Read Punu 2 Bakaga 19 Bible Online

2 Bakaga 19 - Punu bible

2 Bakaga 19

¹Kaga Ezekias anogulu motsu mana amapasa biduaru biandi na amaduara siela, mbana amagabuga o Ndagu Nsambi.

²Amasindiga Eliaquim yivunda yindagu kaga na Chebna musonitsi na bivunda bibavagulitsi bapagu, jogu botsu bamaduara siela na bamawenda ombu Esaie muana dibaala uAmots agumaba mubiyitsi.

³Bamamutsingula rie: Ezekias jandi rie: Yilumbu yieyiyi yivu yidiguga na yimukilu na yiyisonyi; baana baka o mbura tumba mangolu ubura masatsi.

⁴Tanguji Fumu Nsambi agu amagulu posulu tsiotsu tsiRabschake atsi fumu andi kaga jiAssyrie amamusindiga uyisienga Nsambi monyu na tanguji Fumu agu otsiemusa purulu tsieni tsiotsu atsi amagulu. Kabogu sambila mu diambu dijetu atuisiali.

⁵Bilumbi bikaga Ezekias bimawenda ombu Esaie.

⁶Esaie amabatsingula rie: Guluanu adi duyetsingula fumu enu rie: Fumu jandi rie: Guyaregama na mambu ama basalitsi bakaga jiAssyrie bamansiengila.

⁷Kaga ogulu misamu amiumugabusa o bulongu buandi; aguna nyumusingisa uboku.

⁸Rabschake amagabuga, amarasuna kaga jiAssyrie utumuna etumuni bisi Libna mu mbari amagulu yiri amarambuga va Lakich.

⁹Kaga jiAssyrie amagulu musamu uTirca kaga jiEthiopie agu bamamutsingula rie: Gulu uruga eruyi uyitoga nagu. Kaga jiAssyrie amamuetinda bilumbi uyetsingula Ezekias rie:

¹⁰Gukatsingula Ezekias kaga jiJuda rie: Guyamuevayila Nsambi yituʼ. Okubitsa ubonga Jerusalem?

¹¹Ndeʼ gumagulu ama bakaga baAssyrie bamavayila malongu motsu na nana bamamabungila; yika ndeʼ aguwaka kalala?

¹²Je bansambi bamalongu ama bataji bami bamabunga, bamabawaka kalala? Malongu meni amama: Gozan na Haran na Ressef na Telassar musiengi ubaEden.

¹³Bakaga baHamat na baArpad na baLair na baSefarvaim na baHena na baAva baka?

¹⁴Ezekias amabonga muganda agu bisi Syrie bamabega na amaguranga. Mbana amawenda o Ndagu Nsambi na amawala muganda eni va gusu Fumu.

¹⁵Mbana amasambila dusambu duedudu rie: Fumu Nsambi Israel aguitsani va gari biansa! Ndeʼ aguvu Nsambi mosi buandi jibufumu buotsu bubutamba, ndeʼ agumavaga julu na tsi.

¹⁶Fumu liga dituji diagu nogulu. Fumu, dibula misu magu na gengilati. Guluati bisiengu biSennakerib agumasindiga Rabschake uyigusienga ndeʼ aguvu Nsambi monyu.

¹⁷Dingensa Fumu! Bakaga baSyrie bamabunga tindi ubunga malongu masusu.

¹⁸Bamanyensa bansambi bogu abasamaba tindi bansambi, bavu bima abi batu bamavaga na miri na mamanyi kabogu abina bimabungu.

¹⁹Aa Fumu Nsambi etu, tuwaki kalala namunyi ombu Sennakerib yiri bisi malongu motsu bajabi ndeʼ guvu Nsambi tindi Nsambi.

²⁰Mbana Esaie muana dibaala uAmots amatinda yilumbu uyetsingula Ezekias rie: Fumu Nsambi Israel jandi rie: Nyimagulu dusambu adu gumansambila mu diambu diSennakerib kaga jiAssyrie.

²¹Gulu mambu ama nyimuvosili rie: Sennakerib, musiengi uSion egulensi, egudesi. Jerusalem uboti egumuangisili muru.

²²Anyi gumasienga? Anyi gumalensa? Anyi gumalutsila misu? Menu aguvu Usiema uIsrael!

²³Mu miunu mibilumbi biagu, gumanseinga, Menu aguvu Fumu. Gumavosa rie: Menu Sennakerib, yiesa yimakalu mami mapuela nyimabindugu nesi o julu tsimikongu te no masuka maLiban, uyetabula miri amiviolila usakama, nesi miri amiviolila ubueji. Nyutola nesi te no mandeka, nyusita utola o pari aji tsiesiaa!

²⁴Menu nyimatima biduna bimamba nyimanu mamba mamalongu masusu. Nyukamusa baana bamujamba uNil yika na matambi mami ava nyutsiarila butamba buEgypte.

²⁵Ndeʼ Sennakerib, gusamagulu? Menu, nyimakunsa mambu meni kala, nyimamalaba mawelimina. Nyimagana duganu mbana nyimadudugusu. Nyimagusola ukalusa misiengi mikandu yika dibumbu dimosi.

²⁶Bisi misiengi bagaa na mangolu bamabasa na goma bamasutu. Bavu nderi biriri bimanungi, nesi biriri binyelili nesi nana kunsa atsimagumuga atsigobueji uneku.

²⁷Nyigujabi. Nyijabi agu guitsanini, nesi ava guipalili, nesi ava guikotili, nesi pa guinyoyili.

²⁸Mu mbari guinyoyili, nyilabi dunangu duagu. La dibandu nyugukilisa; nyukobiga mulunga mu miunu miagu mimbasu, nyusunsa budilu mu munu agu, nyugugabusa o ndagu muna nsila aji gumaruyila.

²⁹Mbe ka ndeʼ Ezekias abibi biuba bilimba biagu: yilima yitega guji mimbendila mimanungi; yilima ayimubeji dedi mosi; tumba yilima ayimurieru duvaranga na dutsonsigaanga na duvaranga mfuga tsirayisan ami dujanganga.

³⁰Bansialutsu baJuda boba nderi muiri aguibendisi ngansi, aguburanga milunda.

³¹O Jerusalem upalila bansialutsu na o mukongu uSion upalila abamalerina. Esaie amabuela rie: Fumu ovaga motsu mana na durondu duneni.

³²Guluanu adi Fumu evosi mu diambu dikaga jiAssyrie rie: Agomuekota o musiengi egugu, agomuenonga mbansa, agomuelasa ngubu tsiandi na agomuegukanda.

³³Menu Fumu nyivosi rie: Ogabuyila mu nsila aji amaruyila, agomuekota o musiengi egugu.

³⁴Menu Nsambi nyivu, nyugaga Jerusalem yiri ugobungu mu diambu dimeʼ beni na dimusalitsi ami David.

³⁵Vana mukolu eni yiansa yiFumu yimapala, yimaboka kama na magumidunana na tosini yiranu tsibagora o milaku miAssyrie. Ava kedi bamalaba yika bamfumbi na bamfumbi.

³⁶Mbana Sennakerib kaga jiAssyrie amagusuga va milaku miandi, amayenagabuga o Ninive uyetsana.

³⁷Kabogu ava amagudimina o ndagu nsambi Nisrok, baana bandi bababaala: Adrammelek na Saresser bamamuboka mbana bamarina o bulongu buArarat Assarhaddon muana andi udibaala amaruma va yivinga yiandi.