Read Punu 2 Bakaga 18 Bible Online

2 Bakaga 18 - Punu bible

2 Bakaga 18

¹Yilima yimurieru yidurumu duOsee muana dibaala uEla agumaba kaga jiIsrael, Ezekias muana dibaala uAhaz amaba kaga jiJuda.

²Amaba na magumabeji na bilima biranu ava amabandila uba kaga na amaruma magumabeji na yifu yibilima o Jerusalem. Diina dinguji andi Abi muana mugetu uZacharie.

³Amavaganga amamalasa Fumu ubueji dedi mosi na taji andi David.

⁴Amatsiemusa mbura tsiduyitsu na amabulisa bitumba na amapansa bakosi na amapansa nyoga jikunga aji Moise amavaga mu mbari te na temu eni baIsrael bamajivagulilanga bima bimbunga jiboti; jimanengulungu Nehouchtan.

⁵Ezekias amavayila Fumu Nsambi Israel yitu yiandi yiotsu; bakaga botsu baJuda abamamuduka nesi abamamurela vasamaba na jimosi ajimaba dedi nandi.

⁶Amanamana na Fumu na asamamubusa na amakelisa maruma ama Fumu amavega Moise.

⁷Fumu amaba na Ezekias agumalunga mu bisalu biandi biotsu. Jandi amabusa uba o tsi durumu dukaga jiAssyrie.

⁸Amabelisa baPhilistin te no Gaza na amabunga bulongu buogu ubandila o mandagu masakama te no misiengi mikandu.

⁹Yilima yimuina yidurumu duEzekias ayimaba yilima yimusambuali yidurumu duOsee muana dibaala uEla agumaba kaga jiIsrael; Salmanasar agumaba kaga jiAssyrie amayetumuna Samarie na amagukanda.

¹⁰Bilima birieru binovioga amagupatula, diwendi rie: yilima yimusiamunu yidurumu duEzekias ayimaba yilima yimufu yidurumu duOsee agumaba kaga jiIsrael.

¹¹Kaga jiAssyrie amabega baIsrael baviga o Assyrie na amabatsanisa o Hala na va disimu diHabor mujamba uGozan no misiengi miMedie.

¹²BaIsrael bamalaba maguga meni mu mbari basamadedila diufi diFumu Nsambi ogu na bamakubula pangini andi, basamadedila maruma motsu ama Fumu amavega Moise.

¹³Yilima yiyigumi na bina bidurumu duEzekias Sennakerib kaga jiAssyrie amayetoyisa misiengi miotsu mikandu mibufumu buJuda na amamipatula.

¹⁴Ezekias kaga jiJuda amatinda yilumbi uyetsingula kaga jiAssyrie o Lakich rie: Nyimavaga dibi! Kakana nami, motsu ama gukwivula nyuvaga. Kabogu kaga jiAssyrie amawivula Ezekias kaga jiJuda yifu yitosini tsikilu tsilora jivema na yifu yikama tsikilu tsilora.

¹⁵Ezekias amamuvega lora jiotsu jivema ajimaba o Ndagu Nsambi na bilundulu bindagu kaga.

¹⁶Mu dionyi Ezekias kaga jiJuda amamugusulila lora ajimanamugu mu maguyi na migunda mindagu Fumu ufutila kaga jiAssyrie.

¹⁷Kaga jiAssyrie amatinda Tartan na Rab-Saris na Rabschake na bagora bamangolu abamarambuyila o Lakich uwenda o Jerusalem. Banotola o Jerusalem bamasikama va ditanga, diwendi rie: va mugula dianga dineni mu nsila o Mbura aji Besusili.

¹⁸Mbana bamawivula uyevosa na kaga. Kabogu Eliaquim muana dibaala uHilquia agumaba yivunda yindagu kaga amabarasuna jogu na Chebna musonitsi na Yoa muana dibaala uAssaf, musonitsi ususu.

¹⁹Rabschake amabatsingula rie: Tsingulanu Ezekias rie: Kaga ajineni, diwendi rie: Kaga jiAssyrie jandi rie: Yitu yimunongu yi yivu nagu?

²⁰Guitasi yiri posulu na posulu tsiuvinga bukidi nesi ukunsama utoga divita? Kabogu ama gumavosa yika wa mapopopu! Anyi eguveyi mangolu umbusa?

²¹Aa nyijabi, Egypte guivayili yitu, guiwarili dupangu dueni dutabuga aduitobi dikaka dijandi aguiwarili. Anana Pharaon kaga jiEgypte avu ombu botsu abemuvayili yitu.

²²Tanguji dunsingula rie: Tuivayili Fumu Nsambi etu yitu. Tumba tsiri ndeʼ Ezekias agumatsiemusa mbura tsiandi tsiduyitsu na binyensulu biandi bipagu na agumaruma bisi Juda na bisi Jerusalem rie: Duvagulanga pagu yika va yinyensulu yipagu o Jerusalem.

²³Leguluati! Singa adi fumu ami kaga jiAssyrie egutsinguli. Nyuguvega tosini beji tsibakabala pa gurungula udila babeyitsi batsionyi.

²⁴Je gurungula ubingisa ne gora jimosi va gari bagora bageyi bafumu ami? Tsia bisi Egypte guivayili yitu uguvega makalu na babeyitsi bamonyi?

²⁵Je nyimaruga uyipansa mbura ejiji tsiri na musuga uFumu? Fumu amatuma rie: Yepansa bulongu bueni nobubunga.

²⁶Eliaquim muana dibaala uHilquia na Cheba na Yoa bamatsingula Rabschake rie: Kokolu vosa netu mu mbembu jiArameen mu mbari tuijigulu; guyavosa netu mu mbembu jiHebreu yiri batu abavu va julu yivaga bekegulu.

²⁷Rabschake amabawaka rie: Je fumu ami amansindiga yika ombu genu udutsingula mambu memama? Tsia amansindiga nesi ombu batu bebaba abavu va julu yivaga aboji mambi mogu nonu masuba mogu va mosi nenu?

²⁸Mbana Rabschake amakweka na amagamuga mu Hebreu rie:

²⁹Guluanu mambu makaga ajineni, kaga jiAssyrie! Kaga jandi rie: Ezekias ayadutsimbusu mu mbari agorungula udwaka kalala ombu gami.

³⁰Ezekias ayadutsotsa ukevega ombu Fumu ava evosili rie: Fumu otuwaka kalala na musiengi egugu ugowakusu ombu kaga jiAssyrie.

³¹Duyagulu Ezekias; guluanu adi menu kaga jiAssyrie nyivosi rie: Nonganu nami, keveganu ombu gami na mutu mutu oji biguji binungi andi noji mifiga miandi na mutu mutu onuanganga mamba mayileka yijaʼ beni.

³²Namapapa nyuruga nodubega o bulongu abuba nderi bujenu beni o bulongu abuvu na ble na malamu na mapa na mirayisan na matsi na mioliva na buji mbana dugofuila gunu, duyedila monyu. Kabogu duyagululu Ezekias; edudunsi ava evosili rie: Fumu otuwaka kalala.

³³Bansambi bamalongu masusu bamaba na mangolu ukubitsa? Menu aguvu kaga jiAssyrie?

³⁴Bansambi baHamat na baArpad baka? Bansambi baSefarvaim na baHena na baAva baka? Jogu bamawaka bisi Samarie kalala ombu gami?

³⁵Bansambi bamalongu meni motsu abamawaka bisi bulongu kalala ombu gami baka? Yika Jerusalem buandi agu Fumu okubitsa ubonga?

³⁶Batu bamavola sui! Basamamuwaka ne diambu dimosi mu mbari Ezekias amabavega diruma diedidi rie: Duyamuwaka.

³⁷Eliaquim muana dibaala uHilquia agumaba yivunda yindagu kaga na Chebna musonitsi na Yoa muana dibaala uAssaf musonitsi ususu bamawenda ombu Ezekias na biduaru bipasiga na bamayemutsingula misamu miRabschake.