Read Punu 2 Bakaga 20 Bible Online

2 Bakaga 20 - Punu bible

2 Bakaga 20

¹Va temu eni Ezekias amabela diambu. Esaie mubiyitsi, muana dibaala uAmots amawenda ombu gandi uyemutsingula rie: Fumu jandi rie: Kunsama mu mbari yika ufu guifu; gugomuebeluga.

²Ezekias amageluga o yibaga, mbana amasambila Fumu dusambu duedudu rie:

³Aa Fumu, rangimina yiri nyimawendanga sungingi va gusu agu na usigamana murima usunda na nyimavaganga yika maboti va gusu agu! Ezekias amalila tindi ulila.

⁴Esaie amapala na mbe asakananga dulombili dugari Fumu amavosa nandi rie:

⁵Gabuga yetsingula Ezekias sefu jibatu bami rie: Fumu agu, Nsambi taji agu David, jandi rie: Nyimagulu dusambu duagu na nyimalaba matsanga magu. Guluati, nyugubelusa; yilumbu ayimurieru guwenda o Ndagu Nsambi.

⁶Nyugubuesa yigumi na bilima biranu. Nyuguwaka kalala, jenu na Jerusalem ombu kaga jiAssyrie. Nyukelisa musiengi egugu mu diambu dimeʼ beni na dimusalitsi ami David.

⁷Esaie amavosa rie: Bonga mubanda umifiga. Bamagupieta va julu disieyi mbana Ezekias amabeluga.

⁸Ezekias amawivula mubiyitsi rie: Yilimba yi yiunjabisa yiri Fumu ombelusa na yiri nyuwenda yilumbu ayimurieru o Ndagu Nsambi?

⁹Esaie amavosa rie: Yilimba ayi Fumu oguvega ugujabisa yiri odugusu adi amavosa ayiyi: yidumbitsi yiuwenda yigumi yitaka o gusu vo o nsima; yi guirondi; o gusu vo o nsima?

¹⁰Ezekias amawaka rie: Digaa diranga pa yidumbitsi yiuwenda yigumi yitaka o gusu; uviolila ubueji pa yiugabuga yigumi yitaka mansinsima.

¹¹Mbana Esaie mubiyitsi amasambila Fumu agumagabusa yidumbitsi yigumi yitaka mansinsima mu yikadi yiAhaz.

¹²Va temu eni wandi Merodak-Baladan muana dibaala uBaladan agumaba kaga jiBabylone amatinda muganda na musangulu ombu Ezekias mu mbari amagulu ubela ebeli.

¹³Ezekias amadila bilumbi na amabilasa yilundulu yiandi, yilora jivema na yilora na bima bimbunga jiboti na matsi madufunu duneni na yilundulu yibitogulu na biotsu abimaba o bilundulu biandi; Ezekias amabilasa biotsu nesi bindagu andi nesi bibufumu buandi buotsu.

¹⁴Esaie mubiyitsi amamuewenda ombu kaga Ezekias uyemuwivula rie: Diambu yi batu bebaba batsigutsingula na agunyi batsirugasana? Ezekias amawaka rie: Bamarambuyila vala o Babylone.

¹⁵Esaie amamuewivula rie: Yi batsilaba o ndagu agu? Ezekias amawaka rie: Batsilaba biotsu abivu o ndagu ami; vagaa ne yima yimosi mu bilundulu biami ayi ngaabalasa.

¹⁶Mbana Esaie amatsingula Ezekias rie: Leguluati diambu diFumu!

¹⁷Yilumbu yimosi bosuvila biagu biotsu o Babylone ubandila na abi bataji bagu bamagukiga te na binamunyi. Fumu jandi rie: Vagosiala ne yimosi.

¹⁸Na bobonga baana bagu bababaala aba ndeʼ beni gumabura ubavaga mivangu o ndagu kaga jiBabylone.

¹⁹Ezekias bamawaka Easie rie: Diambu diFumu adi gutsivosa divu diboti. Adi amatasa rie: Voba duvotsu na tuba sui yitsingu yiami yiotsu.

²⁰Misamu misusu miEzekias na motsu ama amavaga na nana amavayila ditanga utolisa mamba o Jerusalem mimasonugu mu Dibuku diBisalu bibaKaga baJuda.

²¹Ezekias amafu. Manasse muana andi udibaala amaruma va yivinga yiandi.