Read Punu 1 Bakaga 7 Bible Online

1 Bakaga 7 - Punu bible

1 Bakaga 7

¹Salomon amarunga ndagu andi, amamana yigumi na bilima birieru te na jimasuka urungu.

²Bamalerunga ndagu jimusiru o Liban, usakama ujionyi: magumaranu mametera na uroga: magumabeji na metera yiranu. Muranga ujionyi: yigumi na metera yiranu. Jimarungu mu milonga miranu mimakutu masedera na mu julu tsimakutu mumaba mikambu misedera.

³Jimaba na magumana na makutu maranu diwendi rie: mulonga mulonga yigumi na maranu; muansa ujionyi umavagu na sedera.

⁴Jimaba na kilingu yirieru, kilingu kilingu jimaba na bafenetera, tsimosi tsimasungasana na tsisusu.

⁵Maguyi motsu mandagu na makutu motsu bimaba na biari bina; mu kadi kilingu miunu mindagu mimosi mamasungasana na misusu.

⁶Bamarunga yibuku yimakutu, usakama uyionyi: magumabeji na metera yiranu, uroga: yigumi na metera yiranu; na yibuku yisusu va gusu yibuku ayitega.

⁷Bamarunga yibuku yiyitsiga yibufumu ayina Salomon amatabulilanga bunsonsi, yimanengulungu yibuku yibunsonsi; bamayigomina sedera ubandila o tsi te no julu.

⁸Ndagu jijaʼ beni jimarungu dedi mosi va mbura jisusu o nsima ndagu mosi. Bamarungisila mugatsi andi agumaba muana uPharaon ndagu jimunongu eni va jandi mbura.

⁹Mandagu meni motsu mamarungu na mamanyi maboti amamapaku na bietsu biwelimina na bisalu; mamatabulu na biwasu. Mamasalusu ubandila o tsi te no julu na ubandila va gusu kana te no dulombili aduneni.

¹⁰Bibuga bimarungu na mamanyi maboti na maneni, diwendi rie: mamaba mamanyi mametera yiranu na mamanyi mametera jina.

¹¹Va julu bibuga bieni bamaba mamanyi amamasolu amamapaku na bietsu biwelimina na bisalu na tsimbi tsisedera wandi.

¹²Utsiengila dulombili dueni duneni dumaba milonga mirieru mimamanyi na mulonga umosi utsimbi tsisedera nana mbura jigari Ndagu Nsambi na nana ndagu jikaga.

¹³Kaga Salomon amanengila Hiram muisi Tyr.

¹⁴Vamaba muisi Tyr, diina diandi Hiram agumasalanga kunga, nguji andi amaba mukuili, muisi yifumba yiNeftali, amaba na tindi diela na dujabu nesi pegulu jibisalu biotsu bikunga. La dibandu kaga Salomon amamunengilila usala bisalu biotsu bikunga.

¹⁵Hiram amavaga makutu mabeji makunga. Mamaba usakama uyifu yimetera na mukudu umetera yisiamunu umawetsugulu uroga umotsu mabeji.

¹⁶Amasulumusa kunga uvaga biviovi bibeji bikunga abi amavakiga mu makodu mamakutu; usakama uyiviovi yiviovi, metera beji na yibuku.

¹⁷Amavakiga yima yilora ayimaba nderi mbusa na bima abibagunu na bapanga abimavakugu muna biviovi bimakutu; bimaba mu kodu tsimakutu, dikutu dikutu yisambuali yisambuali.

¹⁸Amavaga milonga mibeji migeranada utsiengila yima yilora ayimaba nderi mbusa ukubiga yiviovi yidikutu; amavaga munongu mosi na adimubeji.

¹⁹Biviovi abimaba mu kodu tsimakutu va piasu bimaba na balisa abamaba metera beji.

²⁰Biviovi abimavakugu mu makutu mabeji bimatsiengusu kama beji tsimigeranada aminamugu monyi; vamaba dedi mu bibuku abimubeji.

²¹Amareliga makutu va piasu jiNdagu Nsambi; amareliga dikutu adimabaala na amadiluga Yakin, divindugulu rie: Nsambi awarisi; mbana amareliga adimagetu na amadiluga Boaz, divindugulu rie: Nsambi avu Mangolu.

²²Anana Hiram amamanisila yisalu yimakutu.

²³Hiram amasulumusa kunga na amavaga nsienga jineni, uroga ujionyi metera yiranu na jimaba tindi dugongula; udonga ujionyi umaba metera beji na yibuku na mukudu uyigumi na metera yiranu umawetsugulu utsiengila mungongu unsienga.

²⁴Bima abimaba na bibagunu bimatsuva bimaisiengusu o tsi mungongu ujionyi. Kadi metera jimanamugu magumabeji matsionyi, utsiengila nsienga jiotsu bima abimabagunu na matsuva bimaba milonga mibeji; biotsu bimasulumusu yibuku yimosi na jionyi.

²⁵Nsienga jimasunsu va julu yigumi na bibagunu bibeji bibangombi, birieru o yiari yibanda, birieru o yiari ayi wisi ewendisini, birieru o yiari yitandu na birieru o yiari ayi wisi epalili; nsienga jimaba va julu bionyi abimalasanga yika miuru.

²⁶Mugobu ujionyi umaba yinana yisantimetera; na mungongu ujionyi umabagunu na mungongu udimoyi na jimabaku balisa. Nsienga jimaba yietsu yimagumidunana matosini tsimbuta.

²⁷Mbana Hiram amavaga yigumi yibinsunsulu bikunga. Yisunsulu yisunsulu yimaba usakama umetera beji na uroga metera beji na yirela metera mosi na yibuku.

²⁸Guluanu nana bisunsulu bieni bimavagulu; bimavagu yibuku yikunga ayimanamusunu mu makodu na yibuku yisusu.

²⁹Mu bibuku bikunga abimaba va gari bibuku bisusu mumaba bibagunu bibimbungu na bibangombi na bibiansa; mu bibuku abivu o julu nesi abivu o tsi bimbungu na bangombi bamabaka diguki dibibagunu bibafelera na bimagaji.

³⁰Kadi yisunsulu yimaba na makulu mana makunga; mu bitungu biotsu bibina biyisunsulu bimaba bisiku binsienga; abimanamugu makulu meni. Bisiku bieni bimasulumusu va mosi na bibagunu bibafelera na bimagaji.

³¹Munu uyionyi umaba na yibagunu yidugaba adumabaku na yirela yiduonyi dumaba magumidusambuali na santimetera yiranu; yisunsulu yiduonyi yimaba dugongula.

³²Makulu mamaba o tsi yisunsulu na bigaangulu bimakulu bimanamugu muna; dikulu dikulu dimaba na muranga umagumidusambuali na santimetera yiranu.

³³Makulu mamavagu dedi mosi na makulu madikalu. Binamugulu bimonyi na madilu mamonyi na biotsu abimawarisa dikulu bimavagu yibuku yimosi.

³⁴Mu bitungu biotsu bibina mumaba bisiku binsienga abimaba yibuku yimosi na yisunsulu.

³⁵Yiari yisusu yiyisunsulu yimaba na dugongula adumaba na muranga umagumabeji na santimetera yiranu na yimaba na bisiku abimavagu yibuku yimosi; yiotsu yimaba yikunga.

³⁶Bamabaka bibagunu bibiansa na bibimbungu na bimambari na maguki mabafelera na magaji mu bisiku na mu bibuku bikunga.

³⁷Anana amavayila yigumi yibisunsulu; yisunsulu yisunsulu yibuku yimosi na yietsu yimosi.

³⁸Hiram amavaga yigumi yinsienga tsikunga. Nsienga nsienga jimaba na yietsu yitosini na kama yisiamunu tsimbuta, nsienga nsienga jimaba metera beji, nsienga nsienga jimaba na yisunsulu yiandi.

³⁹Bamasunsa bisunsulu biranu o yiari yimabaala maNdagu Nsambi na bisunsulu biranu o yiari yimagetu o tandu o yiari ayi wisiepalili.

⁴⁰Hiram amavaga bisunsulu bimabufu na bapelu na bansienga. Anana amamanina bisalu biotsu biNdagu Fumu abi kaga Salomon amamuruma usala:

⁴¹makutu mabeji biviovi bibeji bidugongula usunsa va julu tsimakutu, bima bibeji bilora abimaba nderi mbusa, bimakubugulu biviovi bidugongula bimakutu,

⁴²kama jina tsimigeranada amimanamugu mu abivu nderi mbusa, bamakubugulu biviovi bimakutu,

⁴³yigumi yibisunsulu, yigumi yibansienga ayimasunsu va julu yionyi;

⁴⁴nsienga jineni jidugongula, yigumi na bibagunu bibeji bibangombi abamasunsu o tsi jionyi,

⁴⁵bisunsulu bimabufu na bapelu na bansienga. Bisalulu bieni biotsu abi kaga Salomon amaruma Hiram uvaga biNdagu Fumu, biotsu bimaba bikunga ajivedimi.

⁴⁶Bamavaga bio-tsu bina na butamba budiga o kumu jiJourdain va gari Soukot an Sartan.

⁴⁷Salomon amaru-misa batu ukotisa bisalulu bieni biotsu o Nda-gu Fumu; basamapitsa bakilu bakunga mu mbari tsimaba tindi tsipuela.

⁴⁸Salomon amamuerumisa batu usala bi-salu biotsu bisusu biNdagu Fumu: yinyensulu yipagu yilora, tavula jilora aji bamasunsilanga mapa mapagu;

⁴⁹yigumi yimangasa matindi lora, maranu o mabaala na maranu o magetu va gusu Mbura Nsambi, bafelera na balambi na bitsimusulu, biotsu bina bilora;

⁵⁰bansienga na mabaga na mamoyi na batasi na bisunsulu bimuji, biotsu bina bilora; magongi malora mayiabutsu yi-ukotila o Mbura Ajivu Tindi Yingitsi na mayiabutsu yi-ukotila o Ndagu Nsambi.

⁵¹Anana yisalu yiotsu yimasukila ayi kaga Salomon amasala urungila Fumu Ndagu. Mbana amabega lora jivema na lora na bisalulu abi taji andi David amavega na amabisunsa mu bisuegulu biNdagu Nsambi.