Read Punu 2 Bakaga 17 Bible Online

2 Bakaga 17 - Punu bible

2 Bakaga 17

¹Yilima yiyigumi na bibeji bidurumu duAhaz kaga jiJuda Osee muana dibaala uEla amaba kaga jibaIsrael o Samarie. Amaruma yifu yibilima.

²Amavaga amasamalasa Fumu ubueji, tsiri nana bakaga baIsrael abamamurela uruma.

³Salmanasar kaga jiAssyrie amayetoga na Osee; kabogu baIsrael bamaba o tsi durumu duandi na bamafutila kaga jiAssyrie dumandu.

⁴Tumba kaga jiAssyrie amabagula fundu Osee agumatinda bilumbi ombu Sais kaga jiEgypte na asamamuefutilanga kaga jiAssyrie dumandu yilima na yilima. Kaga jiAssyrie amamutungisa na amamukotisa o tsugu.

⁵Kaga jiAssyrie na bagora bandi bamasieenga bulongu buotsu na bamayetoyisa bisi Samarie na bamagukanda te na bilima birieru.

⁶Yilima yimufu yiOsee kaga jiAssyrie amabongila Samarie na amabega baIsrael baviga o Assyrie. Amabatsanisa o Hala na va disimu diHabor mujamba uGozan na misiengi miMedie.

⁷BaIsrael bamalaba maguga meni mu mbari basamalasa Fumu Nsambi ogu ubueji agumabapalisa o bulongu buEgypte o tsi durumu duPharaon kaga jiEgypte.

⁸Bamaduka bifu bibisi malongu ama Fumu amabingila baIsrael na abi bakaga baIsrael bamavaga.

⁹BaIsrael bamavayila Fumu Nsambi ogu mabi o musuega. Bamakerungila mbura tsiduyitsu o misiengi miotsu ubongila o ndagu jisakama te no misiengi mikandu.

¹⁰Bamareliga bitumba na bakosi va julu mikongu mineni na va tsi tsimiri.

¹¹Avana bamanyensilanga bima bimbunga jiboti mu mbura tsiotsu tsiduyitsu, dedi mosi na bisi malongu aba Fumu amababingila, bamavaga mabi amamanyoyisa Fumu.

¹²Bamakutimina bakosi diuleba Fumu amabagandisa udivaga.

¹³Fumu amasalisa babiyitsi na abamajabanga amoba o gusu ulubusa baIsrael na baJuda rie: Dundanu bifu bienu bibi, kelisanu maruma mami mamunongu na munongu na kipanganu migaga ami nyimavega bataji benu amina nyimadutindila na babiyitsi bami.

¹⁴Tumba basamakipa na bamagalisa mirima miogu dedi mosi na bataji bogu abasamavayila Fumu Nsambi ogu yitu.

¹⁵Bamabusa migaga miNsambi na bamabunsa pangini ajimavangunu na bataji bogu na bamabusa malubu ama amabalubusa. Jogu bamaduka mambu amagaa na tsongu na bamakevega uvaga kulini; bamagukuyila bisi malongu abamaba yiari na yiari ama Fumu amabagandisa.

¹⁶Bamabusa maruma motsu maFumu Nsambi ogu, bamakevayila kosi tsibaana babangombi na bamavaga kosi tsiAstarte na bamakutimina bambuelili na bamasalila Baal.

¹⁷Bamanyensa baana bogu bababaala na babagetu, bamakevega uresanga novandanga na bamakesumbisa uvaganga amasamalasa Fumu ubueji, diwendi rie: bamamunyoyisa.

¹⁸Fumu amanyoyila baIsrael tindi kabu na amabakakasana nandi. Yika yifumba yiJuda buandi ayimasiala.

¹⁹Nesi baJuda basamakelisa maruma maFumu Nsambi ogu bamadukanga bifu abimakotusu o bufumu buIsrael.

²⁰La dibandu Fumu amabusila baIsrael botsu; amabasundusa, amabawakisa ombu bakinditsi na amababinga vala nandi.

²¹BaIsrael banobusa ndagu David, bamavaga Jeroboam muana Nebat kaga, jandi agumabakakasana na Fumu na amarombisa baIsrael uvaga disumu dineni.

²²BaIsrael bamakevega uvaganga masumu motsu ama Jeroboam amavaganga; basamakalula diela

²³te na Fumu amababinga vala nandi dedi mosi nana babiyitsi bandi bamavosila. BaIsrael bamabegu baviga vala na bulongu buogu o Assyrie. Aguna bavu te na namunyi.

²⁴Kaga jiAssyrie amanengila bisi Babylone na bisi Kouta na bisi Ava na bisi Hamat na bisi Sefarvaim na amabatsanisa o misiengi miSamarie va yivinga yibaIsrael. Jogu bamadila Samarie na bamatsana va misiengi amimabambana.

²⁵Banobanda utsana muna basamaduma Fumu kabogu Fumu amabatindila bimbungu abimababoka.

²⁶Bamayetsingula kaga jiAssyrie rie: Bisi malongu aba ndeʼ gumasuva nobatsanisa o misiengi miSamarie bagejabi nana divu diwelimina usalila nsambi jibulongu na nsambi eni amabatindila bimbungu ubaboka.

²⁷Kaga jiAssyrie amavega diruma diedidi rie: Nengila muvagulitsi upagu umosi va gari bavagulitsi bapagu aba dumabinga; ayitsana gunu nobalonsa nana divu diwelimina usalila nsambi ajiji.

²⁸Muvagulitsi upagu umosi agumabingu o Samarie amagabuga uyitsana o Bethel na amabalonsa nana divu diwelimina uyitsa Fumu.

²⁹Tumba bisi malongu bamavaga dilongu dilongu yitumba yiogu na bamabisunsa o mbura tsiduyitsu atsi bisi Samarie bamalerunga.

³⁰Diina dinsambi jibisi Babylone: Soukot-Benot; adi bisi Kouta: Nergal; adi bisi Hamat: Achima;

³¹ama bisi Ava: Nibaz na Tartac; ama bisi Sefarvaim: Adrammelek na Anammelek, jogu bamanyensanga baana bogu uyitsanga bansambi beni.

³²Bamayitsanga Fumu wandi na bamakevayila bavagulitsi bapagu ba-mbura tsiduyitsu abamabongulu o malongu motsu: bavagulitsi beni bapagu bamabavagulilanga pagu tsiunyensa na mandagu ma-mbura tsiduyitsu.

³³Anana bamayitsilanga Fumu va mosi na bansambi bogu na bifu bimalongu ama bamarugasana.

³⁴Te na namunyi bategula bakiduka bifu bigulu. Bageyitsi Fumu na bageduki nesi migaga miogu nesi maruma mogu nesi migaga na maruma abi Fumu amavega baJacob agu amaluga Israel.

³⁵Fumu amavangana pangini na bategula baJacob, amabavega maruma memama rie: Duyayitsa bansambi bangana na duyabakutimina na duyabasalila na duyabavagulila pagu.

³⁶Tumba duyitsanga Fumu agumadupalisa o bulongu buEgypte na mangolu maneni; dumukutimina, nombu gandi buandi duvagulilanga pagu.

³⁷Dukelisanga na dukipanga migaga miandi miotsu na maruma mandi motsu abi amaduvega na duyayitsa bansambi bangana.

³⁸Duyalibana pangini aji nyimavangana nenu na nyibuesi rie: Duyayitsa bansambi bangana.

³⁹Tumba duyitsanga Fumu Nsambi enu na oduwaka kalala ombu bavinitsi benu botsu.

⁴⁰Ne nana basamadedila, kabogu bamaduka bifu biogu bigulu.

⁴¹Bisi malongu bamayitsanga Fumu va mosi na bakosi bogu: baana jogu na bategula bogu bevayingi munongu mosi te na namunyi.