Read Punu 1 Bakaga 5 Bible Online

1 Bakaga 5 - Punu bible

1 Bakaga 5

¹Hiram kaga jimusiengi Tyr amasindiga basalitsi bandi ombu Salomon mu mbari amagulu yiri bamamubiatsa kaga va yivinga yitaji andi na amarondanga David.

²Salomon amasindiga mutu uyetsingula Hiram rie:

³Guijabi yiri taji ami David asamarungula urungila Fumu Nsambi andi Ndagu mu diambu dimavita na bavinitsi bandi abama-abamamutumunanga yiari na yiari. Tumba amamuvega mangolu ubabetsa.

⁴Fumu Nsambi ami amapega yivumu yiari na yiari; bavinitsi basatsi na maguga mamavioga!

⁵Guluati nyina ditasa urungila Fumu Nsambi ami Ndagu nana Fumu amatsingulila taji ami David ava amavosila rie: Muana agu, agu nyuvinsa va yivinga yiagu va yitsiga yibufumu buagu la jandi agutungila Ndagu aji boyekitsilanga.

⁶Ruma basalitsi bagu uwanga misedera miLiban. Basalitsi bami bofubana na abagu, nyufuta difuta dibasalitsi bagu nana gupeyila dufunu; guijabi yiri vagaa batu abejabi yisalu utabula bivongu nana bisi Sidon.

⁷Hiram anogulu posulu tsiSalomon amabasa na nsangu na amavosa rie: Diboti ombu Fumu agumavega David muana aguvu na diela agubanganga sefu jibaIsrael.

⁸Hiram amatinda yilumbi ombu Salomon rie: Nyimagulu yilumbi ayi gumatindila. Nyuvaga diotsu adi guirondi mu diambu dimisedera na misipara.

⁹Basalitsi bami bomibega o Liban o mubu, nyumivaga yilindi na nyumitinda mu mubu te no mbura aji gundonsa; avana nyuminyangulila mbana gukamibonga. Adi nyirondi difuta adidi; gukatombila biguji abi jetu na batu bami tujanganga.

¹⁰Hiram amatindilanga Salomon miri misedera na misipara nana amarondila.

¹¹Salomon amatindilanga Hiram kama yisiamunu tsitona tsible na yinana yikama tsimbuta tsimatsi maoliva; abina Salomon amaveganga Hiram yilima na yilima ulisilanga abamajanganga nandi.

¹²Fumu amavega Salomon diela nana amavanginina nandi. Vamaba duvotsu va gari Hiram na Salomon; bamavangana pangini va mosi.

¹³Kaga Salomon amakotisa magumarieru matosini mabaIsrael o yisalu.

¹⁴Amabasindiga o Liban: yigumi yitosini tsungi mosi mu yirieru; mbana abana bamatsana tsungi beji o yiari yiogu. Adoniram amaba sefu jibisalu bieni.

¹⁵Salomon amaba na magumidusambuali matosini tsibanangulitsi bamifuna na magumidunana ma-abamapakanga mamanyi o mukongu,

¹⁶tsiri utala basefu, dutalu duogu dumaba tosini yirieru na kama yirieru tsibivunda bibisalu abimayenakipanga basalitsi.

¹⁷Kaga amabaruma upaka mamanyi maneni na maboti mayibuga yindagu.

¹⁸Basalitsi baSalomon na baHiram na bisi Byblos bamamanisila yisalu upaka mamanyi. Anana bamagukiyila miri na mamanyi biurungila Ndagu Nsambi.