu na yingeba; tuduara basiela na mipapa mbana tuwenda ombu kaga jiIsrael. Tanguji agoguboka.

³²Bamaduara basiela na mipapa mu miuru mbana bamawenda ombu kaga jiIsrael. Bamavosa rie: Muviga agu Ben-Hadad jandi rie: Guyamboka! Achab amawivula rie: Aki monyu? Jandi avu muana taji ami.

³³Ava babaala beni bamagululu dionyi bamasunga ugaanga adi amavosa na bamamuwivula rie: Kabogu Ben-Hadad avu muana taji agu? Mbana Achab amaruma rie: Yemulandanu. Ben-Hadad amapala o yisuemunu yiandi na amarasuna Achab agumamunangiga va dikalu diandi.

³⁴Ben-Hadad amamutsingula rie: Nyugugabusila misiengi ami taji ami amapatula taji agu; gukarungisa makasa o Damas nana taji ami amarungisila o Samarie. Achab amamuevosa rie: Kabogu na pangini ajina nyuguwensa. Amavangana pangini nandi mbana amamuwensa.

³⁵Dibaala dimosi va gari baana bababiyitsi amaruma mbatsi andi na musuga uFumu rie: Kokolu tsiagu ndimbi! Tumba dibaala dieni amabusa umudimba.

³⁶Mbana amamutsingula rie: Mu mbari gugaadedila diufi diFumu ava gunsilila yimbungu oguboka. Anomusila yimbungu yimamubengusana na yimamuboka.

³⁷Amarasuna dibaala disusu na amamuruma rie: kokolu tsiagu ndimbi! Dibaala dieni amamudimba na amamunemisa.

³⁸Mubiyitsi amayetsana va nsila aji kaga mbe ovioyila na amaketunga banda va misu tsiri ulasa yiri mubiyitsi avu.

³⁹Ava kaga amavioyila mubiyitsi amamugamuyila rie: Nyibetsi o utoga divita; guluati mutu amatasuna na amambeyila koli mbana amavosa rie: kelisa dibaala diedidi; pa otsiemuga guba koli va yivinga yiandi vo gufuta tosini yirieru tsimbongu.

⁴⁰Tumba usala nyisali yiari na yiari na dibaala dieni amatsiemuga. Kaga jiIsrael amavosa rie: Abuna buvu bunsonsi buagu; ndeʼ beni gumabutabula.

⁴¹Vana vana mubiyitsi amavula tsanda va misu makaga jiIsrael; amamujaba yiri mubiyitsi avu.

⁴²Mbana amatsingula kaga rie: Fumu jandi rie: Mu mbari gumarinisa dibaala adi nyimawakisa na mugeli kabogu guboku va yivinga yiandi na batu bagu boboku va yivinga yibatu bandi.

⁴³Kaga jiIsrael amayenagabuga o Samarie o ndagu andi na munyongu na kabu wandi.