Read Punu 2 Bakaga 14 Bible Online

2 Bakaga 14 - Punu bible

2 Bakaga 14

¹Yilima yimubeji yidurumu duJoas muana dibaala uJoachaz kaga jiIsrael, Amassia muana dibaala uJoas kaga jiJuda, amarumanga.

²Amaba na magumabeji na bilima biranu ava amabandila uba kaga na amarumanga magumabeji na yifu yibilima o Jerusalem. Diina dinguji andi Yoaddan muisi Jerusalem.

³Amassia amavaganga amamalasanga Fumu ubeji tumba tisri nana taji andi David; amavaga dedi mosi na taji andi Joas.

⁴Dimosi buandi mbura tsiduyitsu tsisamatsiemuga; batu bamavagulanga pagu na bima bimbunga jiboti va mbura tsiduyitsu.

⁵Bufumu buAmassia bunowara amabokisa bivunda bibagora abamaboka kaga Joas taji andi.

⁶Asamabokisa baana babavinitsi nana dimasonugulu mu dibuku dimigaga miMoise adi Fumu amavega dimma diedidi rie: Bayabokisa bataji mu diambu dibaana na bayabokisa baana mu diambu dibataji tumba mutu mutu abokusu mu diambu didisumu diandi.

⁷Amassia amaboka yigumi yitosini tsibisi Edom o yibususu yimusayi. Va temu divita amabonga Sela musiengi agu amaluga Yocteel, uonyi uvu te na namunyi.

⁸Mbana Amassia amatinda bilumbi ombu Joas kaga jiIsrael, muana dibaala uJoachaz agumaba mutegula uJehu abimayemutsingula rie: Ruga tuyilabana.

⁹Joas kaga jiIsrael amaruma mutu uyetsingula Amassia kaga jiJuda rie: Dusiendi duLiban dumatinda yilumbi uyetsingula musedera uLiban rie: Wetsa muana agu umugetu na muana ami udibaala. Bibulu bibukanyi abivu o Liban bimavioga na bimatsiarila dusiendi.

¹⁰Ndeʼ gumabokisa bisi Edom na gumakematisa. Laba nsangu na bundumba buagu na tsananga o ndagu agu. Dibandu yi gutoga divita adiurombisa dubungu duagu na dubagora baJuda wandi?

¹¹Tumba Amassia amabusa umugulu. Kabogu Joas kaga jiIsrael amawenda na bamalabana jogu na Amassia kaga jiJuda va Bet-Chemech aguvu o Juda.

¹²Bagora baJuda bamabetsu na bagora baIsrael; bagora baJuda bamarina o mandagu mogu.

¹³Joas kaga jiIsrael amabonga Amassia kaga jiJuda va Bet-Chemech, amaba muana dibaala uJoas agumaba mutegula uAhazia. Amawenda o Jerusalem na amayebivisa yivaga kama beji tsimetera, ubandila va dikotulu diEfraim te no dikotulu diYitungu.

¹⁴Amabonga lora na lora jivema na bisanga biotsu abimaba o Ndagu Nsambi na abimaba mu bilundulu bindagu kaga, amabonga bakoli wandi mbana bamayenagabuga o Samarie.

¹⁵Misamu misusu miJoas na motsu ama amavaga na divita adi amatoga na Amassia mimasonugu mu dibuku diBisalu bibaKaga baIsrael.

¹⁶Joas amafu na amatsigu o Samarie va mbura jimosi na bakaga baIsrael. Jeroboam muana andi udibaala amaruma va yivinga yiandi.

¹⁷Joas kaga jiIsrael anofu Amassia kaga jiJuda amamuetsana yigumi na bilima biranu.

¹⁸Misamu misusu miAmassia mimasongu mu Dibuku diBisalu bibaKaga baJuda.

¹⁹Bamamutungila fundu o Jerusalem kabogu Amassia amarina te no Lakich; bamamuduka o Lakich agu bamamubokisila.

²⁰Bamabega mfumbi na dikalu adimadutu na bakabala na amatsigu o Jerusalem va mugula ubataji bandi o musiengi uDavid.

²¹Bisi Juda botsu bamabonga Azaria agumaba na yigumi na bilima bisiamunu na bamamuvaga kaga va yivinga yitaji andi Amassia.

²²Taji andi anofu Azaria amamuerungisa musiengi Elath.

²³Yilima yiyigumi na biranu bidurumu duAmassia muana dibaala uJoas agumaba kaga jJuda, Jeroboam muana dibaala uJoas agumaba kaga jiIsrael amarumanga o Samarie.

²⁴Amavaga amasamalasa Fumu ubueji: asamabusa ne disumu dimosi diJeroboam muana dibaala uNebat agumarombisa baIsrael uvaga masumu.

²⁵Amamuekunsa mandilu maIsrael ubandila o dikotulu diHamat te no mubu ukumu nana Jonas mubiyitsi, muana dibaala uAmittai muisi Gat-Hefer amavosila Fumu Nsambi Israel.

²⁶Fumu amalaba diguga dibaIsrael adi bamatsogusu; vasamaba mutu uwamusa baIsrael.

²⁷Fumu mbe asakatabula yiri otsindula diina dibaIsrael va butamba kabogu amabatindila Jeroboam muana dibaala uJoas ubawaka kalala.

²⁸Misamu misusu miJeroboam na motsu ama amavaga o divita na nana amapatulila Juda Damas na Hamat umagabusa ombu baIsrael, mimasonugu mu Dibuku diBisalu bibaKaga baIsrael.

²⁹Jeroboam amafu na amatsigu o Samarie va mbura mosi na bakaga baIsrael. Zacharie muana andi udibaala amaruma va yivinga yiandi.