Read Punu 2 Bakaga 11 Bible Online

2 Bakaga 11 - Punu bible

2 Bakaga 11

¹Athalie nguji Ahazia anogulu yiri muana andi udibaala amafu amaretsama na amabokisa baana bandi botsu.

²Tumba Yocheba muana mugetu uJoram agumaba yibusi yiAhazia amabonga Joas muana dibaala uHazia; amamugusula va gari baana babakaga ava bamababokisila; amamusega na ndetsi andi o yibuku yimatangi o Ndagu Nsambi. Anana amadagulu va misu maAthalie kabogu asamaboku.

³Amasuegu bilima bisiamunu jogu na Yocheba o Ndagu Nsambi. Athalie amarumanga bulongu.

⁴Yilima yimusambuali Yoyada amatinda bilumbi uyelanda bivunda bikama tsibagora bibisi Carie va mosi na bagora basusu; amabakotisa o Ndagu Nsambi. Amayevangana pangini nogu na amabalevisa pesi ava amayebalasila muana dibaala ukaga.

⁵Mbana amabaruma rie: Guluanu adi duvaga. Jenu bamosi adukota o yisalu yilumbu yitsona dikabu dimosi mu marieru, duyekelisa ndagu kaga,

⁶dikabu disusu o dikotulu diSour na dikabu disusu o dikotulu adivu o nsima bagora: dukakelisa ndagu kaga yiri vagokota mutu.

⁷Makabu menu masusu mabeji, botsu abepalili o yisalu yilumbu yitsona, bokelisa Ndagu Nsambi agu muana kaga avu.

⁸Dukagaga kaga yiari na yiari, mutu mutu na buta buandi va dikaka, mutu uotsu agubambana dukamuboka; dubambana na kaga ava opalilanga nokotanga.

⁹Bivunda bikama tsibagora bamadugusu maruma motsu maYoyada muvagulitsi upagu. Yivunda yivunda amagukiga bagora bandi, diwendi rie: abamakotanga o yisalu yilumbu yitsona na abamamanina yisalu yilumbu yitsona; bamawendanga va mosi ombu Yoyada muvagulitsi upagu.

¹⁰Muvagulitsi upagu amavega bivunda bikama tsibagora makongu na bangubu batemu jikaga David, bionyi bimasuegu o Ndagu Nsambi.

¹¹Bagora, mutu mutu na yitogulu va dikaka bamakanda kaga, ubandila o yiari yimabaala te no yiari yimagetu maNdagu Nsambi, bebeli na yinyensulu yipagu ayimaba va gusu Ndagu Nsambi.

¹²Muvagulitsi upagu amapalisa Joas muana dibaala ukaga na amamuduisa dugaba na amamuwakisa dibuku dimigaga. Bamamutsatsa matsi umubiatsa kaga mbana bamasiga tsambi nogamuga rie: Abikaga!

¹³Athalie amagulu nduku jibagora na batu mbana amawenda o Ndagu Nsambi.

¹⁴Amagengila, amalaba kaga diteli va gusu batu nana yifu yiogu yimabila; basefu na mimbanda bamaba bebeli nandi; bisi bulongu buotsu bamalaba nsangu na bamasiganga mimbanda. Athalie amapasa biduaru biandi na amagamuga rie: Nyimatsungulu! Nyimatsungulu!

¹⁵Mbana Yoyada muvagulitsi upagu amaruma diruma diedidi ombu bivunda bikama tsibagora abamarumanga divita rie: Palisianu Athalie va gusu kana, mubokianu! Pa mutu omuduka mubokianu wandi! Muvagulitsi upagu amavosa rie: Ayabokulu o Ndagu Nsambi!

¹⁶Bamamukunsila mbura uvioga na bamamubega muna nsila bakabala te no ndagu kaga; aguna amabokulu.

¹⁷Yoyada amavangana pangini na Fumu na kaga na batu na amalevila na jionyi rie: Nana tuvu batu baNsambi anana tubila batu bakaga.

¹⁸Bisi bulongu botsu bamakota o ndagu Baal na bamajipansa; bamapansa tindi upansa binyensulu biandi bipagu na bitumba biandi na bamabokisa Mattan muvagulitsi upagu uBaal va gusu binyensulu bipagu. Yoyada muvagulitsi upagu amasunsa bawatsi o Ndagu Nsambi.

¹⁹Amagukiga bivunda bikama tsibagaora na bisi Carie na bagora basusu na bisi bulongu botsu upalisa kaga o Ndagu Nsambi nomukotisa o ndagu kaga; bamavioga va gusu diguyi dibagora. Joas anotsana va yitsiga yibufumu

²⁰bisi bulongu botsu bamalaba nsangu. Musiengi umaba na duvotsu yiotsu ayi bamabokisa Athalie.