Read Punu 2 Bakaga 25 Bible Online

2 Bakaga 25 - Punu bible

2 Bakaga 25

¹Yilima yimufu yidurumu duSedecias mu yilumbu yimugumi yitsungi jimugumi Nabucodonosor kaga jiBabylone amawenda na bagora bandi botsu o Jerusalem; bamatsana bebeli na uonyi na bamaramba murambu yiari na yiari.

²Musiengi umakandu te na yilima yiyigumi na yimosi bidurumu duSedecias.

³Yilumbu yimufu mu tsungi jimuina nsala jimaba dungosu o musiengi na batu basamaba na biguji.

⁴Bisi Babylone bamatoba diviogulu mu yivaga yimusiengi. Kabogu bagora botsu bamarina mukolu muna nsila dikotulu adimaba va gari bibaga bibeji bebeli na nungi kaga. Diuleba bisi Babylone bamakandila musiengi bamavioyila o nsila jikumu.

⁵Tumba bagora baBabylone bamaduka kaga na bamamurasuna o kumu tsiJericho na bagora bandi botsu bamamurina vala.

⁶Bamagaanga kaga na bamamubega ombu kaga jiBabylone o Ribla; bamamutabulila bunsonsi.

⁷Baana bababaala baSedecias bamatabulu miuru va misu mandi mbana bamatoba Sedecias misu na bamamutunga na panga tsikunga, bamayenamubega o Babylone.

⁸Yilima yimugumi na yifu bidurumu duNabucodonosor kaga jiBabylone, yilumbu yimusambuali yitsungi jimuranu Nebouzaradan yivunda yibagora agumaba musalitsi ukaga jiBabylone amakota o Jerusalem.

⁹Amanyensa Ndagu Nsambi na ndagu kaga na mandagu motsu maJerusalem; amanyensa nesi mandagu mabatu baneni.

¹⁰Bagora botsu baBabylone abamaba na yivunda yibagora bamapansa bivaga biJerusalem.

¹¹Nabouzaradan yivunda yibagora amabega batu abamatsananga o musiengi bakoli. Amabawakisa ombu kaga jiBabylone va mosi na batu abamasialulu.

¹²Tumba yivunda yibagora amasila yika mua batu abamasalusu ukelisa nofutsanga manungi.

¹³Bisi Babylone bamapansa makutu makunga amamaba va dikotulu diNdagu Nsambi na mabandu na nsienga tsikunga abimaba o Ndagu Nsambi na bamayenabega kunga o Babylone

¹⁴Bamabega bisalulu biotsu bikunga abimasalulungu: bisunsulu bimabufu na bapelu na mabaga na mamoyi.

¹⁵Yivunda yibagora amabega bima bilora na bilora jivema: bisunsulu bimuji na mamoyi.

¹⁶Basamarungula upitsa kunga jiotsu: makutu motsu mabeji na nsienga na mabandu abi Salomon amarungisa ukotisa o Ndagu Nsambi.

¹⁷Diwendi rie: yirela yidikutu dimosi yimaba yifu yimetera na va julu dionyi vamaba yiviovi yikunga yirela yiyionyi yimaba metera na yibuku. Dikutu dimavakugu bima bikunga: yimosi yimaba nderi mbusa ayimanamugu na yisusu ayimabagunu na migeranada. Dimaba dedi mosi na dikutu adimubeji.

¹⁸Yivunda yibagora amabega Seraya yivunda yibavagulitsi bapagu na Sefania muvagulitsi upagu agumubeji na bakelisi bamakotulu barieru.

¹⁹Amabega muvangu agumarumanga bagora na babaala baranu abamaba mu dibuli dibivunda bineni bikaga na musonitsi uyivunda yibagora agumaba na yisalu usansama na magumasiamunu mabaJuda: botsu bana bamaba o Jerusalem.

²⁰Nebouzaradan yivunda yibagora amababega ombu kaga jiBabylone o Ribla.

²¹Kaga jiBabylone amababokisa o Ribla o bulongu buHamat. Anana baJuda bamabegulu vala na bulongu buogu.

²²Nabucodonosor amasila mua batu o bulongu buJuda; amabasolila yivunda diinadiandi Guedalia muana dibaala uAhicam mutegula uChafan.

²³Bivunda biotsu bibagora na bagora basusu banogulu yiri kaga jiBabylone amasola Guedalia yivunda bamawenda ombu gandi o Mispa. Abamawenda: Ismael muana dibaala uNetania na Yohanan muana dibaala uCarea na Seraya muana dibaala uTanehoumet; jogu na batu bogu.

²⁴Guedalia amabaruma jogu na batu bogu rie: Duyaduma bisi Babylone, tsananu mu bulongu nosalilanga kaga jiBabylone. Dugoba na diambu.

²⁵Tumba mu tsungi jimusambuali jiyilima yieni, Ismael muana dibaala uNetania na mutegula uElichama muisi ndagu kaga amawenda o Mispa na yigumi yibabaala na bamadimbisa Guedalia agudufu dedi mosi na baJuda na bisi Babylone abamaba nandi.

²⁶Kabogu batu botsu na bivunda bibagora bamayenarina o Egypte mu mbari bamaduma bisi Babylone.

²⁷Yilima yimagumarieru na yisambuali bibuviga buJoakin kaga jiJuda, Evil-Merodak amabiatsu kaga jiBabylone. Mu yilumbu yimagumabeji na yisambuali yitsungi jiyigumi na beji mu yiliina yitega yidurumu duandi amajeyisa Joakin kaga jiJuda na amamupalisa o tsugu.

²⁸Amavosa nandi na buranga na amamuvega yitsiga yibukaga ayimaviolila bitsiga bibakaga basusu abamaba nandi o Babylone.

²⁹Amamuvinsila biduaru biandi bitsugu na Joakin amajanganga va mosi nandi yitsingu yiandi yiotsu.

³⁰Anana kaga jiBabylone amamuvayilanga kadi yilumbu te na amafu.