Read Punu 2 Bakaga 23 Bible Online

2 Bakaga 23 - Punu bible

2 Bakaga 23

¹Kaga Josias amanengila bivunda biotsu biJuda na biJerusalem.

²Mbana bamawenda o Ndagu Nsambi jogu na babaala botsu baJuda na bisi Jerusalem botsu na bavagulitsi bapagu na babiyitsi na batu botsu ubandila na bageyi botsu te na bivunda. Kaga amabarangila mambu motsu madibuku dipangini adi bamarasuna o Ndagu Nsambi.

³Kaga amaba diteli bebeli na dikutu, amamuewarisa pangini va gusu Fumu; avana amatabulila diambu yiri mutu mutu adukingi Fumu nokelisanga maruma mandi na migaga miandi miotsu na murima andi uotsu na matasa motsu novaganga motsu amamasonu mu dibuku dipangini. Batu botsu bamaba na kingu mosi.

⁴Kaga amaruma Hilquia yivunda yibavagulitsi bapagu na bavagulitsi bapagu bamosi na jogu abamakelisanga makotulu upalisa bisalulu biotsu biBaal na biAchera na bibambuelili na tsungi na wisi o Ndagu Nsambi; amabinyensa o tsomu dimbu o Jerusalem o vibususu yiCedron na bamabega dibufu o Bethel.

⁵Josias amabinga bavagulitsi bapagu bamfurulu aba bakaga baJuda bamasola uvagula pagu va mbura tsiduyitsu tsimisiengi miJuda na amimabambana na Jerusalem; amababinga mu mbari bamavagulilanga Baal na wisi na tsungi na bambuelili pagu.

⁶Amarumisa ugusula kosi jiAchera o Ndagu Nsambi; bamajigusula o Jerusalem uyejinyensa o yibususu yiCedron; bamajikalusa dibufu na bamabuaga dibufu dieni va mangila.

⁷Josias amapansa mandagu mabimbembu amamabambana na Ndagu Nsambi agu bagetu bamabuangilanga mandagu mamatsanda maAchera.

⁸Amanengila bavagulitsi bapagu botsu bamisiengi miJuda; amabivisa mbura tsiduyitsu atsi bavagulitsi bapagu bamanyensilanga bima bimbunga jiboti, ubandila o Gueba te no Bercheba; amapansa yinyensulu yipagu o yiari yibiabutsu bimbura tsiduyitsu, ayimaba va dikotulu dindagu jiJosue yivunda yimusiengi na adimaba va magetu madionyi.

⁹Tumba bavagulitsi bapagu bambura tsiduyitsu basamasingusu uvaguyila Fumu pagu va yinyensulu yipagu o Jerusalem, bamajanganga yika mapa amasamaba na dufunusu va mosi na baana bataji bogu.

¹⁰Kaga amabivisa yinyensulu yiTofet o yibususu yiHinnom yiri mutu agomueyenyensa muana andi udibaala vo umugetu uyitsa Molek.

¹¹Amatsiemusa bakabala aba bakaga baJuda bamawakisa mu yisalu yiduyitsu duwisi. Bakabala beni bamaba va dikotulu diNdagu Nsambi va mugula uyibuku yindagu yimuvangu, diina diandi Netan-Melek. Josias amanyensisa makalu amamasalusu uyitsa wisi.

¹²Kaga amapansa binyensulu bipagu abimaba o julu muansa undagu Ahaz abi bakaga baJuda bamarunga na binyensulu bipagu abi Manasse amarunga va ndombili tsiNdagu Nsambi; anobipansa amabibuaga o yibususu yiCedron.

¹³Kaga amabivisa mbura tsiduyitsu atsimaba va nsungisini na Jerusalem va mabaala mamukongu umiOlive agu kaga Salomon kaga jiIsrael amarungisila Astarte, nsoruru tsibisi Sidon na Kemoch, nsoruru tsibisi Moab na Milkom na nsoruru jibaAmmon.

¹⁴Josias amapansa bitumba na amavula bakosi; mbura atsi bionyi bimaba amabasa yika bivisi na bivisi bibatu.

¹⁵Josias amapansa yinyensulu yipagu ayimaba o Bethel na mbura jiduyitsu aji Jeroboam muana dibaala uNebat jandi agumarombisa baIsrael uvaga masumu; amapansa mbura jiduyitsu na amanyensa kosi te na biotsu bimaba dibufu.

¹⁶Josias anogeluga amalaba mangila amamaba vana mukongu, amasindiga batu uyebonga bivisi mu mangila na amabinyensa va yinyensulu yipagu na amayibivisa nana mubiyitsi uFumu amabiyila.

¹⁷Josias amawivula rie; Yirangumunu ayi nyilabilili yinyi? Bisi musiengi bamamuwaka rie; Ngila mubiyitsi agumaruyila o Juda agumatubula o Bethel mambu ama ndeʼ guidugusu namunyi.

¹⁸Mbana Josias amaruma rie; Duyayibemba; mutu ayapupisa bivisi bimubiyitsi! Anana bamakelisila bivisi biandi va mosi na bivisi bimubiyitsi agumaruyila o Samarie.

¹⁹Josias amabunga mandagu motsu mambura tsiduyitsu amamaba o musiengi uSamarie ama bakaga baIsrael bamarungisa unyoyisa Fumu; amavayila dedi mosi nana amavayila o Bethel.

²⁰Amabokisa bavagulitsi bapagu botsu va mbura tsiduyitsu na binyensulu bieni bipagu abimaba vana na amanyensa bivisi biogu. Josias amayenagabuga o Jerusalem.

²¹Kaga amaruma batu botsu uji feta Paque uyitsa Fumu Nsambi nana dimasonugulu mu dibuku dipangini.

²²Vasakaligu feta Paque jimunongu eni ubanda va temu aji bansonsi bamatabulila baIsrael bunsonsi, nesi te na yitsingu yiotsu yibakaga baIsrael na baJuda.

²³Ayina yimaba yilima yiyigumi na biranu bidurumu duJosias ayi bamavayila Paque eni uyitsa Fumu o Jerusalem.

²⁴Va julu vana Josias amabokisa jogu abamanengilanga binyunyi bibi na jogu abamaresanga na bakosi bamunongu na munongu na amatsiemusa nsoruru tsiotsu atsimalabanga o bulongu buJuda na Jerusalem yiri batu bodukanga mambu mamigaga amamasonugu mu dibuku adi Hilquia yivunda yibavagulitsi bapagu amarasuna o NdaguNsambi.

²⁵Va gusu Josias vasamaleba kaga ajimaba dedi nandi agumakevega ombu Fumu na murima andi uotsu na matasa mandi motsu na mangolu mandi motsu nana Moise amasonina mu migaga; jandi anovioga vasamalabana kaga jisusu jimunongu eni.

²⁶Ne nana Fumu asamatsiemusa kabu andi jineni aji amanyoyila baJuda mu diambu dimabi motsu ama Manasse amamunyoyisila.

²⁷La dibandu Fumu amavosila rie: Nyugusula baJuda va gusu ami dedi mosi nana nyimagusulila baIsrael basusu na nyubusa musiengi egugu uJerusalem agu nyimasola na Ndagu ami aji nyimavosila rie: Nyutsananga muna.

²⁸Misamu misusu miJosias na motsu ama amavaga mimasonugu mu Dibuku diBisalu bibaKaga baJuda.

²⁹Va temu jidurumu duandi Pharaon Neco agumaba kaga jiEgypte amayetoyila na kaga jiAssyrie o yiari yimujamba uEuphrate. Kaga Josias amayemubengusana; Pharaon amamuboka va Meguiddo, yika emulabi.

³⁰Bagora bandi bamabega mfumbi andi va dikalu; bamajinangula va Meguiddo te no Jerusalem na bamajitsiga o ngila andi. BaJuda bamasola Joachaz muana dibaala uJosias, bamamubiatsa kaga va yivinga yitaji andi.

³¹Joachaz amaba na magumabeji na bilima birieru ava amabandila uba kaga na amaruma tsungi yirieru o Jerusalem. Diina dinguji andi Hamoutal muana mugetu uJeremie muisi Libna.

³²Amavaga amasamalasa Fumu ubueji, dedi mosi nana bataji bandi.

³³Pharaon Neco amamutungisa na bapanga o Ribla o bulongu buHamat yiri agomueruma o Jerusalem; amavega baJuda dumandu dutosini yirieru tsikilu tsilora jivema na magumarieru makilu tsilora.

³⁴Mbana Phaiaon Neco amavaga Elioquim muana dibaala uJosias kaga va yivinga yitaji andi Josias na amavinsa diina diandi yika Joaquim. Joachaz amabegu o Egypte agu amayefuila.

³⁵Joaquim amavega Pharaon lora jivema na lora; tumba amaruma bisi bulongu uvega lora eni jivema na musuga agu Pharaon amamuvega; jaʼ beni amabavega dufunu adu mutu mutu amafuta, mbana amawakisa tsiotsu tsina ombu Pharaon Neco.

³⁶Joaquim amaba na magumabeji na bilima biranu ava amabandila uba kaga na amaruma yigumi na yilima yimosi o Jerusalem. Diina dinguji andi Zeboudda muana mugetu uPedaya muisi Rouma.

³⁷Amavaga amasamalasa Fumu ubueji dedi mosi nana bataji bandi.